Yohane Sane Kpakpa a

14 “Nyɛ ko ye tsui. Nyɛ he Mawu nɛ nyɛɛ ye; nyɛ he imi hu nɛ nyɛɛ ye. 2 Sihi hehi fuu ngɛ ye Tsaatsɛ we ɔ. Kaa nɔ́ ko be jã a, jinɛ i ko de nyɛ, ejakaa i yaa nɛ ma ya dla he ko ngɔ to nyɛ. 3 Jehanɛ se hu ɔ, ke i ya nɛ i ya dla he ko ngɔ to nyɛ ɔ, ma ba ekohu, nɛ ma ba ngɔ nyɛ kɛ ho ye we ɔ mi ya, konɛ he nɛ i ngɛ ɔ, nyɛ hu nyɛɛ hi lejɛ ɔ. 4 Nɛ he nɛ i yaa a, nyɛ le blɔ ɔ.”

5 Toma de lɛ ke: “Nyɔmtsɛ, wa li he nɛ o yaa a. Kɛ wa ma plɛ kɛ le blɔ ɔ kɛɛ?”

6 Yesu de lɛ ke: “Imi ji blɔ ɔ, kɛ anɔkuale ɔ, kɛ wami ɔ. Nɔ ko nɔ ko be nyɛe maa ba Tsɛ ɔ ngɔ kaa ja e gu ye nɔ. 7 Kaa nyɛ le mi ɔ, jinɛ nyɛ ko le ye Tsɛ ɔ hulɔ; kɛ je amlɔ nɛ ɔ kɛ yaa a, nyɛ le lɛ, nɛ nyɛ na lɛ.”

8 Filipo de lɛ ke: “Nyɔmtsɛ, tsɔɔ wɔ Tsɛ ɔ, nɛ lɔ ɔ kɛkɛ hiɛ ha wɔ.”

9 Yesu de lɛ ke: “Lɔ ɔ be babauu nɛ i kɛ nyɛ hi si nɛ ɔ, Filipo, loloolo ɔ, o li mi lo? Nɔ fɛɛ nɔ nɛ e na mi ɔ, e na Tsɛ ɔ hulɔ. Mɛni he je nɛ o de ke, ‘Tsɔɔ wɔ Tsɛ’ ɔ? 10 Anɛ nyɛ he we yi kaa i kɛ Tsɛ ɔ pee kake nɛ Tsɛ ɔ hu kɛ mi pee kake lo? Níhi nɛ i deɔ nyɛ ɔ, pi imi nitsɛ ye yi mi nɛ i toɔ kɛ deɔ, mohu ɔ, Tsɛ ɔ nɛ́ e kɛ mi pee kake ɔ lɛ e ngɛ e ní tsumihi tsue. 11 Nyɛ he mi nɛ nyɛɛ ye kaa i kɛ Tsɛ ɔ pee kake nɛ Tsɛ ɔ hu kɛ mi pee kake; ke nyɛ he we nɔ́ nɛ i de ɔ yi po ɔ, e sa nɛ ní tsumi ɔmɛ nɛ a ha nɛ nyɛ he ye. 12 I ngɛ nyɛ dee ngɛ anɔkuale mi ke, nɔ fɛɛ nɔ nɛ e heɔ mi yeɔ ɔ, ní tsumihi nɛ i tsuɔ ɔ, lɛ hu e ma tsu; nɛ e ma tsu ní tsumihi nɛ a kle pe enɛ ɔmɛ po, ejakaa i yaa Tsɛ ɔ ngɔ. 13 Jehanɛ se hu ɔ, nɔ́ fɛɛ nɔ́ nɛ nyɛ ma bi ngɛ ye biɛ mi ɔ, lɔ ɔ nɛ ma pee, konɛ a gu Bi ɔ nɔ kɛ wo Tsɛ ɔ hɛ mi nyami. 14 Ke nyɛ bi nɔ́ ko ngɛ ye biɛ mi ɔ, ma pee.

15 “Ke nyɛ suɔ mi ɔ, nyɛ maa ye ye mlaa amɛ a nɔ. 16 Nɛ ma kpa Tsɛ ɔ pɛɛ nɛ e ma ha nyɛ yemi kɛ bualɔ* kpa nɛ e kɛ nyɛ maa hi si kɛ maa ya neneene, 17 anɔkuale mumi ɔ nɛ je ɔ nine be nyɛe maa su nɔ ɔ, ejakaa je ɔ nɛ lɛ, nɛ e li lɛ hulɔ. Nyɛɛ lɛɛ nyɛ le lɛ, ejakaa e kɛ nyɛ lɛ ngɛ, nɛ e ngɛ nyɛ mi. 18 I be nyɛ sie kaa awusahi.* I ma nyɛ ngɔ. 19 E piɛ bɔɔ nɛ je ɔ be mi nae hu, se nyɛɛ lɛɛ nyɛ maa na mi, ejakaa i ngɛ wami mi, nɛ nyɛ hu nyɛ maa hi wami mi. 20 Jamɛ a ligbi ɔ, nyɛ maa le kaa i kɛ ye Tsɛ ɔ pee kake, nɛ nyɛɛ kɛ mi pee kake, nɛ imi hu i kɛ nyɛ pee kake. 21 Nɔ fɛɛ nɔ nɛ e ngɛ ye mlaa amɛ, nɛ e yeɔ a nɔ ɔ, lɛ ji nɔ nɛ e suɔ mi. Nɛ nɔ fɛɛ nɔ nɛ e suɔ mi ɔ, ye Tsɛ ɔ maa suɔ lɛ, nɛ imi hu ma suɔ lɛ, nɛ ma je ye he si ngɔ tsɔɔ lɛ heii.”

22 Yuda kaketsɛ ɔ (nɛ tsa pi lɛ ji Iskariot ɔ) bi lɛ ke: “Nyɔmtsɛ, mɛni ba nɛ o to o yi mi kaa o ma je o he si ngɔ tsɔɔ wɔ heii, se pi je ɔ?”

23 Yesu ha lɛ heto ke: “Ke nɔ ko suɔ mi ɔ, e maa ye ye munyu ɔ nɔ, nɛ ye Tsɛ ɔ maa suɔ lɛ, nɛ wa maa ba e ngɔ, nɛ waa kɛ lɛ maa hi si. 24 Nɔ fɛɛ nɔ nɛ e sume mi ɔ, e yi ye munyu ɔmɛ a nɔ. Munyu ɔ nɛ nyɛ ngɛ nue ɔ, pi ye nɔ́, mohu ɔ, Tsɛ ɔ nɛ e tsɔ mi ɔ nɔ́.

25 I de nyɛ ní nɛ ɔmɛ be mi nɛ i kɛ nyɛ ngɛ loloolo ɔ. 26 Se yemi kɛ bualɔ ɔ, nɛ ji mumi klɔuklɔu ɔ nɛ́ Tsɛ ɔ maa tsɔ ngɛ ye biɛ mi ɔ, lɛ nɛ e ma ba tsɔɔ nyɛ nɔ́ fɛɛ nɔ́, nɛ e ma kai nyɛ níhi tsuo nɛ i de nyɛ ɔ. 27 I si tue mi jɔmi kɛ ha nyɛ; i ngɔ ye tue mi jɔmi ɔ kɛ ha nyɛ. I ha we nyɛ kaa bɔ nɛ je ɔ haa a. Nyɛ ko ye tsui, nɛ nyɛ ko ha gbeye nɛ ha nɛ nyɛ tsui nɛ po hulɔ. 28 Nyɛ nu kaa i de nyɛ ke, ‘I yaa nɛ ma kpale kɛ ba nyɛ ngɔ.’ Ke nyɛ suɔ mi ɔ, jinɛ nyɛ bua maa jɔ wawɛɛ kaa i yaa Tsɛ ɔ ngɔ, ejakaa Tsɛ ɔ nɔ kuɔ pe mi. 29 Enɛ ɔ he ɔ, amlɔ nɛ ɔ, i de nyɛ loko é ba mi, konɛ ke e ba mi ɔ, nyɛ he ye. 30 I kɛ nyɛ be munyu fuu tue hu, ejakaa je ɔ nɔ yelɔ ɔ ma, nɛ e be he wami ko ngɛ ye nɔ. 31 Se bɔ nɛ pee nɛ je ɔ nɛ e le kaa i suɔ Tsɛ ɔ, i peeɔ kaa bɔ nɛ Tsɛ ɔ fã mi ke ma pee ɔ. Nyɛɛ te si, nyɛ ha nɛ waa je hiɛ ɔ kɛ ho.