2 Samuel

11 Jeha a sisije* be mi nɛ matsɛmɛ gbaa ta a, David tsɔ Yoab kɛ e sɔmɔli ɔmɛ kɛ Israel tabo ɔ tsuo konɛ a ya kpata Amon bi ɔmɛ a hɛ mi. A ya nɛ a ya sa Raba yi, be mi nɛ David lɛɛ e ngɛ Yerusalem.

2 Ligbi ko gbɔkuɛ nya si ɔ, David te si ngɛ e sa mi nɛ e ya slaa si ngɛ tsu ɔ yi mi ngɛ matsɛ we ɔ mi. Benɛ e ngɛ tsu ɔ yi mi ɔ, e na yo ko nɛ e ngɛ due, nɛ yo ɔ he ngɛ fɛu saminya. 3 David tsɔ nɔ ko kɛ ya bi yo ɔ he sane, nɛ nɔ ɔ ba bɔ amaniɛ ke: “Lɛ ji Eliam biyo Batsheba, nɛ ji Uria, Hit no ɔ yo ɔ nɛ.” 4 Kɛkɛ nɛ David tsɔ tsɔli konɛ a ya ngɔ lɛ kɛ ba. Enɛ ɔ he ɔ, e ba David ngɔ nɛ David kɛ lɛ ná bɔmi. (Nɔ́ nɛ ɔ ya nɔ benɛ Batsheba he tsɔ we* nɛ e ngɛ e he tsue ɔ.) Lɔ ɔ se ɔ, e kpale kɛ ho e we ɔ mi ya.

5 Yo ɔ ngɔ hɔ, nɛ e tsɔ tsɔli kɛ ya de David ke: “I ngɔ hɔ.” 6 Kɛkɛ nɛ David tsɔ tsɔli kɛ ya de Yoab ke: “Wo Uria, Hit no ɔ blɔ kɛ ba ye ngɔ.” Enɛ ɔ he ɔ, Yoab wo Uria blɔ kɛ ho David ngɔ ya. 7 Benɛ Uria ba David ngɔ ɔ, e bi lɛ bɔ nɛ Yoab he mi ngɛ ha, bɔ nɛ ta buli ɔmɛ ngɛ ha, kɛ bɔ nɛ ta a ngɛ nɔ yae ha. 8 Kɛkɛ nɛ David de Uria ke: “Kple kɛ ya o we ɔ mi nɛ o ya jɔɔ o he.”* Benɛ Uria je matsɛ we ɔ mi kɛ ho ɔ, a kɛ matsɛ ɔ nike ní* nyɛɛ e se. 9 Se Uria kɛ e nyɔmtsɛ ɔ sɔmɔli kpa amɛ tsuo hwɔ matsɛ we ɔ agbo ɔ nya, nɛ e kple we kɛ yɛ lɛ nitsɛ e we ɔ mi. 10 Lɔ ɔ he ɔ, a de David ke: “Uria kple we kɛ yɛ lɛ nitsɛ e we ɔ mi.” Kɛkɛ nɛ David bi Uria ke: “Pi piɔ pɛ nɛ o je blɔ hiami mi kɛ ba lo? Mɛni he je nɛ o kple we kɛ yɛ mo nitsɛ o we ɔ mi ɔ?” 11 Uria ha David heto ke: “Daka a kɛ Israel kɛ Yuda ngɛ bo tsuhi a mi, nɛ ye nyɔmtsɛ Yoab kɛ ye nyɔmtsɛ ɔ sɔmɔli ɔmɛ ngɛ nga a nɔ. Anɛ e sa nɛ imi lɛɛ ma ya ye we mi nɛ ma ya ye ní nɛ ma nu ní nɛ i kɛ ye yo nɛ ya hwɔ si lo? Be abɔ nɛ o ngɛ nɛ o* hɛ ngɛ nɛ ɔ, i be nɔ́ ko kaa jã pee!”

12 Kɛkɛ nɛ David de Uria ke: “Moo hi hiɛ ɔ mwɔnɛ ɔ hulɔ, konɛ ma wo mo blɔ kɛ ho hwɔɔ.” Lɔ ɔ he ɔ, Uria hi Yerusalem jamɛ a ligbi ɔ kɛ ligbi nɛ nyɛɛ se ɔ. 13 Lɔ ɔ se ɔ, David tsɔ nɛ a ya tsɛ lɛ kɛ ba, nɛ e kɛ lɛ ba ye ní nɛ a nu ní, nɛ e ha nɛ e de dã. Se gbɔkuɛ ɔ, Uria je kpo nɛ e ya hwɔ e sa a nɔ ngɛ e nyɔmtsɛ ɔ sɔmɔli ɔmɛ a ngɔ, nɛ e kple we kɛ yɛ e we ɔ mi. 14 Mɔtu ɔ, David ngma Yoab sɛ womi, nɛ e kɛ wo Uria dɛ konɛ e kɛ ya ha lɛ. 15 E ngma ngɛ sɛ womi ɔ mi ke: “Ngɔɔ Uria kɛ da ta a nya ngɛ he nɛ ta a mi wa pe kulaa ngɛ ɔ. Lɔ ɔ se ɔ, nyɛɛ gbla nyɛ he si kɛ je e he, konɛ a fia lɛ nɔ́ nɛ e gbo.”

16 Jamɛ a be ɔ, Yoab kpa ma a si saminya, nɛ e ngɔ Uria kɛ ya da he nɛ e le kaa ta buli nɛ a he wa ngɛ ɔ. 17 Benɛ nyumu ɔmɛ je ma a mi kɛ ba nɛ a kɛ Yoab ba hwu ta a, David sɔmɔli ɔmɛ ekomɛ gbo, nɛ Uria, Hit no ɔ hu piɛɛ ni nɛmɛ nɛ a gbo ɔ he. 18 Jehanɛ ɔ, Yoab tsɔ nɛ a ya bɔ David níhi tsuo nɛ ya nɔ ngɛ ta a mi. 19 E de tsɔlɔ ɔ ke: “Ke o bɔ matsɛ ɔ níhi tsuo nɛ ya nɔ ngɛ ta a mi ta a, 20 eko ɔ, matsɛ ɔ mi mi ma fu nɛ e ma bi mo ke, ‘Mɛni he je nɛ nyɛ ya su ma a he haa kɛ hwu ta a? Anɛ nyɛ li kaa a ma nyɛ ma tsɛ̃ nyɛ kɛ̃ɛ̃ kɛ je gbogbo ɔ yi mi lo? 21 Mɛnɔ gbe Abimelek, Yerubeshet binyumu ɔ? Anɛ pi yo ko nɛ e ngmɛɛ wɛ tɛ mi bi he kɛ je gbogbo ɔ yi mi kɛ ba nɔ e nɔ, nɛ e gbo ngɛ Tebez lo? Mɛni he je nɛ nyɛ ya su gbogbo ɔ he haa a?’ Kɛkɛ ɔ, o de lɛ ke, ‘O sɔmɔlɔ Uria, Hit no ɔ hu gbo.’”

22 Lɔ ɔ he ɔ, tsɔlɔ ɔ ya nɛ e ya de David nɔ́ fɛɛ nɔ́ nɛ Yoab de lɛ ke e ya de ɔ. 23 Kɛkɛ nɛ tsɔlɔ ɔ de David ke: “A nyumu ɔmɛ a he wa pe wɔ, lɔ ɔ he ɔ, a je kpo kɛ ba tua wɔ ngɛ nga a nɔ; se wa kpale fiee mɛ kɛ ho ma a agbo ɔ nya ya. 24 Nɛ kɛ̃ɛ̃ tsɛ̃li ɔmɛ tsɛ̃ a kɛ̃ɛ̃ ɔmɛ kɛ ba ná o sɔmɔli ɔmɛ kɛ je gbogbo ɔ yi mi, nɛ matsɛ ɔ sɔmɔli ɔmɛ ekomɛ gbo; o sɔmɔlɔ Uria, Hit no ɔ hu gbo.” 25 Kɛkɛ nɛ David de tsɔlɔ ɔ ke: “Mo ya de Yoab ke: ‘Ko ha nɛ sane nɛ ɔ nɛ gba o nya, ejakaa klaate hlɛ nɔ mi nɛ e gbeɔ. De lɛ ke e ngɔ e he wami tsuo kɛ tua ma a nɛ́ e ye nɔ kunimi.’ Nɛ o wo lɛ he wami.”

26 Benɛ Uria yo ɔ nu kaa e huno Uria gbo ɔ, e bɔni e huno ɔ he ya fomi. 27 Benɛ yo ɔ fo e huno ɔ he ya ta pɛ ɔ, David tsɔ nɛ a ya tsɛ lɛ nɛ a ngɔ lɛ kɛ ba e we ɔ mi, nɛ e ba pee e yo nɛ e fɔ binyumu ha lɛ. Se nɔ́ nɛ David pee ɔ hí kulaa ngɛ Yehowa hɛ mi.