Ezekiel

34 Yehowa kɛ mi tu munyu ekohu nɛ e de mi ke: 2 “Nɔmlɔ bi, moo gba kɛ si Israel to hyɛli ɔmɛ. Moo gba, nɛ o de Israel to hyɛli ɔmɛ ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “Musu tloo Israel to hyɛli ɔmɛ, nihi nɛ a ngɛ mɛ nitsɛmɛ a he lɛe ɔ! Anɛ pi to ɔmɛ nɛ e sa kaa to hyɛli ɔmɛ nɛ a lɛ lo? 3 Nyɛ yeɔ to ɔmɛ nɛ a wo zɔ ɔ, nɛ nyɛɛ kɛ a he bwɔmi ɔ peeɔ tade nɛ nyɛ woɔ, nɛ nyɛ gbeɔ ní nɛmɛ nɛ a wo zɔ ɔ, se nyɛ ha we to ɔmɛ niye ní. 4 Ní nɛmɛ nɛ a gbɔjɔ ɔ, nyɛ wui mɛ he wami, nɛ ní nɛmɛ nɛ a be he wami ɔ hu nyɛ tsa we mɛ, nɛ ní nɛmɛ nɛ a plaa a hu nyɛ fĩ we a pa amɛ a nɔ ha we mɛ, nɛ ní nɛmɛ nɛ a tla blɔ ɔ hu nyɛ ya kpale we mɛ kɛ bɛ, nɛ ní nɛmɛ nɛ a laa a hu nyɛ ya hla we mɛ; mohu ɔ, nyɛ hɛɛɔ mɛ basabasa, nɛ nyɛ waa mɛ yi mi. 5 Enɛ ɔ he ɔ, a gbɛ fĩa ejakaa a be nɔ hyɛlɔ; a gbɛ fĩa nɛ a ba plɛ pee niye ní kɛ ha nga mi lohwe awi yeli tsuo. 6 Ye jijɔ ɔmɛ ngɛ kpae ngɛ yoku ɔmɛ tsuo a nɔ, kɛ kponguhi nɛ a ya hiɔwe ɔmɛ hu a nɔ; ye jijɔ ɔmɛ gbɛ fĩa zugba a nɔ tsuo, nɛ nɔ ko nɔ ko hla we a se blɔ nɛ́ e ngɔ mɛ kɛ ba.

7 “‘“Enɛ ɔ he ɔ, nyɛ to hyɛli, nyɛɛ bu Yehowa munyu ɔ tue: 8 ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ, “be abɔ nɛ i ngɛ wami mi nɛ ɔ, akɛnɛ lohwehi nuɔ ye jijɔ ɔmɛ nɛ a yeɔ, nɛ́ a ba pee niye ní kɛ ha nga mi lohwe awi yeli ejakaa a be nɔ hyɛli, nɛ́ ye to hyɛli ɔmɛ hu hla we a se blɔ, mohu ɔ, a yaa nɔ nɛ a lɛɔ mɛ nitsɛmɛ a he, nɛ́ a ha we ye jijɔ ɔmɛ niye ní he je ɔ,”’ 9 nyɛ to hyɛli, nyɛɛ bu nɔ́ nɛ Yehowa ngɛ dee ɔ tue. 10 Nɔ́ nɛ Nyɔmtsɛ Matsɛ Yehowa de ji nɛ ɔ nɛ: ‘I kɛ to hyɛli ɔmɛ ná, nɛ ma ha nɛ a maa bu ye jijɔ ɔmɛ a he akɔtaa,* nɛ i be hae nɛ a ha ye jijɔ ɔmɛ niye ní hu,* nɛ to hyɛli ɔmɛ be mɛ nitsɛmɛ a he lɛe hu. Ma kpɔ̃ ye jijɔ ɔmɛ ngɛ a nya mi, nɛ a be mɛ nae nɛ a maa ye hu.’”

11 “‘Ejakaa nɔ́ nɛ Nyɔmtsɛ Matsɛ Yehowa de ji nɛ ɔ nɛ: “Hyɛ, imi nitsɛ ma hla ye jijɔ ɔmɛ a se blɔ nɛ ma hyɛ a nɔ. 12 Ma hyɛ ye jijɔ ɔmɛ a nɔ kaa to hyɛlɔ nɛ e na e jijɔhi nɛ́ a gbɛ fĩa nɛ́ e ngɛ mɛ niye ní hae. Ma je mɛ kɛ je hehi nɛ a gbɛ fĩa ngɛ ɔ, ngɛ bɔkuhi kɛ diblii kpii ligbi ɔ nɔ. 13 Ma je mɛ kɛ je je ma amɛ a kpɛti nɛ ma bua a nya kɛ je zugba amɛ a nɔ, nɛ ma ngɔ mɛ kɛ ba a zugba a nɔ, nɛ ma ha mɛ niye ní ngɛ Israel yoku ɔmɛ a nɔ, ngɛ pa amɛ a he kɛ a sihi he ɔmɛ ngɛ zugba a nɔ. 14 Ma ha mɛ niye ní ngɛ lohwehi a ní yemi he kpakpa, nɛ Israel yokuhi nɛ ya hiɔwe ɔ a nɔ lɛ a maa ye ní ngɛ. A maa bu si ngɛ lejɛ ɔ, ngɛ ní yemi he kpakpa a, nɛ a maa ye niye ní kpakpa ngɛ Israel yoku ɔmɛ a nɔ.”

15 “‘“Imi nitsɛ ma lɛ ye jijɔ ɔmɛ, nɛ imi nitsɛ ma ha nɛ a bu si,” Nyɔmtsɛ Matsɛ Yehowa lɛ de. 16 “Nɔ́ nɛ laa a, ma ya hla lɛ, nɔ́ nɛ tla blɔ ɔ, ma kpaka lɛ kɛ ba, nɔ́ nɛ plaa a, ma fĩ e pa a nɔ ha lɛ, nɛ nɔ́ nɛ gbɔjɔ ɔ, ma wo lɛ he wami; nɛ ma kpata nɔ́ nɛ wo zɔ kɛ nɔ́ nɛ ngɛ he wami ɔ hɛ mi. E niye ní nɛ ma kɛ ha lɛ ji kojomi.

17 “‘Se nyɛ, ye jijɔhi, nɔ́ nɛ Nyɔmtsɛ Matsɛ Yehowa de ji nɛ ɔ nɛ: “I ma jijɔ kake kɛ jijɔ kpa a kpɛti kojomi, nɛ ma kojo agbosu kɛ akpakpo a kpɛti. 18 Anɛ e hi ha nyɛ kaa nyɛ maa ye ní ngɛ ní yemi he kpakpahi nɛ lɔ ɔ se ɔ, nyɛ maa naa niye ní nɛ piɛ ngɛ nyɛ ní yemi he ɔ nɔ lo? Nɛ ke nyɛ nu nyu nɛ mi tsɔ pe kulaa a ta a, e hi kaa nyɛɛ kɛ nyɛ nane maa naa nɔ́ nɛ piɛ ɔ mi kɛ gbidi lɛ lo? 19 Anɛ e sa nɛ ye jijɔ ɔmɛ nɛ a ye niye ní nɛ nyɛɛ kɛ nyɛ nane naa nɔ, nɛ́ a nu nyu nɛ nyɛɛ kɛ nyɛ nane naa mi nɛ́ e gbidi ɔ lo?”

20 “‘Enɛ ɔ he ɔ, nɔ́ nɛ Nyɔmtsɛ Matsɛ Yehowa de mɛ ji nɛ ɔ nɛ: “Hyɛ, imi nitsɛ ma kojo jijɔ nɛ wo zɔ kɛ jijɔ nɛ ta he lo a kpɛti, 21 ejakaa nyɛ yaa nɔ nɛ nyɛɛ kɛ nyɛ kasa kɛ nyɛ konɔ tsitsɛɛɔ ní nɛmɛ nɛ a be he wami ɔ, nɛ nyɛɛ kɛ nyɛ koli ɔmɛ hu tsitsɛɛɔ mɛ kɛ ya siɔ be nɛ nyɛ gbɛɔ mɛ kɛ fĩaa. 22 Nɛ ma kpɔ̃ ye jijɔ ɔmɛ, nɛ a be niye ní pee kɛ ha lohwe kpahi hu; nɛ ma kojo jijɔ kɛ jijɔ a kpɛti. 23 Ma ngɔ to hyɛlɔ kake kɛ to a nya, lɛ ji ye sɔmɔlɔ David, nɛ e maa lɛ mɛ. Lɛ nitsɛ e maa lɛ mɛ nɛ e maa pee a nɔ hyɛlɔ. 24 Imi Yehowa, ma pee a Mawu, nɛ ye sɔmɔlɔ David maa pee ganɔ ngɛ a kpɛti. Imi Yehowa nitsɛ lɛ i de.

25 “‘“I kɛ mɛ maa so tue mi jɔmi somi, nɛ ma je lohwe awi yeli nɛ a he ngɛ gbeye kɛ je zugba a nɔ, konɛ a hi si slɔkee ngɛ nga a nɔ, nɛ́ a hwɔ mahe ngɛ hue tso ɔ mi. 26 Ma ha nɛ a kɛ hehi nɛ bɔle ye kpongu ɔmɛ ɔ tsuo ma plɛ pee jɔɔmi, nɛ ma ha hiɔmi maa nɛ ngɛ be nɛ sa mi. Ma nɛ jɔɔmi kɛ pue a nɔ kaa hiɔmi. 27 Tsohi nɛ a ngɛ nga a nɔ maa wo yiblii, nɛ zugba a maa ba ní, nɛ a maa hi si slɔkee ngɛ zugba a nɔ. Nɛ ke i ku a kuɛpã tso ɔmɛ, nɛ i kpɔ̃ mɛ kɛ je nihi nɛ a ngɔ mɛ nyɔguɛ ɔ a dɛ mi ɔ, a maa le kaa imi ji Yehowa. 28 A be niye ní pee kɛ ha je ma kpahi hu, nɛ zugba a nɔ lohwe awi yeli be a hɛ mi kpatae, nɛ a maa hi si slɔkee, nɛ nɔ ko be a he gbeye woe.

29 “‘“Ma pee ngmɔ klɛdɛɛ* ko kɛ ha mɛ, nɛ hwɔ be mɛ gbee ngɛ zugba a nɔ hu, nɛ je ma amɛ be a hɛ mi si puee hu. 30 ‘Kɛkɛ ɔ, a ma ná le kaa imi Yehowa a Mawu ɔ, i kɛ mɛ ngɛ, nɛ mɛ Israel we ɔ ji ye ma,’ Nyɔmtsɛ Matsɛ Yehowa lɛ de.”’

31 “‘Se nyɛ, ye jijɔhi, jijɔhi nɛ́ i ngɛ a nɔ hyɛe, adesahi kɛkɛ ji nyɛ, nɛ imi ji nyɛ Mawu,’ Nyɔmtsɛ Matsɛ Yehowa lɛ de.”