Yesaya
8 Yehowa de mi ke: “Wo sleeti agbo ko nɛ o ngɔ ningma tso gu ko kɛkɛ* kɛ ngma ‘Maher-shalal-hash-baz’* ngɛ nɔ. 2 Konɛ ma ha nɛ anɔkuale odase yeli, nɛ ji osɔfo Uria, kɛ Yeberekia binyumu Zakaria nɛ a ngma kɛ fɔ si kɛ ma nɔ mi.*
3 Kɛkɛ nɛ i kɛ gbalɔyo* ɔ ná bɔmi,* nɛ e ngɔ hɔ, nɛ pee se ɔ, e fɔ binyumu. Lɔ ɔ se ɔ, Yehowa de mi ke: “Moo wo lɛ biɛ ke Maher-shalal-hash-baz, 4 ejakaa loko nyumuyo ɔ maa le ‘Tsaatsɛ!’ kɛ ‘Yayo!’ tsɛmi ɔ, a maa muɔɔ Damasko ní ɔmɛ kɛ Samaria ta yibu ní ɔmɛ kɛ ho ngɛ Asiria matsɛ ɔ hɛ mi.”
5 Yehowa kɛ mi tu munyu ekohu ke:
6 “Akɛnɛ nimli nɛ ɔmɛ kua Shiloa* nyu nɛ e beɔ blɛuu,
Nɛ a nyaa ngɛ Rezin kɛ jehanɛ se hu Remalia binyumu ɔ he he je ɔ,
7 Hyɛ! Yehowa maa ngɔ
Pa* a mi nyu babauu nɛ he wa a,
Asiria matsɛ ɔ kɛ e hɛ mi nyami ɔ tsuo kɛ ba a nɔ.
E maa ba e nyu dɔ ɔmɛ tsuo a nɔ,
Nɛ pa a ma hyi nɛ e maa ywia nga
8 Nɛ e ma ya be ngɛ Yuda.
E ma je ma a, nɛ e maa gu ma a mi kɛ be, nɛ e maa su nɔ kuɛ mi;
E maa gbɛ e pɛlihi a mi kɛ ha o zugba a tsuo nɔ kaa lohwe pɛlitsɛ,
Oo Yimanuel!”*
9 Nyɛ mahi, nyɛɛ ye awi, se a maa ywia nyɛ dukuduku.
Nyɛ nihi tsuo nɛ nyɛ ngɛ zugba a nɔ hehi nɛ a kɛ, nyɛɛ bu tue!
Nyɛɛ mia kɛ ha ta,* se a maa ywia nyɛ dukuduku!
Nyɛɛ mia kɛ ha ta, se a maa ywia nyɛ dukuduku!
10 Nyɛɛ to ga, se e ma puɛ!
Nyɛ de nɔ́ nɛ nyɛ suɔ, se e be manye yee,
Ejakaa Mawu kɛ wɔ ngɛ!*
11 Yehowa ngɔ e nine nɛ he wa a kɛ fɔ̃ ye nɔ, nɛ nɔ́ nɛ e de mi kɛ bɔ mi kɔkɔ konɛ ma ko nyɛɛ nimli nɛ ɔmɛ a blɔ ɔ nɔ ji nɛ ɔ nɛ:
12 “Nɔ́ nɛ nimli nɛ ɔmɛ tsɛɔ ke yi nɔ somi ɔ, e sɛ nɛ nyɛ tsɛ lɛ ke yi nɔ somi!
Nɔ́ nɛ a yeɔ lɛ gbeye ɔ, nyɛ ko ye jamɛ a nɔ́ ɔ gbeye;
E ko ha nɛ nyɛ he nɛ do blibliibli.
13 Yehowa tabohiatsɛ ɔ—lɛ ji nɔ nɛ e sa kaa nyɛɛ bu lɛ klɔuklɔu,
Lɛ ji nɔ nɛ e sa kaa nyɛɛ ye lɛ gbeye,
Nɛ lɛ ji nɔ nɛ e sa kaa e ha nɛ nyɛ he nɛ do blibliibli.”
14 E maa pee kaa jami he,
Se e maa pee kaa tɛmi tɛ,
Kɛ nane tɔ̃tɔ̃mi tɛsa
Kɛ ha Israel we enyɔ ɔmɛ tsuo,
E maa pee kaa kpa klama kɛ klama nitsɛ
Kɛ ha nihi nɛ a ngɛ Yerusalem ɔ.
15 A ti nihi babauu a nane ma tɛ nɔ́ nɛ a maa nɔ si nɛ a maa ku;
A maa tsɔ̃ mɛ klama nɛ a maa du.
16 Mo koklo odase ɔ nɛ a ngma a;
Moo sɔu mlaa a* nya ngɛ ye kaseli ɔmɛ a kpɛti!
17 Ma hyɛ Yehowa blɔ,* nɔ nɛ ngɔ e hɛ mi kɛ laa Yakob we ɔ, nɛ ma ngɔ ye hɛ kɛ fɔ e nɔ.
18 Hyɛ! I kɛ bimɛ nɛ Yehowa ngɔ mɛ kɛ ha mi ɔ wa ngɛ kaa okadihi kɛ nyakpɛ níhi nɛ je Yehowa tabohiatsɛ ɔ, nɔ nɛ e ngɛ Zion Yoku ɔ nɔ ɔ ngɔ kɛ ha Israel.
19 Nɛ ke a de nyɛ ke: “Nyɛ ya bi ní ngɛ ní peeli aloo klaali nɛ a tuɔ gugwɔ mi munyu, nɛ́ a munyu ngɛ kaa lohwe pɛlitsɛmɛ a pɛmi ɔ a ngɔ ɔ,” anɛ pi a Mawu ɔ nɛ e sa kaa nihi nɛ a ya bi e juɛmi lo? Anɛ e sa kaa a ya bi ní ngɛ gbogboehi a ngɔ kɛ ha hɛ kali lo? 20 Mohu ɔ, e sa nɛ a ya hla mlaa a kɛ odase ɔ nɛ a ngma a mi!
Ke a tui munyu ngɛ munyu nɛ ɔ nya a, a be la.* 21 Nɛ a ti nɔ fɛɛ nɔ maa gu zugba a nɔ kɛ be kɛ hwɔ kɛ nɔ́ nami; nɛ akɛnɛ hwɔ ngɛ lɛ yee nɛ e mi mi fu he je ɔ, e maa gbiɛ e matsɛ ɔ kɛ e Mawu ɔ be mi nɛ e ngɛ hiɔwe hyɛe. 22 Lɔ ɔ se ɔ, e maa hyɛ zugba, nɛ amanehlu kɛ diblii, je mi nɛ pee tuu kɛ behi nɛ a mi wa, diblii kpii kɛ je mi nɛ tsɔ we pɛ lɛ e maa na.