Yesaya
66 Nɔ́ nɛ Yehowa ngɛ dee ji nɛ ɔ nɛ:
“Hiɔwe ɔ ji ye matsɛ sɛ, nɛ zugba a ji nɔ́ nɛ i kɛ ye nane maa nɔ.
Lɔ ɔ he ɔ, mɛni we lɛ nyɛ ma nyɛ maa ma ha mi?
Nɛ jije ji ye he jɔɔmi he?”
2 “Imi nitsɛ ye nine lɛ i kɛ pee ní nɛ ɔmɛ tsuo,
Nɛ jã ji bɔ nɛ lɛ tsuo plɛ kɛ ba si himi mi,” Yehowa lɛ de.
“Lɔ ɔ he ɔ, nɔ nɛ ma hyɛ ji nɛ ɔ nɛ,
Nɔ nɛ e baa e he si nɛ e tsui kuɔ, nɛ e he doɔ blibliibli* ngɛ ye munyu ɔ he je.
3 Nɔ nɛ e ngɛ na gbee ɔ, e ngɛ kaa nɔ nɛ e ngɛ nɔmlɔ gbee.
Nɔ nɛ e ngɔ jijɔ kɛ ngɛ afɔle sãe ɔ, e ngɛ kaa nɔ nɛ e ngɛ gbe kuɛ kue.
Nɔ nɛ e ngɔ nike ní kɛ ngɛ hae ɔ, e ngɛ kaa nɔ nɛ e ngɔ kpotoo muɔ kɛ ba!
Nɔ nɛ e ngɔ ohɛ kɛ ngɛ kaimi afɔle sãe ɔ, e ngɛ kaa nɔ nɛ e ngɔ kunya yemi munyu kɛ ngɛ nɔ jɔɔe.*
A hla mɛ nitsɛmɛ a blɔ,
Nɛ a bua jɔ* nɔ́ nɛ ngɛ tai he.
4 Lɔ ɔ he ɔ, ma hla blɔ nɔ nɛ ma gu kɛ gbla a tue,
Nɛ ma ha nɛ níhi nɛ a ngɛ gbeye yee ɔ maa ba a nɔ.
Ejakaa benɛ i tsɛ ɔ, nɔ ko he we mi nɔ;
Benɛ i tu munyu ɔ, nɔ ko nɔ ko bui tue.
A ya nɔ nɛ a pee ní yayamihi ngɛ ye hɛ mi,
Nɛ a hla kaa a maa pee níhi nɛ ye bua jɔɛ a he.”
5 Nyɛɛ bu Yehowa munyu tue, nyɛ nihi nɛ nyɛ he doɔ blibliibli* ngɛ e munyu ɔ he:
“Nyɛ nyɛmimɛ nɛ a sume nyɛ nɛ a je a he kɛ je nyɛ he ngɛ ye biɛ he je ɔ de ke, ‘Á wo Yehowa hɛ mi nyami!’
Se e ma je e he kpo, nɛ e ma ha nɛ nyɛ bua maa jɔ,
Nɛ mɛ mohu lɛ zo maa gbe.”
6 Huhui ko ngɛ pɛe ngɛ ma a mi, huhui ɔ je sɔlemi we ɔ!
Yehowa nɛ́ e ngɛ he nyɛli ɔmɛ a tue gblae bɔ nɛ e sa mɛ ɔ he huhui ɔ lɛ ngɛ pɛe ɔ nɛ.
7 E fɔ, be mi nɛ e nui kɔɔmi lolo.
E fɔ binyumu be mi nɛ e kɔɔ we.
8 Mɛnɔ lɛ e nu nɔ́ ko kaa kikɛ hyɛ?
Mɛnɔ lɛ e na nɔ́ ko kaa kikɛ hyɛ?
Anɛ a ma fɔ zugba ngɛ ligbi kake mi lo?
Anɛ si kake too kɛkɛ a fɔ je ma ko lo?
Se benɛ Zion nu kɔɔmi ɔ pɛ kɛkɛ nɛ e fɔ e binyumu ɔmɛ.
9 “Anɛ ma ha nɛ fɔmi maa su gbongu mi, nɛ i be hae nɛ a fɔ bi ɔ lo?” Yehowa lɛ de.
Nyɛ Mawu ɔ ke, “Anɛ ma ha nɛ nɔ maa nu kɔɔmi, nɛ ma tsi e fɔmi kotoku nya lo?”
10 Nyɛɛ kɛ Yerusalem nɛ nya, nyɛ nihi tsuo nɛ nyɛ suɔ lɛ ɔ.
Nyɛ nihi tsuo nɛ nyɛ ngɛ e he aywilɛho yee, nyɛɛ kɛ lɛ nɛ nya wawɛɛ,
11 Nyɛ maa nu e bua womi nyɔ nyu ɔ, nɛ nyɛ bua maa jɔ,
Nyɛ maa nu e nyɔ nyu ɔ wawɛɛ, nɛ nyɛ bua maa jɔ ngɛ e hɛ mi nyami babauu ɔ mi.
12 Ejakaa nɔ́ nɛ Yehowa ngɛ dee ji nɛ ɔ nɛ:
“Ma ha nɛ e ma ná tue mi jɔmi kaa pa,
Nɛ je ma amɛ a hɛ mi nyami ɔ maa pee kaa pa nɛ hyi.
Nyɛ maa nu nyɔ nyu, nɛ a maa kpa nyɛ ngɛ a kasa he,
Nɛ a maa fɔ nyɛ ngɛ a tɛ nɔ.
13 Kaa bɔ nɛ binyɛ woɔ e binyumu bua a,
Jã nɛ ma ya nɔ nɛ ma wo nyɛ bua;
Nɛ Yerusalem he je ɔ, ma wo nyɛ bua.
14 Nyɛ maa na nɔ́ nɛ ɔ, nɛ nyɛ tsui ma nya,
Nyɛ wuhi maa pee flɔflɔɔflɔ kaa nga mumu.
Nɛ Yehowa sɔmɔli maa na e nine,*
Se e ma kua e he nyɛli.”
15 “Ejakaa Yehowa maa ba kaa la,
Nɛ e ta zugba lɛ ɔmɛ ngɛ kaa kɔɔhiɔ nɛ nya wa,
Konɛ e kɛ abofu nɛ nya wa nɛ ba wo mɛ hiɔ,
Nɛ e ngɔ la lilɛ kɛ ba kã a hɛ mi.
16 Ejakaa Yehowa maa ngɔ la kɛ kojo,
Ee, e kɛ e klaate ɔ maa gbe he lo fɛɛ he lo;*
Nɛ nihi nɛ Yehowa maa gbe ɔ maa hiɛ babauu.
17 “Nihi nɛ a ngɛ a he fɔe kɛ nihi nɛ a ngɛ a he tsue konɛ a sɛ abɔɔ ɔmɛ* a mi, nɛ́ a nyɛɛɔ nɔ nɛ ngɛ kpɛti ɔ se, nɛ a yeɔ kpotoo lo kɛ níhi nɛ a he tsɔ we kɛ kɔkue ɔ, mɛ tsuo a nyagbe maa ba kɛ bla,” Yehowa lɛ de. 18 “Akɛnɛ i le a ní tsumi ɔmɛ kɛ a susumi ɔmɛ he je ɔ, i ma nɛ ma ba bua nihi nɛ a je je mahi kɛ gbi munomunohi tsuo a mi ɔ a nya, nɛ a ma ba na ye hɛ mi nyami ɔ.”
19 “Ma ma okadi ko ngɛ a kpɛti, nɛ nihi nɛ a tu fo kɛ ho je ma amɛ a mi ya a, ma tsɔ a kpɛti ni komɛ kɛ ya Tarshish, Pul kɛ Lud, nihi nɛ a tsɛ̃ɔ kɛ̃ɛ̃ kɛ yaa Tubal kɛ Yavan, kɛ zugba kpɔhi nɛ nyu bɔle mɛ nɛ a ngɛ tsitsaa a nɔ, nihi nɛ a nui ye he sane hyɛ loo a nɛ ye hɛ mi nyami ɔ hyɛ ɔ. Nɛ a maa jaje ye hɛ mi nyami ɔ ngɛ je ma amɛ a mi. 20 A maa ngɔ o nyɛmimɛ ɔmɛ tsuo kɛ je je ma amɛ tsuo a mi kɛ ba ha Yehowa kaa nike ní, a maa hi okpɔngɔhi, ta zugba lɛhi, zugba lɛhi nɛ a ngɔ nɔ́ kɛ ha a he, teji okpɔngɔhi kɛ afukpɔngɔhi a nɔ kɛ ba Yerusalem, ye yoku klɔuklɔu ɔ nɔ, kaa bɔ nɛ Israelbi ɔmɛ ngɔɔ a nike ní kɛ woɔ nɔ́ nɛ e he tsɔ mi kɛ baa Yehowa we ɔ,” Yehowa lɛ de.
21 “Nɛ ma ngɔ a kpɛti ni komɛ kɛ pee osɔfohi kɛ Levibi” Yehowa lɛ de.
22 “Kaa bɔ nɛ hiɔwe ehe kɛ zugba ehe nɛ i ngɛ pee ɔ maa ya nɔ maa hi ye hɛ mi ɔ, jã nɛ nyɛ nina* kɛ nyɛ biɛ hu maa hi ye hɛ mi,” Yehowa lɛ de.
23 “Nɛ nyɔhiɔ ehe fɛɛ nyɔhiɔ ehe, kɛ he jɔɔmi ligbi fɛɛ he jɔɔmi ligbi ɔ,
He lo fɛɛ he lo* ma ba kplã si ngɛ ye hɛ mi,”* Yehowa lɛ de.
24 “Nɛ a maa je kpo nɛ a ma ya hyɛ nihi nɛ a tsɔ ye hɛ mi atuã a gbogboe ɔmɛ;
Ejakaa gɔgɔhi nɛ a ngɛ mɛ yee ɔ be gboe,
Nɛ a be a la a gbee,
Nɛ a ma ba pee nɔ́ ko nɛ a hiɔ kɛ ha nihi tsuo.”*