Yesaya
52 Oo Zion, O hɛ nɛ tsɛ̃! O hɛ nɛ tsɛ̃! Ngɔɔ he wami kɛ ha o he kaa bo!
Oo Yerusalem, ma klɔuklɔu, wo o tadehi nɛ a ngɛ fɛu ɔ!
Ejakaa mɔmlɔtɔtsɛmɛ kɛ nihi nɛ a he tsɔ we be o mi sɛe hu.
2 Oo Yerusalem, huanya o he bunyuku ɔ kɛ pue si, tee si nɛ o hi si.
Oo Zion biyo nɛ a nu mo, je pã nɛ a kɛ wo o kuɛ ɔ.
3 Ejakaa nɔ́ nɛ Yehowa ngɛ dee ji nɛ ɔ nɛ:
“Tsa pi sika nɛ a kɛ he nyɛ,
Nɛ pi sika nɛ a kɛ ma kpɔ̃ nyɛ.”
4 Ejakaa nɔ́ nɛ Nyɔmtsɛ Matsɛ Yehowa ngɛ dee ji nɛ ɔ nɛ:
“Kekle ɔ, ye we bi ɔmɛ kple kɛ ho Egipt ya nɛ a hi lejɛ ɔ kaa ma se bi;
Nɛ Asiriabi ɔmɛ wa mɛ yi mi yaka gu.”
5 Yehowa ke, “Amlɔ nɛ ɔ, mɛni ma pee ngɛ hiɛ ɔ?
Ejakaa a ngɔ ye ma a kɛ ho yaka gu.
Nihi nɛ a ngɛ a nɔ yee ɔ ya nɔ nɛ a ngɛ a he nɔ woe,” Yehowa lɛ de,
“Nɛ daa ligbi ɔ, a gbeɔ ye biɛ ɔ he guɛ.
6 Lɔ ɔ he je ɔ, ye ma a maa le ye biɛ;
Lɔ ɔ he je ɔ, a maa le ngɛ jamɛ a ligbi ɔ nɔ kaa imi lɛ i ngɛ munyu tue ɔ nɛ.
Hyɛ, imi lɛ i ngɛ munyu tue ɔ nɛ!”
7 Hyɛ bɔ nɛ nɔ nɛ ngɔ sane kpakpa kɛ ma a nanehi a he ngɛ fɛu ngɛ yoku ɔmɛ a nɔ ha,
Nɔ nɛ e ngɛ tue mi jɔmi jajee,
Nɛ́ e ngɔ nɔ́ kpakpa ko he sane kpakpa kɛ ma a,
Nɔ nɛ e ngɛ yi wami hemi jajee,
Nɛ́ e ngɛ Zion dee ke: “O Mawu ɔ ba pee Matsɛ!” ɔ
8 Bu tue! O buli ɔmɛ wo a gbi nɔ.
Mɛ tsuo a pee kake kɛ ngɛ ose hee,
Ejakaa ke Yehowa bua Zion nya kɛ kpale ba a, a maa na paa.*
9 Yerusalem ma nɛ hɛ mi kpata, nyɛ bua nɛ jɔ, nɛ nyɛɛ pee kake kɛ he ose,
Ejakaa Yehowa wo e ma a bua; e kpɔ̃ Yerusalem.
10 Yehowa je e kɔni klɔuklɔu ɔ kpo ngɛ je ma amɛ tsuo a hɛ mi;
Zugba a nyagbe he ɔmɛ tsuo maa na yi wami hemi níhi nɛ wa Mawu ɔ pee ɔ.*
11 Nyɛɛ hɛ nyɛ he, nyɛɛ hɛ nyɛ he, nyɛɛ je lejɛ ɔ, nyɛ ko ta nɔ́ ko nɛ he tsɔ we he!
Nyɛɛ je e mi, nyɛ ha nɛ nyɛ he nɛ tsɔ,
Nyɛ nihi nɛ nyɛ tloo Yehowa we ɔ ní klɔuklɔu ɔmɛ.
12 Ejakaa pi gbeye nɛ nyɛɛ kɛ maa je,
Nɛ nyɛ be fo tue hulɔ,
Ejakaa Yehowa maa nyɛɛ nyɛ hɛ mi kɛ ho,
Nɛ Israel Mawu ɔ maa hi nyɛ se nɛ e maa po nyɛ he piɛ.
13 Hyɛ! Ye sɔmɔlɔ ɔ kɛ hɛ si kami ma tsu ní.
A ma wo e nɔ gojoo,
A ma wo e nɔ nɛ a maa wo e hɛ mi nyami wawɛɛ.
14 Kaa bɔ nɛ nihi fuu hyɛ lɛ nɛ a nya kpɛ a he ɔ
—Ejakaa a puɛ e nɔmlɔ tso su kulaa pe adesa kpahi a nɔ́
Nɛ a puɛ e he fɛu ɔ kulaa pe nimli kpahi a nɔ́—
15 Jã nɛ e ma ha nɛ je mahi fuu a nya maa kpɛ a he.
Matsɛmɛ ma ma a nya* ngɛ e hɛ mi,
Ejakaa a maa na nɔ́ nɛ a de we mɛ ɔ
Nɛ a ma susu nɔ́ nɛ a nui he ɔ he.