Yesaya

61 Nyɔmtsɛ Matsɛ Yehowa mumi ɔ ngɛ ye nɔ,

Ejakaa Yehowa pɔ mi nu kaa ma jaje sane kpakpa kɛ tsɔɔ nihi nɛ a he jɔ.

E tsɔ mi kaa ma ba fi nihi nɛ a tsui ku ɔ a tsui,

Nɛ ma jaje kɛ tsɔɔ nyɔguɛhi kaa a maa ye a he,

Nɛ ma de nihi nɛ a wo mɛ tsu ɔ ke a hɛngmɛ ma bli.

 2 E tsɔ mi kaa ma ba jaje Yehowa mɔbɔ nami* jeha a

Kɛ wa Mawu ɔ lue yemi ligbi ɔ,

Nɛ ma wo nihi nɛ a ngɛ kɔmɔ yee ɔ tsuo a bua.

 3 E tsɔ mi kaa ma ba ye bua nihi nɛ a ngɛ Zion he kɔmɔ yee ɔ,

Nɛ ma ha mɛ jlasi ngɛ lazu nane mi,

Nɛ ma ha mɛ nu nɛ ma ha nɛ a nya ngɛ kɔmɔ yemi nane mi,

Nɛ ma ha mɛ yi jemi tade ngɛ kɔni mi jɔmi nane mi,

Nɛ a ma tsɛ mɛ ke dami tso nguahi,

Tsohi nɛ Yehowa du, konɛ e wo e hɛ mi nyami.*

 4 A maa to blema mahi nɛ a hɛ mi kpata a sisi ekohu;

Ma dokuhi nɛ a ngɛ kɛ je blema lokoo ɔ, a maa fia mɛ kɛ ma si ekohu,

Nɛ a maa po mahi nɛ a hɛ mi kpata a ekohu,

Hehi nɛ a fɔɔ si gu yi nɔhi babauu ɔ.

 5 “Nibwɔhi ma ba tsɔ̃ nyɛ to ɔmɛ,

Nɛ ma se bi ma ba hu nyɛ ngmɔ ɔmɛ kɛ nyɛ wai ngmɔ ɔmɛ.

 6 Se nyɛɛ lɛɛ, a ma tsɛ nyɛ ke Yehowa we osɔfohi;

A ma tsɛ nyɛ ke wa Mawu ɔ sɔmɔli.

Nyɛ maa ye je ma amɛ a ní kpakpa amɛ,

Nɛ nyɛɛ kɛ a hɛ mi nyami ɔ* maa fĩa.

 7 Ngɛ zo nane mi ɔ, nyɛ ma ná weto ní totoe enyɔ,

Nɛ ngɛ hɛ mi si puemi nane mi ɔ, nyɛ ma nya kɛ bua jɔmi ngɛ nɔ́ nɛ nyɛ ná a he je.

 8 Ejakaa imi Yehowa i suɔ dami sane yemi;

I hiɔ jumi kɛ nɔ́ nɛ dɛ peemi.

Ma wo mɛ hiɔ sisiisi,

Nɛ i kɛ mɛ maa so neneene somi.

 9 Nihi maa le a nina* ngɛ je ma amɛ a kpɛti,

Nɛ a maa le a sisi bimɛ ngɛ ma amɛ a kpɛti.

Nɔ fɛɛ nɔ nɛ maa na mɛ ɔ maa le a mi tso,

Kaa a ji nina* nɛ Yehowa jɔɔ mɛ.”

Ejakaa e wo yi wami hemi tade ha mi;

E ngɔ dami tade* kɛ ha ye he

Kaa bɔ nɛ ayɛflo huno ngɔɔ yi fimi nɔ́ kɛ fiɔ e yi kaa osɔfo,

Nɛ ayɛflo hu ngɔɔ junehi kɛ dlaa e he ɔ.

11 Ejakaa kaa bɔ nɛ zugba a haa nɛ níhi puɛɔ

Nɛ ngmɔ haa nɛ níhi nɛ a du ngɛ e mi puɛɔ ɔ,

Jã nɛ Nyɔmtsɛ Matsɛ Yehowa

Ma ha nɛ dami ní peemi kɛ yi jemi maa puɛ ngɛ je ma amɛ tsuo a hɛ mi.