Yesaya
40 Nyɛ Mawu ɔ ke, “Nyɛɛ wo a bua, nyɛɛ wo ye ma a bua.”
2 “Nyɛɛ tu munyu nɛ e ta Yerusalem tsui he,*
Nɛ nyɛ de lɛ ke, e nyɔguɛ ní tsumi ɔ ba nyagbe,
Nyɛ de lɛ ke, a wo e tɔmi ɔ he hiɔ.
E ná e tɔmi ɔmɛ a he tue gblami ɔ tsuo* kɛ je Yehowa ngɔ.”
3 Nɔ ko gbi ngɛ pɛe wawɛɛ ngɛ nga a nɔ ke:
“Nyɛ dla Yehowa blɔ ɔ!
Nyɛ gba blɔ ngua tlɔmɔɔ kɛ be ngɛ nga kplanaa a nɔ kɛ ha wa Mawu ɔ.
4 Nyɛ wo dɔgba fɛɛ dɔgba nɔ,
Nɛ́ nyɛɛ ba yoku fɛɛ yoku kɛ yoku wayo fɛɛ yoku wayo si.
Zugba nɛ e nɔ ngɛ tsakatsaka a, nyɛ ha nɛ e nɔ nɛ da.
Nɛ zugba nɛ e nɔ ngɛ googagooga a, nyɛ ha nɛ e nɔ nɛ sɔ.
6 Bu tue! Nɔ ko ngɛ dee ke: “Moo jaje!”
Nɔ kpa hu bi ke: “Mɛni ma jaje ɔ?”
“He lohi* tsuo ngɛ kaa nga mumu.
A suɔmi nɛ se pui ɔ tsuo ngɛ kaa nga nɔ mɔmɔ.
Niinɛ, ni ɔmɛ ngɛ kaa nga mumu.
9 Kuɔɔ kɛ ya yoku nɛ ya hiɔwe nɔ,
Mo yo nɛ o ngɔ sane kpakpa kɛ ma Zion.
Wo o gbi nɔ wawɛɛ,
Mo yo nɛ o ngɔ sane kpakpa kɛ ma Yerusalem.
Wo nɔ, koo ye gbeye.
Mo de Yuda ma amɛ ke: “Nyɛ Mawu ɔ ji nɛ ɔ nɛ.”
10 Hyɛ! Nyɔmtsɛ Matsɛ Yehowa maa ba kɛ he wami,
Nɛ e kɛ e kɔni maa ye nɔ.
Hyɛ! Hiɔwo ɔ ngɛ e dɛ,
Nɛ hiɔwo ɔ ngɛ e hɛ mi.
11 E maa hyɛ e to ɔmɛ a nɔ kaa to hyɛlɔ.*
E kɛ e nine ma bua to bi ɔmɛ a nya,
Nɛ e ma wo mɛ ngɛ e gugue mi.
E ma tsɔ̃ ni nɛmɛ nɛ a ngɛ a bimɛ nyɔ hae ɔ blɛuu.
Mɛnɔ lɛ e bua je ɔ mi tabo zu ɔ nya kɛ wo susumi nɔ́ mi,
Aloo e ngmɛ yoku ɔmɛ
Kɛ yoku wawi ɔmɛ ngɛ sɛni nɔ?
13 Mɛnɔ lɛ e susu Yehowa mumi ɔ hyɛ?*
Nɛ mɛnɔ ma nyɛ maa pee e ga wolɔ nɛ́ e tsɔɔ lɛ ní?
14 Mɛnɔ ngɔ lɛ e yaa konɛ e nu nɔ́ sisi,
Loo mɛnɔ tsɔɔ lɛ dami sane yemi blɔ,
Loo e tsɔɔ lɛ nile,
Nɛ mɛnɔ tsɔɔ lɛ anɔkuale nɔ́ sisi numi?
15 Hyɛ! Je ma amɛ ngɛ kaa nyu kɔyi kake nɛ dɛ kɛ je goga mi,
Nɛ e buɔ mɛ kaa bunyuku ngɛ sɛni nɔ.
Hyɛ! e woɔ zugba kpɔ nɛ nyu bɔle lɛ ɔ nɔ kaa bunyuku.
16 Lebanon tsuo po be nyɛe ma ha nɛ la nɛ ya nɔ nɛ e tso,*
Nɛ e nga mi lohwe ɔmɛ a he pi kɛ ha afɔle sami.
17 Je ma amɛ tsuo ngɛ kaa nɔ́ ko nɛ be si himi mi ngɛ e hɛ mi;
E buɔ mɛ kaa nɔ́ nɛ pi nɔ́ ko kulaa ji mɛ, kaa nɔ́ ko nɛ se nami be he.
18 Mɛnɔ he lɛ nyɛɛ kɛ Mawu ma nyɛ maa to?
Mɛni he nyɛɛ kɛ lɛ ma nyɛ maa to?
19 Ga ní tsulɔ ngɔɔ dade kɛ peeɔ amaga,*
Dade he ní tsulɔ ngɔɔ sika tsu kɛ kpaa he,
Nɛ e ngɔɔ sika hiɔ kɛ peeɔ kɔsɔkɔsɔ ngɔ woɔ he.
20 E hlaa tso nɛ e kɛ ma ha kaa afɔle,
Tso nɛ be sae.
E hlaa ga ní tsulɔ nɛ he be
Konɛ e pee amaga nɛ be si nɔe.
21 Anɛ nyɛ li lo?
Anɛ nyɛ nui lo?
Anɛ a de we nyɛ kɛ ji sisije lo?
Anɛ nyɛ nui sisi kɛ ji benɛ a to zugba a sisi ɔ lo?
22 Nɔ ko ngɛ nɛ e hi he ngɛ zugba lokotoo ɔ yi nɔ,
Nɛ nihi nɛ a ngɛ nɔ ɔ ngɛ kaa tukpɛtukpɛhi.
E ngɛ hiɔwe ɔ mi blie kaa bo nɛ mi ti we,
Nɛ e bliɔ mi kaa bo tsu nɛ a maa hi mi.
23 E baa ma nikɔtɔmahi si kulaa,
Nɛ e haa zugba a nɔ kojoli* ba peeɔ nɔ́ ko nɛ se nami be he.
24 A ngɛ kaa tso nɛ a du kɛ we,
Ke a du mɛ nɔuu ɔ,
A sipoku sɛ we zu mi kpakpa ko,
Nɛ kɔɔhiɔ fiaa mɛ kɛ pueɔ si nɛ a gbliɔ,
Nɛ kɔɔhiɔ ɔ muɔɔ mɛ kɛ yaa kaa nga.*
25 Nɔ Klɔuklɔu ɔ ke: “Mɛnɔ he nyɛ ma nyɛ maa ngɔ mi kɛ to kaa e kɛ mi sɔ?
26 Nyɛ wo nyɛ yi nɔ nɛ nyɛɛ hyɛ hiɔwe.
Mɛnɔ lɛ bɔ ní nɛ ɔmɛ?
Lɛ ji nɔ nɛ e jeɔ mɛ kpo kaa tabo ngɛ a yibɔ nya;
E kɛ mɛ tsuo a biɛ tsɛɔ mɛ.
Ngɛ e he wami ngua a, kɛ e nyɛmi kpetekpleenyɛ ɔ nya a,
Kake ngmelu po laa we.
27 Oo Yakob, mɛni he je nɛ o tu munyu; Oo Israel, mɛni he je nɛ o de ke,
‘Ye blɔ ɔ laa Yehowa
Nɛ Mawu yi dami sane ha mi’ ɔ?
28 Anɛ o li lo? Anɛ o nui lo?
Yehowa, nɔ nɛ e bɔ zugba a nyagbe he ɔmɛ ɔ ji Mawu nɛ e ngɛ kɛ yaa neneene.
Pɔ tɔɛ e he gblee, nɛ e gbɔjɔɔ we hulɔ.
E níhi a sisi numi ɔ mi kuɔ pe bɔ nɛ juɛmi ma nyɛ maa kpe he.*
30 Pɔ maa tɔ nyumuwi nɛ a ma gbɔjɔ,
Nɛ nihewi ma tɛ si nɛ a maa nɔ si,
31 Se nihi nɛ a ngɔɔ a hɛ kɛ fɔɔ Yehowa nɔ ɔ ma ná he wami ekohu.
A maa te kɛ ya kɔɔhiɔ mi kaa nɔ́ nɛ a ngɛ pɛlihi kaa kɔle.
A maa tu fo se a he wami nɔ be gbɔe;
A maa nyɛɛ se pɔ be a he tɔe.”