Yesaya
57 Dalɔ hɛ mi kpata,
Se pi nɔ ko kɔmɔ.
A ngɔ nihi nɛ a yeɔ anɔkuale ɔ kɛ ho,*
Nɛ nɔ ko nɔ ko yɔse we kaa a ngɔ dalɔ ɔ kɛ je
Ngɛ amanehlu ɔ he je.*
2 E sɛ tue mi jɔmi mi.
Nihi tsuo nɛ a nyɛɛ ngɛ dami mi ɔ, ngɛ a he jɔɔe ngɛ a sa amɛ a nɔ.*
3 Se nyɛɛ lɛɛ, nyɛɛ hɛ nyɛ kɛ ba,
Nyɛ nɛ nyɛ ji yo kunya yelɔ bimɛ,
Nyɛ nɛ nyɛ ji yo gba puɛlɔ kɛ tutuutu polɔ bimɛ:
4 Mɛnɔ he fɛu lɛ nyɛ ngɛ yee ɔ?
Mɛnɔ lɛ nyɛ pa nyɛ nya mi hatoo, nɛ nyɛ je nyɛ lilɛ kpo bilaa kɛ wo ɔ?
Anɛ pi yayami bimɛ ji nyɛ lo?
Anɛ pi lakpa bimɛ ji nyɛ lo?
5 Anɛ pi nyɛ nɛ akɔnɔ hyi nyɛ tɔ ngɛ tso ngua amɛ a sisi,
Ngɛ tsohi nɛ a bɔ kusuu ɔmɛ a sisi ɔ lo?
Anɛ pi nyɛ nɛ nyɛ gbeɔ jokuɛwi ngɛ dɔgba amɛ a mi,*
Kɛ tɛsa amɛ a sisi ɔ lo?
6 Dɔgba amɛ a mi tɛhi nɛ a he ngɛ tlotlootlo ɔ ji o blɔ fa mi nɔ́.
Ee, lɔ ɔmɛ ji o blɔ fa mi nɔ́.
O plɛɔ dã afɔlehi kɛ pueɔ a nɔ, nɛ o sãã nike ní afɔlehi ngɛ a nɔ.
Anɛ ye bua nɛ jɔ* ní nɛ ɔmɛ a he lo?
7 Yoku gojoo nɛ e ya hiɔwe nɔ lɛ o ngmɛ o sa a ngɛ,
Nɛ o kuɔ kɛ ya lejɛ ɔ, nɛ o ya sã afɔle.
8 O ngɔ o kaimi nɔ́ ɔ kɛ ma sinya a kɛ sinya tso ɔ se.
O je ye he, nɛ o hɛɛ o he gu;
O kuɔ kɛ ho nɛ o ya bli o sa a mi.
Nɛ o kɛ mɛ so.
O suɔ a sa nɔ hwɔmi,
Nɛ o hyɛɔ a nyumu tso.*
9 O kple kɛ ho Melek* ya kɛ o dɛ mi nu
Kɛ nu nɛ jeɔ via babauu.
O tsɔ o tsɔli ɔmɛ kɛ ho tsitsaa lokoo ya,
Nɛ o kple kɛ ya su Yɔkɔ* mi.
10 O blɔ babauu ɔmɛ a nɔ nyɛɛmi ɔ ha nɛ o gbo dengme,
Se o de we ke, ‘E ji yaka dengme!’
O ná he wami ehe.
Lɔ ɔ he je nɛ o kɔni mi jɔ̃ we ɔ nɛ.*
11 Mɛnɔ he sawale lɛ nu mo nɛ o ngɛ gbeye yee
Nɛ lɔ ɔ he je ɔ, o bɔni lakpa yemi ɔ?
O kaii we mi.
O kɛ nɔ́ ko to we o tsui mi.
I pee dii, nɛ i pui o nya mi.*
Lɔ ɔ he je ɔ, o yi mi gbeye.
12 Ma ha nɛ a maa le dami nɛ o ke o da a, kɛ o ní tsumi ɔmɛ,
Nɛ a he be se nami bae ha mo.
13 Ke o fo ya kɛ bi yemi kɛ buami ɔ,
Amaga babauu nɛ o bua nya a be mo kpɔ̃e.
Kɔɔhiɔ maa muɔ mɛ tsuo kɛ ho,
Gugwɔ mi kɔɔhiɔ kɛkɛ ma fli mɛ kɛ ho,
Se nɔ nɛ saa we ngɛ ye ngɔ ɔ, zugba a maa pee e nɔ́
Nɛ e maa hi ye yoku klɔuklɔu ɔ nɔ.
14 Nɛ a ma de ke, ‘Nyɛ gba blɔ, nyɛ gba blɔ! Nyɛ dla blɔ ɔ nɔ!
Nyɛ je blɔ tsimi nɔ́ fɛɛ blɔ tsimi nɔ́ kɛ je ye we bi ɔmɛ a blɔ mi.’”
15 Ejakaa nɔ́ nɛ Nɔ Nɛ E Nɔ Kuɔ Gojoo,
Nɛ e ngɛ daa, nɛ e biɛ ngɛ klɔuklɔu ɔ ngɛ dee ji nɛ ɔ nɛ:
“I ngɛ he nɛ nɔ kuɔ nɛ e ngɛ klɔuklɔu,
Se i kɛ nihi nɛ a tsui ku nɛ a ní ngɛ mɔbɔ ɔ lɛ ngɛ,
Konɛ ma wo nihi nɛ a ní ngɛ mɔbɔ ɔ a bua,
Nɛ ma wo nihi nɛ a tsui ku ɔ a bua.
16 Ejakaa i be si tee kɛ wo mɛ kɛ ya daa
Nɛ ye mi mi be fue be fɛɛ be hulɔ;
Ejakaa adesa mumi ma gbɔjɔ ngɛ ye he je,
Nɛ adebɔ níhi nɛ i bɔ nɛ a woɔ mumi ɔ po ma gbɔjɔ.
17 Ye mi mi fu lɛ ngɛ e yayami kɛ sisimi blɔ nɔ nɛ e guɔ kɛ náa ní ɔ he je,
Lɔ ɔ he ɔ, i fia lɛ nɔ́, i ngɔ ye hɛ mi kɛ laa lɛ nɛ ye mi mi fu lɛ wawɛɛ.
Se e ya nɔ nɛ e kua mi, nɛ e nyɛɛ e tsui se.
18 I na e blɔ ɔmɛ,
Se ma tsa lɛ nɛ ma tsɔɔ lɛ blɔ
Nɛ ma kpale wo e kɛ e nihi nɛ a ngɛ aywilɛho yee ɔ a bua.”
19 Yehowa ke: “I kɛ yi jemi maa wo nɔ ko nya.*
Nɔ nɛ ngɛ tsitsaa, kɛ nɔ nɛ e he kɛ we ɔ ma ná tue mi jɔmi daa
Nɛ ma tsa lɛ.”
20 Se yiwutsotsɛmɛ ngɛ kaa wo oslɔke nɛ ngɛ kue nɛ e be nyɛe maa pee dii,
Nɛ e mi nyu ɔ yaa nɔ nɛ e fiaa wo mi huhi kɛ mɔsɔ kɛ yaa kɛ baa.
21 Ye Mawu ɔ ke, “Tue mi jɔmi ko be kɛ ha yiwutsotsɛ.”