Fiɛɛlɔ
1 Fiɛɛlɔ* ɔ nɛ ji David binyumu ɔ, matsɛ ngɛ Yerusalem ɔ munyuhi ji nɛ ɔ nɛ.
2 Fiɛɛlɔ ɔ de ke: “Yaka nɔ́!”*
“Yaka nɔ́! Nɔ́ fɛɛ nɔ́ ji yaka nɔ́!”
3 Mɛni se adesa náa ngɛ ní tsumi kpakpataa tsuo
Nɛ e gboɔ dengme kɛ tsuɔ ngɛ pu nɛ ɔ sisi ɔ mi?
6 Kɔɔhiɔ fiaa kɛ yaa woyi je nɛ e bɔleɔ si kɛ baa yiti je;
E yaa nɔ nɛ e bɔleɔ si kɛ yaa kɛ baa; kɔɔhiɔ ɔ yaa nɔ nɛ e bɔleɔ si.
7 Pahi* tsuo beɔ kɛ ya sɛɛ wo ɔ mi, se kɛ̃ ɔ, wo ɔ hyi we.
He nɛ pa amɛ jeɔ kɛ beɔ ɔ, lejɛ ɔ nɛ a kpaleɔ kɛ yaa konɛ a be ekohu.
8 Níhi tsuo woɔ nɔ pɔtɔ;
Nɔ ko nɔ ko be nyɛe maa tu he munyu po.
Hɛngmɛ tɔɛ kɛ nɔ́ hyɛmi;
Nɛ tue hu pɔ tɔɛ lɛ kɛ nɔ́ numi.
9 Nɔ́ nɛ ba hyɛ ɔ, lɔ ɔ kɛ̃ lɛ e maa ba,
Nɛ nɔ́ nɛ a pee hyɛ ɔ, lɔ ɔ kɛ̃ nɛ a maa pee ekohu;
Nɔ́ ehe ko be je nɛ ɔ mi.*
10 Anɛ nɔ́ ko ngɛ nɛ a ma tsɛ lɛ nɔ́ ehe lo?
Dɛbi, e ngɛ kɛ je blema lokoo;
E ngɛ loko a fɔ wɔ.
11 Nɔ ko kaii we nihi nɛ a hi si ngɛ blema be ɔmɛ a mi ɔ;
Nɛ nɔ ko be nihi nɛ a maa ba pee se ɔ hu kaie;
Jã kɛ̃ nɛ nihi nɛ a maa ba ngɛ mɛ hu a se ɔ be mɛ kaie.
12 Imi fiɛɛlɔ ɔ, i hi Yerusalem kɛ ye Israel ma a nɔ matsɛ. 13 I ma nya si ngɛ ye tsui mi kaa i kɛ juɛmi nɛ i ngɛ ɔ ma kpa nɔ́ fɛɛ nɔ́ nɛ a pee ngɛ hiɔwe sisi ɔ si. Yaka ní tsumi nɛ Mawu kɛ ha nimli a bimɛ nɛ e he a juɛmi ɔ, i hla mi.
14 I na ní tsumihi tsuo nɛ a tsuɔ ngɛ je nɛ ɔ mi ɔ,*
Nɛ hyɛ! lɛ tsuo ji yaka nɔ́, e ngɛ kaa fo nɛ a tuɔ kɛ fieeɔ kɔɔhiɔ se.
15 Nɔ́ nɛ kpɛ̃ ɔ, e be hie dlami tlɔmɔɔ,
Nɛ nɔ́ nɛ bé ɔ, e be hie kanemi.
16 Kɛkɛ nɛ i de ngɛ ye tsui mi ke: “Hyɛ! i ná juɛmi babauu pe nɔ fɛɛ nɔ nɛ e sɛ ye hlami ngɛ Yerusalem ɔ, nɛ ye tsui ná juɛmi kɛ nile babauu nitsɛ.” 17 I bɔ mɔde kaa ma le nɔ́ nɛ juɛmi ji, nɛ́ ma le nɔ́ nɛ godo* ji, kɛ nɔ́ nɛ kuasia jemi ji. Enɛ ɔ hu ngɛ kaa fo nɛ a tuɔ kɛ fieeɔ kɔɔhiɔ se.
18 Ejakaa juɛmi babauu ngɔɔ haomi fuu kɛ baa,
Lɔ ɔ he ɔ, nɔ fɛɛ nɔ nɛ e haa nɛ e nile hiɛɛ ɔ, e haa nɛ e piimi hu hiɛɛ.