2 Mose

23 “Koo gbɛ lakpa munyu kɛ fĩa. Koo piɛɛ yiwutsotsɛ he kɛ ye lakpa odase kɛ gbe nɔ he guɛ. 2 Koo nyɛɛ nihi fuu a se kɛ pee yayami, nɛ koo piɛɛ nihi fuu a he kɛ ye lakpa odase* kɛ plɛ dami sane hɛ mi kɛ bu si. 3 Ke ohiatsɛ kɛ nɔ ko ná sane ɔ, koo ye sane ɔ ha ohiatsɛ ɔ akɛnɛ e ji ohiatsɛ ɔ he je.

4 “Ke o na o he nyɛlɔ na loo teji nɛ e laa a, mo kpaka lɛ kɛ ya ha lɛ. 5 Ke o na o he nyɛlɔ teji nɛ e tlɔ zugba kɛ e se mi tlomi ɔ, koo be e he nɛ o ho. Moo ye bua lɛ nɛ e wo lohwe ɔ nɔ.

6 “Ke a ngɛ ohiatsɛ nɛ ngɛ nyɛ kpɛti ɔ sane yee ɔ, ko plɛ e sane ɔ hɛ mi kɛ bu si.

7 “Moo yu o he kɛ je munyu nɛ a poɔ kɛ fɔɔ nɔ nɔ ɔ* he kulaa, nɛ koo gbe dalɔ, kɛ nɔ nɛ e yi fɔ, ejakaa i be yiwutsotsɛ nguɔ woe.

8 “Ko he nyɔ mi ní, ejakaa nyɔ mi ní hemi yuɔ nɔ nɛ hyɛɛ nɔ́ saminya po hɛngmɛ, nɛ e ma nyɛ ma ha nɛ dalɔ nɛ e tsake e nya.

9 “Koo wa ma se no yi mi. Nyɛ le bɔ nɛ ma se si himi ngɛ ha, ejakaa nyɛ hu nyɛ ya to nubwɔ ngɛ Egipt zugba a nɔ hyɛ.

10 “Mo du ní, nɛ o bua ngmɔ ní ɔ nya ngɛ o zugba a nɔ jeha ekpa. 11 Se ngɛ jeha kpaagone ɔ mi ɔ, ko du ní ngɛ nɔ. Ha nɛ e fɔ si gu, konɛ ohiatsɛmɛ nɛ a ngɛ nyɛ kpɛti ɔ nɛ a ya kpɛte e mi ní nɛ a ye, konɛ nɔ́ nɛ maa piɛ ɔ, pu mi lohwehi hu nɛ a ye. Bɔ nɛ nyɛɛ pee nyɛ wai ngmɔ ɔmɛ kɛ oliv ngmɔ ɔmɛ ha ji nɛ ɔ nɛ.

12 “Mo tsu ní ligbi ekpa; se ngɛ ligbi kpaagone ɔ nɔ ɔ, ko tsu ní, bɔ nɛ pee nɛ o na kɛ o teji ɔ nɛ a jɔɔ a he, nɛ o mawayo ɔ bi kɛ nubwɔ hu nɛ a jɔɔ a he.

13 “Nyɛɛ hyɛ saminya nɛ nyɛɛ pee níhi tsuo nɛ i de nyɛ ɔ. Nyɛ ko tsɛ mawu kpahi a biɛ; a ko nu a biɛ tete po ngɛ nyɛ nya.

14 “Daa jeha a, nyɛɛ ye gbijlɔ si etɛ ha mi. 15 Nyɛɛ ye Abolo Nɛ Masa Be Mi Gbijlɔ ɔ. Nyɛɛ ye abolo nɛ masa be mi ligbi kpaago ngɛ Abib* nyɔhiɔ ɔ mi kaa bɔ nɛ i fã nyɛ ɔ. Nyɛɛ ye ngɛ be nɛ i to ɔ mi, ejakaa jamɛ a be ɔ nɛ nyɛ je Egipt. Nɔ ko nɔ ko nɛ ko ba ye hɛ mi kɛ e dɛ gu. 16 Jehanɛ ɔ, nyɛɛ ye Nikpami Gbijlɔ* ɔ, nyɛɛ ye ke nyɛ kpa nyɛ ngmɔ ɔmɛ a nɔ kekleekle yiblii ɔ; kɛ Níhi A Nya Buami Gbijlɔ* ɔ hulɔ ngɛ jeha a nyagbe. Nyɛɛ pee enɛ ɔ be mi nɛ nyɛ bua níhi nɛ nyɛ gbo dengme kɛ ná kɛ je nyɛ ngmɔ ɔmɛ a nɔ ɔ nya a. 17 Daa jeha a, nyumuhi nɛ a ngɛ nyɛ kpɛti ɔ tsuo nɛ́ a ba anɔkuale Nyɔmtsɛ Yehowa hɛ mi si etɛ.

18 Koo ngɔ nɔ́ ko nɛ masa ngɛ mi kɛ piɛɛ muɔ nɛ o kɛ maa sã afɔle ha mi ɔ he. Jehanɛ hu ɔ, zɔ nɛ nyɛɛ kɛ sãã afɔle ha mi ngɛ gbijlɔ yemi behi a mi ɔ, je nɛ ko na yi.

19 “Ngɔɔ kekleekle yiblii nɛ hi pe kulaa nɛ o ná kɛ je o ngmɔ ɔ mi ɔ kɛ ba Yehowa, o Mawu ɔ we ɔ.

“Koo ngɔ apletsi nyɛ nyɔ nyu kɛ hoo e bi.

20 “I ngɛ bɔfo ko tsɔe kɛ sɛ o hlami, nɛ́ e bu o he ngɛ blɔ ɔ nɔ, nɛ́ e ngɔ mo kɛ ya he nɛ i dla kɛ to ɔ. 21 Bu lɛ tue, nɛ o pee nɔ́ nɛ e ma de mo ɔ. Ko tsɔ atuã kɛ si lɛ. Ejakaa e kɛ o tɔmi ɔmɛ be mo kee akɛnɛ ye biɛ ngɛ e nɔ* ɔ he je. 22 Se ke o bu e gbi tue nɛ o pee nɔ́ fɛɛ nɔ́ nɛ ma de mo ɔ, i kɛ o he nyɛli ɔmɛ maa to ní, nɛ ma te si kɛ wo ni nɛmɛ nɛ a teɔ si kɛ woɔ mo ɔ. 23 Ejakaa ye bɔfo ɔ maa sɛ o hlami nɛ e maa ngɔ mo kɛ ya he nɛ Amor bi, Hit bi, Periz bi, Kanaan bi, Hiv bi, kɛ Yebus bi ɔmɛ ngɛ ɔ, nɛ ma kpata a hɛ mi. 24 Ko kplã si ha a mawu ɔmɛ, nɛ ko ha nɛ a plɛ o yi mi nɛ o sɔmɔ mɛ, nɛ koo kase a kusumi ɔmɛ. Mohu ɔ, mo kpata a hɛ mi nɛ o ku a wɔ titima amɛ kɛ pue si. 25 Nyɛ sɔmɔ Yehowa, nyɛ Mawu ɔ, nɛ e maa jɔɔ nyɛ niye ní kɛ nyɛ nyu nɔ. Ma je hiɔ kɛ je nyɛ kpɛti. 26 Yo ko mi be sanee ngɛ nyɛ zugba a nɔ, nɛ a be yosa ko hu nae ngɛ nyɛ kpɛti, nɛ ma ha nɛ nyɛ wami se maa kɛ.

27 “Ma ha nɛ ye he gbeye maa nu mɛ loko nyɛ maa su lejɛ ɔ, nɛ ma ha nɛ basabasa maa te si ngɛ mahi tsuo nɛ nyɛɛ kɛ maa kpe ɔ a kpɛti, nɛ ma ha nɛ nyɛ maa ye nyɛ he nyɛli ɔmɛ tsuo a nɔ kunimi, nɛ a maa tu nyɛ nya fo.* 28 Ma ha nɛ a maa ye gbeye* loko nyɛ maa su lejɛ ɔ, nɛ lɔ ɔ ma ha nɛ Hiv bi, Kanaan bi, kɛ Hit bi ɔmɛ maa tu nyɛ nya fo. 29 I be mɛ fiee kɛ je nyɛ hɛ mi ngɛ jeha kake mi, bɔ nɛ pee nɛ zugba a nɛ ko fɔ si gu, nɛ lohwe awi yeli a he ko ba hiɛ kɛ wo nyɛ. 30 Ma fiee mɛ kɛ je nyɛ hɛ mi bɔɔbɔɔbɔɔ kɛ ya si be nɛ nyɛ maa ngɔ zugba a.

31 “Ma ha nɛ nyɛ huzu ɔ maa je Wo Tsu ɔ he kɛ ya si Filisti bi ɔmɛ a wo ɔ he, kɛ je nga kplanaa a nɔ kɛ ya pi Pa a;* ejakaa ma ngɔ zugba a nɔ bi ɔmɛ kɛ wo nyɛ dɛ, nɛ nyɛ maa fiee mɛ kɛ je nyɛ hɛ mi. 32 Nyɛɛ kɛ mɛ aloo a mawu ɔmɛ nɛ ko so. 33 A ko hi nyɛ zugba a nɔ bɔ nɛ pee nɛ a ko ba ha nɛ nyɛɛ pee yayami kɛ si mi. Ke nyɛ sɔmɔ a mawu ɔmɛ ɔ, bɔ fɛɛ bɔ nɛ ji ɔ, e maa pee klama ha nyɛ.”