Yohane Sane Kpakpa a
21 Ngɛ enɛ ɔ se ɔ, Yesu kpale je e he kpo kɛ tsɔɔ kaseli ɔmɛ ngɛ Tiberia Wo ɔ nya. Blɔ nɔ nɛ e gu kɛ je e he kpo kɛ tsɔɔ mɛ ɔ ji nɛ ɔ nɛ. 2 Simon Petro, Toma (nɔ nɛ a tsɛɔ lɛ ke Hayo ɔ), Natanael nɛ e je Kana ngɛ Galilea a, Zebedeo binyumu ɔmɛ, kɛ kaseli kpahi enyɔ bua a he nya ngɛ he kake. 3 Simon Petro de mɛ ke: “I yaa wo.” A de lɛ ke: “Waa kɛ mo maa ya.” A je kpo nɛ a ya sɛ lɛ mi, se jamɛ a nyɔ ɔ mi ɔ, a gbi lo kake ngmelu po.
4 Se benɛ je mi ngɛ tsɔe ɔ, Yesu ba da si ngɛ wo ɔ nya, se kaseli ɔmɛ li kaa Yesu. 5 Kɛkɛ nɛ Yesu de mɛ ke: “Ye bimɛ, tse nyɛ be nɔ́* ko nɛ nyɛ maa ye, aloo nyɛ ngɛ nɔ́ ko?” A ha lɛ heto ke: “Dɛbi, wa be nɔ́ ko!” 6 E de mɛ ke: “Nyɛ pue ya a ngɛ lɛ ɔ hiɔ nɔ je nɛ nyɛ maa gbe eko.” Lɔ ɔ he ɔ, a pue ya a, se a nyɛ we nɛ a gbla, ejakaa a gbe lo babauu nitsɛ. 7 Kɛkɛ nɛ kaselɔ ɔ nɛ Yesu suɔ e sane ɔ de Petro ke: “Nyɔmtsɛ ɔ lɛ daa si ɔ nɛ!” Benɛ Simon Petro nu kaa Nyɔmtsɛ ɔ lɛ e daa si ɔ, e wo tade nɛ e woɔ ngɛ e tade ɔ nɔ ɔ,* ejakaa jinɛ e hɛɛ e he gu,* kɛkɛ nɛ e tu kɛ sɛ wo ɔ mi. 8 Se kaseli kpa amɛ hi lɛ nyafii ɔ mi kɛ ba, nɛ a ngɛ ya a nɛ lo hyi lɛ tɔtɔɔtɔ ɔ gblae, ejakaa a kɛ kpo he kɛ we. A kɛ kpo he kɛmi maa pee nanewɛɛ 300* pɛ.
9 Benɛ a ba su wo ɔ nya a, a na la nɛ a kɛ hã slɛ kɛ e nɔ lo kɛ abolo. 10 Yesu de mɛ ke: “Nyɛɛ ngɔ lo ɔ nɛ nyɛ gbe piɔ ɔ eko kɛ ba.” 11 Lɔ ɔ he ɔ, Simon Petro ya sɛ lɛ ɔ mi nɛ e ya gbla ya a nɛ lo nguanguahi hyi lɛ tɔtɔɔtɔ ɔ kɛ ba wo ɔ nya, lo 153 lɛ ngɛ mi. E ngɛ mi kaa lo ɔ hiɛ mohu lɛɛ, se ya a gba we. 12 Yesu de mɛ ke: “Nyɛɛ ba nɛ nyɛ ba ye nyɛ mɔtu ní.” Kaseli ɔmɛ a ti nɔ kake ngmelu po ná we kã nɛ e ma bi lɛ ke: “Mɛnɔ ji mo?” ejakaa a le kaa lɛ ji Nyɔmtsɛ ɔ. 13 Yesu ngɔ abolo ɔ kɛ ha mɛ, nɛ e ha mɛ lo ɔ hulɔ. 14 Kɛ je benɛ a tle Yesu si kɛ je gbogboehi a kpɛti ɔ, enɛ ɔ ji si etɛne nɛ e je e he kpo kɛ tsɔɔ kaseli ɔmɛ.
15 Benɛ a ye mɔtu ní ɔ ta a, Yesu bi Simon Petro ke: “Simon, Yohane bi, anɛ o suɔ mi pe ní nɛ ɔmɛ lo?” E ha lɛ heto ke: “Ee, Nyɔmtsɛ, o le kaa i suɔ o sane.” Yesu de lɛ ke: “Ha ye jijɔ bimɛ ɔmɛ niye ní.” 16 Yesu kpale bi lɛ si enyɔne ke: “Simon, Yohane bi, o suɔ mi lo?” E he nɔ ke: “Ee, Nyɔmtsɛ, o le kaa i suɔ o sane.” Yesu de lɛ ke: “Hyɛ ye jijɔ wawi ɔmɛ a nɔ.” 17 Yesu bi lɛ si etɛne ke: “Simon, Yohane bi, o suɔ ye sane lo?” Petro hao kaa e bi lɛ si etɛne ke: “O suɔ ye sane lo?” Lɔ ɔ he ɔ, e de lɛ ke: “Nyɔmtsɛ, o le nɔ́ fɛɛ nɔ́; o le kaa i suɔ o sane.” Yesu de lɛ ke: “Ha ye jijɔ wawi ɔmɛ niye ní. 18 Niinɛ, ngɛ anɔkuale mi ɔ, i ngɛ mo dee ke, benɛ o wɛ ɔ, mo nitsɛ lɛ o woɔ o tade nɛ o nyɛɛɔ kɛ yaa he nɛ o suɔ. Se ke o ba bwɔ ɔ, o maa kpa o ninehi a mi nɛ nɔ kpa maa wo tade ha mo, nɛ e maa ngɔ mo kɛ ya he nɛ o sume.” 19 E de enɛ ɔ kɛ tsɔɔ gbenɔ pɔtɛɛ nɛ e ma gbo kɛ wo Mawu hɛ mi nyami. Benɛ e de enɛ ɔ se ɔ, e de lɛ ke: “Yaa nɔ nɛ o nyɛɛ ye se.”
20 Petro plɛ e he nɛ e na kaselɔ ɔ nɛ Yesu suɔ lɛ ɔ nɛ e ngɛ a se nyɛɛe. Lɛ ji nɔ nɛ benɛ a ngɛ gbɔkuɛ ní ɔ yee ɔ, e kpasa Yesu gugue mi nɛ́ e bi ke: “Nyɔmtsɛ, mɛnɔ lɛ e maa tsɔɔ o se blɔ ɔ?” nɛ. 21 Lɔ ɔ he ɔ, benɛ Petro hɛngmɛ gba e nɔ ɔ, e bi Yesu ke: “Nyɔmtsɛ, nyumu nɛ ɔ hu nɛɛ?” 22 Yesu de lɛ ke: “Ke i suɔ kaa e hi si kɛ yaa si be nɛ ma ba a, mɛni lɔ ɔ kɔɔ ngɛ o he? Moo lɛɛ yaa nɔ nɛ o nyɛɛ ye se.” 23 Enɛ ɔ he ɔ, munyu nɛ ɔ pɛ ngɛ nyɛmimɛ ɔmɛ a kpɛti kaa kaselɔ nɛ ɔ be gboe. Pohu Yesu de we ke e be gboe, mohu ɔ, nɔ́ nɛ e de ji: “Ke i suɔ kaa e hi si kɛ yaa si be nɛ ma ba a, mɛni lɔ ɔ kɔɔ ngɛ o he?”
24 Kaselɔ nɛ ɔ lɛ e ye ní nɛ ɔmɛ a he odase nɛ e ngma ní nɛ ɔmɛ ɔ nɛ, nɛ wa le kaa odase nɛ e ye ɔ ji anɔkuale.
25 Ngɛ anɔkuale mi ɔ, ní kpahi fuu hu ngɛ nɛ Yesu pee nɛ ke a ke a maa ngma lɛ tsuo fitsofitso ɔ, i he we yi kaa womi kpohi nɛ a maa ngma a maa ya je ɔ mi po.