Hiob
35 Elihu tsa e munyu ɔ nɔ nɛ e de ke:
2 Anɛ o ngɛ nɔ mi mami wawɛɛ kaa o da hluu nɛ o ma de po ke,
‘I da pe Mawu lo’?
3 Ejakaa o deɔ ke, ‘Ke i pee nɔ́ nɛ da a, mɛni lɔ ɔ kɔɔ ngɛ o he?*
Anɛ i ná nɔ́ ko akɛnɛ i pee we yayami ɔ lo?’
4 Ma ha mo heto
Nɛ ma o huɛmɛ ɔmɛ nɛ a piɛɛ o he ɔ hu heto.
5 Mo wo o yi nɔ nɛ o hyɛ hiɔwe,
Moo hyɛ bɔku ɔmɛ nɛ a ngɛ o yi nɔ tsitsaa a.
6 Ke o pee yayami ɔ, anɛ lɔ ɔ yeɔ Mawu awi ngɛ blɔ ko nɔ lo?
Ke o he yayami ɔmɛ hiɛ ɔ, kɛ lɔ ɔ saa e he ha kɛɛ?
7 Ke dalɔ ji mo ɔ, mɛni o haa lɛ;
Mɛni lɛ e náa kɛ jeɔ o dɛ?
8 Ke o pee yayami ɔ, o nyɛmi nɔmlɔ adesa lɛ naa nɔ,
Nɛ ke o peeɔ nɔ́ nɛ da a, nɔmlɔ bi lɛ náa he se.
9 Ke a ngɛ nimli adesahi yi mi wae ɔ, a kpaa ngmlaa kɛ biɔ yemi kɛ buami;
A foɔ ya konɛ a je mɛ kɛ je nihi nɛ a he wa a, a nɔ yemi sisi.*
10 Se nɔ ko bi we ke, ‘Jije Mawu, ye Bɔlɔ* Ngua a,
Nɔ nɛ haa nɛ a laa nyɔ mi ɔ ngɛ?’
11 E tsɔɔ wɔ ní pe lohwe awi yeli nɛ a ngɛ zugba a nɔ ɔ,
Nɛ e haa nɛ wa leɔ ní pe lohwe pɛlitsɛmɛ nɛ a ngɛ hiɔwe ɔ.
12 Nihi kpaa ngmlaa kɛ biɔ yemi kɛ buami, se e pui a nya mi,
Ngɛ yiwutsotsɛmɛ a he nɔ womi ɔ he je.
13 Niinɛ, Mawu bui yaka ngmlaa* tue;
Ope ɔ kɛ e juɛmi yɛ nɔ po.
14 Lɛɛ ke o de ke o nɛ lɛ ɔ, lɔ ɔ lɛɛ e maa bu mo tue lo?
O sane ɔ fɔɔ si ngɛ e hɛ mi, enɛ ɔ he ɔ, moo ya nɔ nɛ o mlɛ lɛ.
15 Ejakaa e kɛ abofu gblɛ o tue;
Nɛ e kɛ e juɛmi mɛ bɔ nɛ o tuɔ munyu basabasa haa nɔ.
16 Hiob bliɔ e nya mi yaka gu;
E tuɔ munyu fuu nɛ́ e li nɔ́ nɛ e ngɛ dee ɔ.