Yesaya
13 Munyu nɛ a tu kɛ si Babilon nɛ Amoz binyumu Yesaya na ngɛ nina mi ji nɛ ɔ nɛ:
2 “Nyɛ wo okadi* ko nɔ ngɛ yoku kpataa nɔ.
Nyɛ kpa ngmlaa kɛ tsɛ mɛ, nyɛɛ ngɔ nyɛ nine kɛ pee okadi kɛ tsɛ mɛ,
Konɛ a ba odehe ɔmɛ a we agbo ɔmɛ a nya.
3 I ngɔ fami kɛ ha nihi nɛ i hla a.*
I tsɛ ye tatsɛmɛ ɔmɛ, nɛ ji nihi nɛ a kɛ he nɔ womi nyaa a
Konɛ a ba je ye we abofu ɔ kpo.
4 Nyɛɛ bu tue! Nimli asafo ko ngɛ yoku ɔmɛ a nɔ;
A ngɛ ngmlaa kpae kaa nimli babauu!
Nyɛɛ bu tue! Matsɛ yemi ɔmɛ ngɛ hoo pee,
Je ma amɛ nɛ a bua a he nya a ngɛ hoo pee!
Yehowa tabohiatsɛ ɔ ngɛ tabuli a nya buae kɛ ha ta.
5 A je zugba ko nɔ ngɛ tsitsaa kɛ ma,
A je hiɔwe ɔmɛ a nyagbe he ɔ,
Yehowa kɛ e we abofu ta hwumi ní ɔmɛ ma,
Konɛ a ba kpata zugba a tsuo hɛ mi.
6 Nyɛ fo ya boboobo, ejakaa Yehowa ligbi ɔ su si ta!
E maa ba kaa hɛ mi kpatami nɛ je Ope ɔ ngɔ.
7 Enɛ ɔ he je nɛ ninehi tsuo a mi maa jɔ,
Nɛ gbeye ma ha nɛ adesa fɛɛ adesa tsui maa sile ɔ nɛ.
8 Sawale nu ni ɔmɛ.
A hua, nɛ a pii
Kaa yo nɛ e nu kɔɔmi.
A kɛ gbeye hyɛ a sibi a hɛ mi,
Nɛ haomi ha nɛ a hɛ mi tsu paa.
9 Hyɛ! Yehowa ligbi ɔ ma,
E ma kɛ yi mi wami kɛ abofu kɛ mi mi la tsuo,
Konɛ e ha nɛ zugba a nɛ pee gbeye nɔ́,
Nɛ e kpata zugba a nɔ yayami peeli ɔmɛ a hɛ mi.
11 Ma ha nɛ nihi nɛ a ngɛ zugba a nɔ ɔ maa bu a yayami ɔ he akɔtaa,
Nɛ yiwutsotsɛmɛ hu maa bu a tɔmi ɔ he akɔtaa.
Ma po he nɔ woli a he nɔ womi ɔ se,
Nɛ ma ba yi mi wali a he nɔ womi ɔ si.
12 Ma ha nɛ nimli* a he be hiɛe kulaa, sika tsu nɛ a tsu he maa hiɛ pe mɛ,
Nɛ Ofir sika tsu maa hiɛ pe nimli.
13 Enɛ ɔ he je nɛ ma ha nɛ hiɔwe ɔmɛ ma mimiɛ,
Nɛ zugba a ma hoso, nɛ e maa je e blɔ he,
Ngɛ Yehowa tabohiatsɛ ɔ we abofu ɔ he je, ngɛ e mi mi fumi ligbi ɔ nɔ ɔ nɛ.
14 Nɔ fɛɛ nɔ maa kpale kɛ ho lɛ nitsɛ e we bi a ngɔ ya;
Nɔ fɛɛ nɔ maa tu fo kɛ ho lɛ nitsɛ e zugba nɔ ya,
Kaa odabɔ nɛ ngɛ fo tue kɛ je de dalɔ dɛ mi, kɛ tohi nɛ nɔ ko be nɛ ma bua a nya.
15 Nɔ fɛɛ nɔ nɛ a maa na lɛ ɔ, a kɛ nɔ́ maa gbɔ lɛ,
Nɛ nɔ fɛɛ nɔ nɛ a maa nu lɛ ɔ, e maa nɔ ngɛ klaate nya.
16 A ma tsɔtslɔɔ a bimɛ ɔmɛ a mi ngɛ a hɛ mi,
A maa ha a we ɔmɛ a mi ní,
Nɛ a ma tua a yi ɔmɛ abonua.
17 Hyɛ, i ngɛ Mediabi ɔmɛ tsɔe kɛ wo a he,
Mɛɛ lɛɛ, a bui sika hiɔ kaa nɔ́ ko,
Nɛ a bua jɔɛ sika tsu he.
18 A kɛ̃ɛ̃ ɔmɛ ma tsɔtslɔɔ nihewi a mi;
A mi mi be mɛ sãe ngɛ fɔmi kotoku mi yiblii he,
Nɛ a be jokuɛwi hu mɔbɔ nae.
19 Nɛ Babilon, matsɛ yemi ɔmɛ a kpɛti nɔ́ nɛ hɛ mi ngɛ nyami pe kulaa,*
Kaldeabi ɔmɛ a we afɛu ɔ kɛ nɔ́ nɛ a kɛ woɔ a he nɔ ɔ
Maa pee kaa Sodom kɛ Gomora benɛ Mawu kpata a hɛ mi ɔ.
20 Nɔ ko nɔ ko be e mi hie hu gblegbleegble,
Nɛ e maa pee he ko nɛ nɔ ko be nyɛe maa hi yi nɔhi tsuo.
Arabiano ko be e bo tsu mae ngɛ lejɛ ɔ,
Nɛ to hyɛli hu be hae nɛ a tohi nɛ a jɔɔ a he ngɛ lejɛ ɔ.
21 Nga kplanaa nɔ lohwehi maa bu si ngɛ lejɛ ɔ;
A we ɔmɛ a mi ma hyi tɔ kɛ klomihi.*
Dugumahi maa hi lejɛ ɔ,
Nɛ nga mi apletsihi* maa tuu kɛ ya kɛ ba ngɛ lejɛ ɔ.
22 Lohwehi nɛ a hwɔɔ ma hwɔ wawɛɛ ngɛ e mɔ ɔmɛ a mi,
Nɛ nga mi gbehi ma hwɔ ngɛ e matsɛ wehi nɛ a ngɛ fɛu ɔ mi.
E be su ta, nɛ a be e ligbi ɔmɛ a nɔ fɔe.”