Hiob
2 Ligbi ko ɔ, anɔkuale Mawu ɔ bimɛ ɔmɛ* ba da si ngɛ Yehowa hɛ mi ekohu, nɛ Satan hu piɛɛ a he kɛ ba da si ngɛ Yehowa hɛ mi.
2 Kɛkɛ nɛ Yehowa bi Satan ke: ”Jije o je?” Satan ha Yehowa heto ke: “I ya kpa zugba a nɔ nɛ i slaa si ngɛ nɔ.” 3 Nɛ Yehowa bi Satan ke: “Anɛ o to ye sɔmɔlɔ Hiob he hɛ lo?* Nɔ ko nɔ ko be zugba a nɔ nɛ ngɛ kaa lɛ. E ji nɔmlɔ nɛ da nɛ́ e yeɔ anɔkuale,* e yeɔ Mawu gbeye nɛ e pee we nɔ́ nɛ dɛ blɔ kɔkɔɔkɔ. E ngɛ mi kaa o bɔ mɔde kaa o ma ha nɛ ma te si kɛ wo lɛ nɛ ma kpata e hɛ mi* yaka gu, se loloolo ɔ, e hɛɛ e we anɔkuale yemi ɔ mi.” 4 Kɛkɛ nɛ Satan ha Yehowa heto ke: “A kɛ he lo haa ngɛ he lo nane mi, nɔ́ fɛɛ nɔ́ nɛ ngɛ nɔ ko dɛ ɔ, e maa ngɔ kɛ ha, konɛ e yi nɛ ná wami. 5 Moo lɛɛ, moo kpa o nine mi nɛ o ta e wu kɛ e he lo he nɛ bɔ fɛɛ bɔ nɛ ji ɔ, e maa gbiɛ mo ngɛ o hɛ mi.”
6 Kɛkɛ nɛ Yehowa de Satan ke: “Hyɛ! E ngɛ o dɛ mi! Se o ko kpata e wami* hɛ mi!” 7 Lɔ ɔ he ɔ, Satan je Yehowa hɛ mi kɛ ho nɛ e ya ha nɛ tslɔɔ nɛ yee nɔ fuu Hiob nɔmlɔ tso ɔ tsuo, kɛ je e nane si kɛ ya pue e yi mi. 8 Nɛ Hiob wo buɛ nɛ ywia konɛ e kɛ hlua e he, nɛ e hii si ngɛ lazu mi.
9 Kɛkɛ nɛ e yo ɔ de lɛ ke: “Loloolo ɔ, o hɛɛ o we anɔkuale yemi ɔ mi lo? Gbiɛɛ Mawu nɛ o gbo!” 10 Se Hiob de lɛ ke: “O ngɛ munyu tue kaa yihi nɛ a be juɛmi ɔ a kpɛti nɔ kake. Ke Mawu ha wɔ nɔ́ kpakpa a, tse wa ngɔɔ. Lɛɛ ke e ha wɔ nɔ́ yaya a, wa ko ngɔ lo?” Enɛ ɔ tsuo mi ɔ, Hiob de we nɔ́ yayami ko.*
11 Hiob huɛmɛ etɛ komɛ nɛ ji Elifaz nɛ je Teman, Bildad nɛ je Shua kɛ Zofar nɛ je Naama a nu amanehluhi tsuo nɛ ba Hiob nɔ ɔ he. Enɛ ɔ he ɔ, mɛ tsuo a je hehi nɛ a ngɛ ɔ, ejakaa a to kaa a ma ba kpe konɛ a ya Hiob ngɔ nɛ a ya ye kɔmɔ ha lɛ nɛ́ a wo e bua. 12 Benɛ a ma ngɛ tsitsaa nɛ a na lɛ ɔ, a yo we lɛ. Kɛkɛ nɛ a bɔni ya fo mi wawɛɛ nɛ a gba a tade ɔmɛ ngɛ a he, nɛ a fĩa bunyuku kɛ wo kɔɔhiɔ mi nɛ e ba pue a yi mi. 13 Kɛkɛ nɛ a ba hi si ngɛ e kasa nya ngɛ zugba nyɔ kɛ pia ligbi kpaago sɔuu. Nɔ ko nɔ ko kɛ lɛ tu we munyu, ejakaa a na kaa e ngɛ nɔ́ nae wawɛɛ nitsɛ.