Yesaya
9 Se diblii kpii ɔ be pee kaa be nɛ zugba a na amanehlu ɔ, kaa blema be ɔ mi benɛ a pue Zebulun zugba a kɛ Naftali zugba a hɛ mi si ɔ. Se pee se ɔ, e* ha nɛ a wo e hɛ mi nyami—wo nya blɔ ɔ nɛ ngɛ Yordan kpokpa a nɔ ɔ, je ma amɛ a Galilea a.
2 Nihi nɛ a ngɛ nyɛɛe ngɛ diblii mi ɔ
Na la ngua ko.
Nɛ la kpɛ ha
Nihi nɛ a ngɛ diblii kpii zugba a nɔ ɔ.
3 O ha nɛ nihi nɛ a ngɛ ma a mi ɔ hiɛ babauu;
O ha nɛ e nyami ɔ kle.
A nya ngɛ o hɛ mi
Kaa bɔ nɛ nihi nyaa ngɛ ní kpami be mi ɔ,
Kaa nihi nɛ a kɛ bua jɔmi ngɛ ta yibu ní gbae.
4 Ejakaa o ku kuɛpã tso nɛ a kɛ tlooɔ tlomi ɔ dukuduku,
Tso nɛ ngɛ a konɔ ɔ, nɔ nɛ nyɛɔ a nɔ nɛ́ a tsuɔ ní ɔ dɛma tso ɔ,
Kaa bɔ nɛ e ba ligbi nɛ a kpata Midian hɛ mi ɔ.
5 Tokota fɛɛ tokota nɛ mimiɛɔ zugba ke e ngɛ si sie,
Kɛ tade fɛɛ tade nɛ pɔ tsɔtsɔɔtsɔ kɛ muɔ
Maa pee kaa lɛ ngɛ la mi.
A ma tsɛ lɛ ke Nyakpɛ Ga Wolɔ, Mawu He Walɔ, Neneene Tsɛ, Ganɔ Nɛ E Yi Nɔ Jɔ.
7 E matsɛ yemi* ɔ mi maa hi blie
Nɛ tue mi jɔmi nɛ be nyagbe maa ba,
Ngɛ David matsɛ sɛ ɔ nɔ kɛ e matsɛ yemi ɔ nɔ,
Konɛ e ma si kpɛii, nɛ e hi si daa
Kɛ gu dami sane yemi kɛ dami nɔ,
Kɛ je amlɔ nɛ ɔ kɛ yaa neneene.
Yehowa tabohiatsɛ ɔ maa pee enɛ ɔ kɛ hɛdɔ.
8 Yehowa ngɔ sɛ gbi kɛ ha kɛ bɔ Yakob kɔkɔ,
Nɛ e ba Israel nɔ.
9 Ni ɔmɛ tsuo maa le
Efraim kɛ nihi nɛ a ngɛ Samaria a,
Nihi nɛ a kɛ he nɔ womi kɛ nɔ buimi tsui deɔ ke:
10 “Blikisihi ku pue si,
Se waa kɛ tɛ nɛ a gba maa fia.
A poo sikamore tsohi kɛ pue si,
Se waa kɛ seda tsohi maa da a nane mi ɔ.”
11 Yehowa ma tle Rezin he nyɛli ɔmɛ si kɛ wo e he,
Nɛ e ma ha nɛ e he nyɛli ɔmɛ ma gli,
12 Siria maa je puje he, nɛ Filistibi ɔmɛ maa je pusinɔ he* kɛ ba,
A maa pa a nya mi nɛ a maa mi Israel.
Enɛ ɔmɛ tsuo a he je ɔ, e ngmɛɛ we e mi mi fumi ɔ he,
Mohu ɔ, e kpa e nine mi loloolo konɛ e fia mɛ nɔ́.
13 Ejakaa ni ɔmɛ kpale we kɛ bɛ nɔ nɛ fiaa mɛ nɔ́ ɔ ngɔ;
A hla we Yehowa tabohiatsɛ ɔ se blɔ.
14 Ngɛ ligbi kake mi ɔ, Yehowa maa po
Yi kɛ hlemi, nɔ́ nɛ e tsɛ̃ kɛ go* kɛ je Israel.
15 Nɔkɔtɔma a kɛ nɔ nɛ a buɔ lɛ wawɛɛ ɔ ji yi ɔ nɛ,
Nɛ gbalɔ ɔ nɛ ngɔɔ lakpa blɔ tsɔɔmi kɛ haa a ji hlemi ɔ nɛ.
16 Nimli nɛ ɔmɛ a hɛ mi nyɛɛli ɔmɛ ha nɛ a ngɛ lalaalo woe,
Nɛ nihi nɛ hɛ mi nyɛɛli ɔmɛ ngɛ a hɛ mi nyɛɛe ɔ a juɛmi gbɛ.
17 Enɛ ɔ he je nɛ Yehowa be nyae ngɛ a nihewi ɔmɛ a he,
Nɛ e be a we awusa* amɛ kɛ a yalɔyi ɔmɛ mɔbɔ nae ɔ nɛ,
Ejakaa mɛ tsuo a ji hemi kɛ yemi kuali kɛ yayami peeli,
Nɛ nya fɛɛ nya ngɛ kuasia munyu tue.
Enɛ ɔmɛ tsuo a he je ɔ, e mi mi nɛ fu ɔ se pui,
Mohu ɔ, e kpa e nine mi loloolo konɛ e fia mɛ nɔ́.
18 Ejakaa yiwutso ní peepee tsoɔ kaa la,
E sãã mio tsohi kɛ ngahi.
E maa wo hue tso nɛ mi ti mi la,
Nɛ lasuku tikɔɔ maa ho hiɔwe ya.
19 Ngɛ Yehowa tabohiatsɛ ɔ mi mi fumi ɔ nya a,
A mɛ zugba a he la,*
Nɛ ni ɔmɛ maa pee kaa lɛ ngɛ la a mi.
Nɔ ko nɔ ko be e nyɛmi po yi baae.
20 Nɔ ko maa po niye ní kɛ fɔ si ngɛ hiɔ nɔ,
Se kɛ̃ ɔ, hwɔ maa ye lɛ;
Nɛ nɔ ko maa ye ní ngɛ muɔ nɔ,
Se e be tɔe.
Nɔ fɛɛ nɔ maa ye lɛ nitsɛ e kɔni he lo,
21 Manase maa ye Efraim,
Nɛ Efraim maa ye Manase.
A maa pee kake kɛ wo Yuda he.
Enɛ ɔmɛ tsuo a he je ɔ, e ngmɛɛ we e mi mi fumi ɔ he,
Mohu ɔ, e kpa e nine mi loloolo konɛ e fia mɛ nɔ́.