Hiob
10 “Ye wami gbe ye nya.*
Ma jaje ye haomi ɔmɛ.
Ma tu bɔ nɛ i hao ha a he munyu.*
2 Ma de Mawu ke: ‘Koo bu mi fɔ.
Mo de mi nɔ́ he je nɛ o kɛ mi ngɛ yee kikɛ nɛ ɔ.
3 Ke o ngɛ mi yi mi wae ɔ, o náa he se lo,
Anɛ o maa gbe mo nitsɛ o nine nya ní tsumi ɔ he guɛ,
Nɛ o maa suɔ nimli yayamihi a ga womihi mohu lo?
4 Anɛ o hɛngmɛ ngɛ kaa adesa hɛngmɛ lo,
Aloo o hyɛɔ nɔ́ kaa bɔ nɛ nɔmlɔ adesa hyɛɔ nɔ́ ɔ lo?
5 Anɛ o ligbi ɔmɛ ngɛ kaa adesa ligbihi lo?
Aloo o jeha amɛ ngɛ kaa adesa jehahi lo?
6 Nɛ lɔ ɔ he je ɔ, o maa hi ye tɔmi ɔmɛ hlae
Nɛ o maa ya nɔ maa hi ye he yayami ɔmɛ hlae ɔ?
7 O le kaa i yi fɔ;
Nɛ nɔ ko be nyɛe ma kpɔ̃ mi kɛ je o dɛ mi.
8 Mo nɔuu lɛ o kɛ o ninehi puɛ mi nɛ o bɔ mi,
Se amlɔ nɛ ɔ, o ngɛ hlae nɛ o kpata ye hɛ mi kulaa lo?
9 I kpa mo pɛɛ, mo kai kaa zu lɛ o kɛ puɛ mi,
Se amlɔ nɛ ɔ, o ngɛ hlae nɛ ma kpale kɛ ya zu mi lo?
10 Anɛ o plɛ we mi pue we si kaa nyɔ nyu kɛ wui ye yayo muklii mi
Nɛ́ o puɛ mi ngɛ lejɛ ɔ lo?*
11 O kɛ he womi kɛ lo ha ye he,
Nɛ o kɛ wu kɛ pani pee ye nɔmlɔ tso ɔ.
12 O ha mi wami nɛ o je suɔmi nɛ se pui kpo kɛ tsɔɔ mi;
O hyɛ ye nɔ nɛ o po ye he piɛ.*
13 Se mamoo o to o yi mi kaa o maa pee mi ní nɛ ɔmɛ nɛ́ i li.*
I le paa kaa ní nɛ ɔmɛ je o ngɔ.
14 Ke i pee yayami ɔ, o maa na mi,
Nɛ o kɛ ye he yayami ɔ be mi kee.
15 Ke i ye fɔ ɔ, lɛɛ kpoo ha mi!
Nɛ ke sane ko be ye he po ɔ, i be nyɛe ma wo ye yi nɔ,
Ejakaa zo gbe mi wawɛɛ nɛ i ngɛ nɔ́ nae
16 Ke i wo ye yi nɔ ɔ, o hlaa mi kaa bɔ nɛ jata hlaa niye ní ɔ
Nɛ jehanɛ hu ɔ, o ngɔɔ o he wami ɔ kɛ yeɔ mi awi.
17 O ngɔɔ odasefohi ehehi kɛ baa nɛ a ba yeɔ odase kɛ siɔ mi,
Nɛ o haa nɛ o mi mi fumi ɔ nya waa ngɛ ye nɔ,
Nɛ si himi nɛ mi wa nɛ́ eko nyɛɛ eko se baa ye nɔ.
18 Lɛɛ mɛni he je mɔ nɛ o je mi kɛ je ye yayo muklii mi ɔ?
E sa nɛ i ko gbo, nɛ́ hɛngmɛ ko nɛ mi.
19 Jinɛ e ko pee kaa nɔ́ nɛ i bɛ si himi mi gblee.
Jinɛ a ko ngɔ mi kɛ je ye yayo muklii mi nɔuu kɛ ko ho yɔkɔ mi ya.’
20 Ye wami ligbi ɔmɛ ɔ, pi bɔɔ pɛ nɛ piɛ lo? Ha nɛ Mawu nɛ ngmɛɛ ye he;
Ha nɛ e je e hɛngmɛ kɛ je ye nɔ nɛ ye he nɛ jɔ mi bɔɔ ko*
21 Loko ma je, nɛ́ i be ye se kpalee kɛ ba hu ɔ
Ma je kɛ ho zugba nɛ e nɔ wo diblii kpii* ɔ nɔ ya,
22 Kɛ ho zugba nɛ e nɔ wo diblii tuu nɔ ya,
Zugba nɛ e nɔ wo diblii kpii nɛ basabasa peemi ngɛ nɔ,
He nɛ la nɛ ngɛ lejɛ ɔ po ngɛ kaa diblii ɔ.”