Yesaya
56 Nɔ́ nɛ Yehowa ngɛ dee ji nɛ ɔ nɛ:
“Nyɛɛ ye dami sane, nɛ nyɛɛ pee nɔ́ nɛ da,
Ejakaa e be kɛe nɛ ye yi wami hemi ɔ maa ba
Nɛ́ ma je ye dami ɔ kpo.
2 Nɔ nɛ peeɔ ní nɛ ɔmɛ,
Kɛ adesa nɛ e pɛtɛɔ he wawɛɛ,
Nɛ e yeɔ He Jɔɔmi Ligbi ɔ nɛ e ble we lɛ
Nɛ e jeɔ e nine kɛ jeɔ yiwutso níhi tsuo a mi ɔ ngɛ bua jɔmi.
3 Ma se no nɛ e ngɔ e he kɛ ba mɛtɛ Yehowa he ɔ nɛ e ko de ke,
‘Yehowa ma je mi kɛ je e we bi ɔmɛ a kpɛti kokooko.’
Nɛ nɔ nɛ a puɛ lɛ* nɛ e ko de ke, ‘Hyɛ! Tso gbigbli ji mi.’”
4 Ejakaa nɔ́ nɛ Yehowa ngɛ nihi nɛ a puɛ mɛ nɛ a yeɔ he jɔɔmi ligbi ɔ, nɛ a hla kaa a maa pee nɔ́ nɛ ye bua jɔ he nɛ a maa pɛtɛ ye somi ɔ he kpɛii ɔ dee ji nɛ ɔ nɛ:
5 “Ma ha mɛ kaimi nɔ́ kɛ biɛ ngɛ ye we ɔ kɛ ye gbogbo ɔmɛ a mi,
Nɔ́ ko nɛ hi pe binyumuhi kɛ biyihi.
Ma ha mɛ biɛ nɛ ngɛ kɛ yaa neneene,
Biɛ nɛ be laae gblee.
6 Ma se bi nɛ a ba mɛtɛ Yehowa he kaa a ma sɔmɔ lɛ,
Nɛ a maa suɔ Yehowa biɛ ɔ,
Nɛ a maa pee e sɔmɔli,
Nihi tsuo nɛ a yeɔ He Jɔɔmi Ligbi ɔ, nɛ a ble we lɛ,
Nɛ a pɛtɛ ye somi ɔ he wawɛɛ ɔ,
7 Ma ngɔ mɛ kɛ ba ye yoku klɔuklɔu ɔ nɔ
Nɛ ma ha nɛ a ma nya ngɛ ye sɔlemi we ɔ.
Ma kplɛɛ a sami afɔle ɔmɛ tsuo kɛ afɔlehi nɛ a sãã ngɛ ye we afɔle sami latɛ ɔ nɔ ɔ a nɔ.
Ejakaa a ma tsɛ ye we ɔ ke he nɛ je ma amɛ tsuo ma ba sɔle ngɛ.”*
8 Nyɔmtsɛ Matsɛ Yehowa, nɔ nɛ e ngɛ Israelbi nɛ a gbɛ fia a nya buae ɔ ngɛ dee ke:
“Ma bua ni kpahi a nya kɛ ba piɛɛ nihi nɛ a bua a nya momo ɔ a he.”
9 Nyɛ nga mi lohwehi tsuo, nyɛ hue tso mi lohwehi tsuo,
Nyɛɛ ba nɛ nyɛ ba ye ní.
10 E buli ɔmɛ a hɛngmɛ yu, a ti nɔ ko nɔ ko nɛ nɔ́ nɛ maa ba.
Mɛ tsuo a ngɛ kaa gbe mumuihi, a nyɛ we hwɔmi.
A buu si, a ngɛ mumu woe falifali; a suɔ mahe hwɔmi.
11 A ji gbehi nɛ a yeɔ ní wawɛɛ;
A tɔɛ gblee.
A ji nɔ hyɛli nɛ a nui nɔ́ sisi.
Nɔ fɛɛ nɔ wo lɛ nitsɛ e blɔ;
A ti nɔ fɛɛ nɔ guɔ sisimi blɔ nɔ kɛ náa e he, nɛ a deɔ ke:
12 “Nyɛɛ ba nɛ waa nu wai bɔ ɔ,
Nɛ́ waa nu dã bɔ nɛ wa ma nyɛ.
Hwɔɔ maa pee kaa mwɔnɛ ɔ, e ma pã mwɔnɛ ɔ po!”