Mika

5 “Oo mo biyo nɛ a tua mo,

Amlɔ nɛ ɔ, o kɛ nɔ́ ngɛ o he pooe;

A sa o yi.

 2 Nɛ mo, Betlehem Efrata,

Mo nɛ́ o klee we kulaa kaa a maa bu mo kɛ piɛɛ Yuda akpehi abɔ* ɔ a he,

O mi lɛ nɔ nɛ maa ye matsɛ ngɛ Israel ha mi ɔ maa je kɛ ba,

E weku kpa ngɛ kɛ je blema tɔɔ, kɛ je blema lokoo.

 3 Lɔ ɔ he ɔ, e ma je mɛ ngɔ ha

Kɛ ya si be nɛ yo ɔ nɛ e nu kɔɔmi ɔ ma fɔ.

 4 E maa te si kɛ da si, nɛ e kɛ Yehowa he wami ɔ maa hyɛ a nɔ,

Ngɛ Yehowa e Mawu ɔ biɛ ngua a mi.

Nɛ a maa hi si slɔkee,

Ejakaa amlɔ nɛ ɔ, e we agboje ɔ maa su zugba a nyagbe he ɔmɛ.

Nɛ ke Asiriabi ɔmɛ ba tua wa zugba a, nɛ a naa wa mɔhi nɛ a fia gbogbo wo a he ɔ nɔ ɔ,

Wa maa hla nɔ hyɛli kpaago, ee, nyumuhi kpaanyɔ nɛ́ a ji ma nikɔtɔmahi.*

 6 A kɛ klaate maa hyɛ Asiriabi ɔmɛ a zugba a,

Kɛ Nimrod zugba a nɔ ngɛ e we agbo ɔ nya.

Nɛ ke Asiria ba tua wa zugba a nɛ e naa nɔ ɔ,

E ma kpɔ̃ wɔ kɛ je e dɛ mi.

 7 Yakob we bi ɔmɛ nɛ a piɛ ɔ maa hi je mahi babauu a kpɛti

Kaa bɔ́ nɛ je Yehowa ngɔ,

Kaa hiɔmi nɛ́ pue ngmɔ níhi a nɔ

Nɛ́ e kɛ e hɛ fɔɛ nɔmlɔ adesa nɔ

Nɛ́ e mlɛ we adesahi a bimɛ hulɔ.

 8 Yakob we bi ɔmɛ nɛ a piɛ ɔ maa hi je ma amɛ a kpɛti,

Ngɛ je mahi babauu a kpɛti,

Kaa jata ngɛ nga mi lohwe awi yeli a kpɛti,

Kaa jata wayoo* ngɛ jijɔhi a kuu a kpɛti,

E guɔ a kpɛti nɛ e tuaa mɛ, nɛ e tsɔtlɔɔ a mi;

Nɛ nɔ ko be nɛ e ma kpɔ̃ mɛ.

 9 O ma wo o nine nɔ ngɛ o he nyɛli ɔmɛ a nɔ,

Nɛ o he nyɛli ɔmɛ a hɛ mi ma kpata.”

10 Yehowa de ke, “jamɛ a ligbi ɔ,

Ma kpata o we okpɔngɔ ɔmɛ a hɛ mi nɛ ma puɛ o ta zugba lɛ ɔmɛ.

11 Ma kpata mahi nɛ a ngɛ o zugba a nɔ ɔ a hɛ mi

Nɛ ma hule o mahi tsuo nɛ a fia gbogbo wo a he ɔ.

12 Ma ha nɛ kunya nɛ o ngɛ tsue ɔ se maa po,*

Nɛ nihi nɛ a tsuɔ kunya a, a kpɛti nɔ ko be piɛe ngɛ o mi.

13 Ma kpata o we amaga amɛ kɛ o titima amɛ a hɛ mi,

Nɛ o be si kplãe kɛ ha o nine nya ní tsumi ɔmɛ hu.

14 Ma hia o wɔ tso* ɔmɛ kɛ je o mi

Nɛ ma kpata o ma amɛ a hɛ mi.

15 I kɛ abofu kɛ mi mi la maa ye lue

Ngɛ mahi nɛ a bui tue ɔ a nɔ.”