Yesaya
33 Musu tloo mo, mo nɛ o kpataa mahi a hɛ mi, se moo lɛɛ a kpataa we o hɛ mi ɔ;
Mo nɛ o tsɔɔ nihi a se blɔ, se moo lɛɛ a tsɔɔ we o se blɔ ɔ!
Ke o kpata a hɛ mi ta a, mo hu a ma kpata o hɛ mi.
Ke o tsɔɔ a se blɔ ta a, mo hu a maa tsɔɔ o se blɔ.
2 Ao Yehowa, moo na wɔ mɔbɔ,
Wa ngɔ wa hɛ kɛ fɔ o nɔ.
Mo ba pee wa kɔni* daa mɔtu,
Ee, mo ba pee wa yi wami helɔ ngɛ haomi be mi.
3 Ke ngmlaa pɛ ɔ, nihi tuɔ fo,
Ke o te si ɔ, mahi gbɛɔ kɛ fiaa.
4 Kaa bɔ nɛ baalɛhi nɛ a puɛɔ ní wawɛɛ buaa a he nya a, jã nɛ a ma bua o ta yibu ní ɔ nya;
Nihi ma bu yuu kɛ ba nɔ kaa baalɛhi babauu.
5 A ma wo Yehowa nɔ gojoo,
Ejakaa e ngɛ hiɔwe lokoo.
E ma ha nɛ dami sane yemi kɛ dami ní peemi ma hyi Zion tɔ.
6 Lɛ nɛ e ha nɛ nyɛ ngɛ slɔkee ngɛ nyɛ be ɔ mi.
Yi wami hemi, juɛmi, nile, kɛ Yehowa gbeye yemi babauu
—Enɛ ɔ ji e juetli.
7 Hyɛ, a katsɛmɛ ɔmɛ ngɛ ya foe ngɛ gbɛjegbɛ ɔ nɔ;
Tsɔli nɛ a hɛɛ tue mi jɔmi sɛ gbi ɔ ngɛ ya foe wawɛɛ.
8 A blɔ ngua amɛ a nɔ fɔɔ si gu;
Nɔ ko nɔ ko nyɛɛ we nane blɔ ɔmɛ a nɔ.
9 Zugba a ngɛ aywilɛho yee,* nɛ e gbɔjɔ.
Zo gbe Lebanon; e sa.
Sharon ba pee kaa nga kplanaa,
Nɛ Bashan kɛ Karmel kplɔ a bahi ngɔ pue si.
10 Yehowa ke: “Amlɔ nɛ ɔ, ma te si,
Amlɔ nɛ ɔ, ma wo imi nitsɛ ye nɔ gojoo;
Amlɔ nɛ ɔ, ma wo imi nitsɛ ye hɛ mi nyami.
11 Nyɛ ngɔɔ nga gbigbli hɔ, nɛ nyɛ fɔɔ nga.*
Nyɛ nitsɛmɛ nyɛ mumi ɔ maa sã nyɛ kaa la.
12 Nɛ nyɛ maa pee kaa kalo nɛ a sã.
A maa mɛ a he la kaa miohi nɛ a poo kɛ pue si.
13 Nyɛ nihi nɛ nyɛ ngɛ tsitsaa, nyɛɛ bu nɔ́ nɛ ma pee ɔ tue!
Nɛ nyɛ nɛ nyɛɛ kɛ ye he kɛ we, nyɛɛ to ye he wami ɔ he hɛ!
14 Yayami peeli nɛ a ngɛ Zion ɔ ngɛ gbeye yee;
Sawale nu hemi kɛ yemi kuali ɔmɛ:
‘Wa ti mɛnɔ lɛ e ma nyɛ maa hi he nɛ la nɛ kpataa nɔ́ hɛ mi ngɛ?
‘Wa ti mɛnɔ lɛ e kɛ la nɛ hí gbemi ma nyɛ maa hi si?’
15 Nɔ nɛ e yaa nɔ nɛ e nyɛɛɔ ngɛ dami mi,
Nɛ e tuɔ anɔkuale,
Nɔ nɛ e sume ojo fiami, kɛ níhi nɛ a gu sisimi blɔ nɔ kɛ ná,
Nɛ e nine kuaa nyɔ mi ní mohu pe nɛ e maa ngɔ,
Nɛ e tsiɔ e tue ke a ngɛ muɔ si puemi he munyu tue,
Nɛ e maa e hɛngmɛ konɛ e ko na nɔ́ yayami ɔ
16 —Lɛ nɛ e maa hi yoku ɔmɛ a yi mi ploplooplo;
Nɛ tɛsahi nɛ he nɛ a ngɛ ɔ yami yee ɔ maa pee e wesa he nɛ ngɛ slɔkee,
A ma ha lɛ niye ní,*
Nɛ e nyu be tae gblegbleegble.”
17 Nɛ o hɛngmɛ maa na matsɛ ko ngɛ e hɛ mi nyami mi;
A maa na zugba ko ngɛ tsitsaa lokoo.
18 O ma kai gbeye nɔ́ nɛ ba a ngɛ o tsui mi,* nɛ o ma bi o he ke:
“Jije womi ngmalɔ ɔ ngɛ?
Jije nɔ nɛ e ngmɛ tó ɔ ngɛ?
Jije nɔ nɛ e kane mɔ ɔmɛ ɔ ngɛ?”
19 O be ma nɛ bui nɔ ɔ nae hu,
Ma nɛ e he wa wawɛɛ kaa o maa nu a gbi sisi,*
Ma nɛ ke a ngɛ munyu tue ɔ, o be sisi nue, ejakaa e ngɛ kaa nɔ́ nɛ a ngɛ bubue ɔ.
20 Hyɛ Zion, wa gbijlɔ ma a!
O hɛngmɛ maa na Yerusalem, laami he nɛ́ tue mi jɔmi ngɛ ɔ,
Bo tsu nɛ a be jee ngɛ he nɛ e ngɛ ɔ.
A be bo tsu ɔ plɛɛko ɔmɛ hiae gblegbleegble,
Nɛ a be e kpa amɛ ekoeko mi tsɔe.
21 Se Yehowa nɛ ji Mawu kpetekpleenyɛ ɔ
Maa po wa he piɛ ngɛ lejɛ ɔ kaa bɔ nɛ pa loo pa ngua poɔ ma ko he piɛɔ,
He nɛ ta lɛhi babauu be nyɛe maa be ngɛ,
Nɛ mele nguahi be nyɛe ma be ngɛ lejɛ ɔ.
22 Ejakaa Yehowa ji wa Kojolɔ,
Yehowa ji wa Mlaa Wolɔ,
Yehowa ji wa Matsɛ;
Lɛ ji nɔ nɛ e ma he wa yi wami.
23 O kpa amɛ a mi maa jɔ;
A be nyɛe maa hɛɛ abalaa tso ɔmɛ, nɛ a be nyɛe ma bli abalaa amɛ a mi.
Jamɛ a be ɔ, a ma gba ta yibu ní babauu;
Glɔtsɛmɛ po maa muɔɔ babauu.
24 Nɛ ma a mi nɔ ko nɔ ko be dee ke: “I be he wami.”
A kɛ nihi nɛ a ngɛ zugba a nɔ ɔ a tɔmihi maa ke mɛ.