La
David la. Maskil.*
32 Nɔ nɛ a ngɔ e tɔmi kɛ e he yayami ke lɛ ɔ ngɛ bua jɔmi.
2 Nɔ nɛ Yehowa bui lɛ fɔ,
Nɛ lakpa be e mi ɔ ngɛ bua jɔmi.
3 Benɛ i laa ye yayami ɔmɛ a nɔ nɛ i jaje we ɔ, kɛmɛmi nɛ i hii kɛmɛe daa ligbi ɔ ha nɛ i gbɔjɔ.
4 Ejakaa nyɔ kɛ pia a, o nine* jiɔ ngɛ ye nɔ.
Ye he wami ta kaa bɔ nɛ mawulɛ be mi kɔɔhiɔ nɛ mi dɔ la haa nɛ nyu taa pa mi ɔ. (Sela)
5 Nyagbenyagbe ɔ, i jaje ye yayami ɔ kɛ tsɔɔ mo;
I laa we ye tɔmi ɔ nɔ.
I de ke: “Ma jaje ye tɔmi ɔmɛ kɛ tsɔɔ Yehowa.”
Nɛ o ngɔ ye tɔmi ɔ kɛ ye yayami ɔmɛ kɛ ke mi. (Sela)
6 Enɛ ɔ he je nɛ nɔ fɛɛ nɔ nɛ yeɔ mo anɔkuale ɔ maa sɔle kɛ ha mo
Be mi nɛ he blɔ ngɛ kaa a maa ba o hɛ mi ɔ nɛ.
Kɛkɛ ɔ, ke nyu ywia nga po, e be e he sue.
7 O ji laami he kɛ ha mi;
O maa po ye he piɛ ngɛ haomi he.
O ma ha nɛ yi wami hemi ngmlaa maa bɔle mi kɛ kpe. (Sela)
8 O de ke: “Ma ha nɛ o ma kɔ nɔ́ se, nɛ ma tsɔɔ mo blɔ nɛ o gu nɔ.
Ma wo mo ga, nɛ ye hɛngmɛ maa hi o he.
9 Koo pee kaa okpɔngɔ aloo teji okpɔngɔ nɛ e nui nɔ sisi,
Nɛ́ ke e hɛ mi pee klamaklama a, ja a wo e nya mi kpa aloo a bɔ lɛ pã kɛ kudɔ lɛ
Loko e maa su nɔ he ɔ.”
10 Yiwutsotsɛ nɔ́ nami hiɛ babauu;
Se nɔ nɛ ngɔɔ e hɛ kɛ fɔɔ Yehowa nɔ ɔ, Mawu suɔmi nɛ se pui ɔ bɔle lɛ kɛ kpe.
11 Nyɛ nihi nɛ nyɛ peeɔ nɔ́ nɛ da, nyɛ nya ngɛ Yehowa mi, nɛ́ nyɛ bua nɛ jɔ;
Nyɛ nihi tsuo nɛ nyɛ da ngɛ nyɛ tsui mi, nyɛ he ose.