1 Samuel

9 Nyumu ko hi Benyamin nɛ a tsɛɛ lɛ ke Kish, Benyamin no ji lɛ, nɛ e ji niatsɛ kpanaa. E tsɛ ji Abiel, Abiel tsɛ ji Zeror, Zeror tsɛ ji Bekorat, nɛ Bekorat tsɛ ji Afia. 2 E ngɛ binyumu ko nɛ a tsɛɛ lɛ ke Saul, e ji niheyo nɛ e he ngɛ fɛu, nyumu ko be Israel bi ɔmɛ a kpɛti nɛ e he ngɛ fɛu pe lɛ. E ka pe ni ɔmɛ tsuo, e konɔ pɛ nɛ a kami su.

3 Benɛ Saul tsɛ Kish teji yi ɔmɛ laa a, Kish de e binyumu Saul ke: “I kpa mo pɛɛ nɛ o ngɔ tsɔli ɔmɛ a kpɛti nɔ kake kɛ piɛɛ o he nɛ nyɛ ya hla teji ɔmɛ.” 4 A ya gu Efraim yoku ɔmɛ a nɔ kɛ ya gu Shalisha zugba a nɔ, se a nɛ mɛ. A pue nɔ kɛ ya gu Shaalim zugba a nɔ, se teji ɔmɛ be lejɛ ɔ. A ya gu Benyamin bi ɔmɛ a zugba a nɔ tsuo, se a nɛ mɛ.

5 A ba hia si ngɛ Zuf zugba a nɔ, nɛ Saul de e tsɔlɔ nɛ piɛɛ e he ɔ ke: “Moo ba, ha nɛ waa kpale wa se, konɛ ye tsɛ ɔ nɛ ko ba bɔni tsui yemi ngɛ wa he mohu pe teji ɔmɛ.” 6 Se tsɔlɔ ɔ he nɔ ke: “Hyɛ, Mawu nɔmlɔ ko ngɛ ma nɛ ɔ mi, nyumu ko nɛ a buɔ lɛ saminya. Nɔ́ fɛɛ nɔ́ nɛ e deɔ ɔ baa mi pɛpɛɛpɛ. Ha nɛ waa ya lejɛ ɔ piɔ. Eko ɔ, e ma nyɛ maa tsɔɔ wɔ he nɛ waa gu.” 7 Kɛkɛ nɛ Saul de e tsɔlɔ ɔ ke: “Ke wa ya a, mɛni wa ma ya ha nyumu ɔ? Abolo ko be wa baagi ɔmɛ a mi; nɔ́ ko be nɛ wa maa ngɔ kɛ ya ke anɔkuale Mawu ɔ nɔmlɔ ɔ. Mɛni wa ngɛ?” 8 Enɛ ɔ he ɔ, tsɔlɔ ɔ ha Saul heto ekohu ke: “Hyɛ! I hɛɛ sika hiɔ shekel* nɛ a gba mi eywiɛ mi kake ngɛ ye dɛ. Ma ngɔ kɛ ya ha anɔkuale Mawu ɔ nɔmlɔ ɔ, nɛ e maa tsɔɔ wɔ he nɛ waa gu.” 9 (Blema ngɛ Israel ɔ, ke nɔ ko yaa hla Mawu se blɔ ɔ, nɔ́ nɛ e deɔ ji: “Ba nɛ waa ho ní nalɔ ɔ ngɔ ya.” Ejakaa nɔ nɛ a tsɛɛ lɛ ke gbalɔ mwɔnɛ ɔ, blema a, a tsɛɛ lɛ ke ní nalɔ.) 10 Kɛkɛ nɛ Saul de e tsɔlɔ ɔ ke: “Nɔ́ nɛ o de ɔ da. Ha nɛ waa ho.” Lɔ ɔ he ɔ, a ho ma nɛ anɔkuale Mawu ɔ nɔmlɔ ɔ ngɛ mi ɔ mi ya.

11 Benɛ a ngɛ yoku ɔ kuɔe kɛ yaa ma a mi ɔ, a kɛ yihewi komɛ kpe nɛ a je kpo kɛ yaa konɛ a ya sa nyu. Lɔ ɔ he ɔ, a bi mɛ ke: “Anɛ ní nalɔ ɔ ngɛ hiɛ ɔ lo?” 12 A ha heto ke: “Ee, e ngɛ hiɛ ɔ. Hyɛ, e ngɛ nyɛ hɛ mi nɔuu. Nyɛ he nɛ sɔ, ejakaa e ba ma a mi mwɔnɛ ɔ, akɛnɛ mwɔnɛ ɔ, ni ɔmɛ maa sã afɔle ngɛ he nɛ ya hiɔwe* ɔ he je. 13 Ke nyɛ ná nɛ nyɛ su ma a mi pɛ ɔ, nyɛ maa na lɛ loko e maa kuɔ kɛ ya he nɛ ya hiɔwe ɔ nɛ e ya ye ní. Ni ɔmɛ be ní yee kɛ yaa si be nɛ e maa ba, ejakaa lɛ nɛ e jɔɔ afɔle ɔ nɔ. Ke e ná nɛ e pee jã pɛ ɔ, ni nɛmɛ nɛ a fɔ mɛ nine ɔ ma nyɛ maa ye ní. Lɔ ɔ he ɔ, nyɛɛ kuɔ kɛ ya amlɔ nɔuu, nɛ nyɛ maa na lɛ.” 14 Nɛ a kuɔ kɛ ho ma a mi ya. Benɛ a su ma a mi ɔ, o nɛ Samuel nɛ e je kpo kɛ ma konɛ e kɛ mɛ nɛ ba kpe nɛ́ a kuɔ kɛ ho he nɛ ya hiɔwe ɔ ya.

15 Ligbi nɛ e nɔ jena Saul maa ba a, Yehowa wo Samuel tue nɔ ke: 16 “Hwɔɔ maa pee be nɛ ɔ mi ɔ, ma tsɔ nyumu ko kɛ je Benyamin zugba a nɔ kɛ ba o ngɔ. Pɔɔ lɛ nu kaa ye ma Israel ɔ hɛ mi nyɛɛlɔ, nɛ e ma he ye we bi ɔmɛ a yi wami kɛ je Filisti bi ɔmɛ a dɛ mi. Ejakaa i na amanehlu nɛ ye we bi ɔmɛ ngɛ nae ɔ, nɛ ya nɛ a ngɛ foe ɔ ba su ye ngɔ.” 17 Benɛ Samuel na Saul ɔ, Yehowa de lɛ ke: “Nyumu ɔ nɛ i de mo kaa e maa hyɛ ye we bi ɔmɛ a nɔ* ɔ ji nɛ ɔ nɛ.”

18 Jehanɛ ɔ, Saul su Samuel he ngɛ agbo ɔ nya nɛ e bi lɛ ke: “I kpa mo pɛɛ, mo de mi, jije ní nalɔ ɔ we mi ngɛ?” 19 Samuel ha Saul heto ke: “Imi ji ní nalɔ ɔ nɛ. Moo sɛ ye hlami nɛ o kuɔ kɛ ho he nɛ ya hiɔwe ɔ ya, nɛ mwɔnɛ ɔ, nyɛɛ kɛ mi maa ye ní. Ma wo mo blɔ mɔtu, nɛ ma de mo níhi nɛ o suɔ kaa o maa le ɔ tsuo.* 20 Teji ɔmɛ nɛ a laa mwɔnɛ ɔ ji ligbi etɛ ɔ, koo hao ngɛ a he, ejakaa a na mɛ. Nɛ níhi tsuo nɛ a he jua wa ngɛ Israel ɔ, mɛnɔ níhi? Anɛ pi mo kɛ o tsɛ we ɔ tsuo nyɛ níhi lo?” 21 Kɛkɛ nɛ Saul ha heto ke: “Anɛ pi Benyamin, Israel wɛtso nyafii pe kulaa a mi no ji mi, nɛ pi ye weku ɔ ji weku nyafii pe kulaa ngɛ Benyamin wɛtso ɔ mi lo? Lɛɛ mɛni he je mɔ nɛ o kɛ mi ngɛ munyu tue kikɛ nɛ ɔ?”

22 Kɛkɛ nɛ Samuel ngɔ Saul kɛ e tsɔlɔ ɔ, nɛ e kɛ mɛ ba ní yemi asa a nɔ, nɛ e ha mɛ nikɔtɔmahi a blɔ he ngɛ ni nɛmɛ nɛ a fɔ mɛ nine kɛ ba a a kpɛti; nyumuhi maa pee 30 lɛ a ngɛ lejɛ ɔ. 23 Samuel de ní hoolɔ ɔ ke: “Yaa ngɔ lo kpɔ ɔ nɛ i kɛ ha mo nɛ i de mo ke, ‘Ngɔɔ kɛ to’ ɔ kɛ ba.” 24 Kɛkɛ nɛ ní hoolɔ ɔ wo lohwe ɔ nɛ a kɛ sã afɔle ɔ fiɔ ɔ kɛ nɔ́ nɛ ngɛ nɔ ɔ, nɛ e kɛ ma Saul hɛ mi. Nɛ Samuel de ke: “Nɔ́ nɛ a kɛ to ɔ, lɔ ɔ nɛ a kɛ ma o hɛ mi ɔ nɛ. Moo ye, ejakaa a kɛ to ha mo kɛ ha be nɛ ɔ. Ejakaa i de mɛ ke, ‘I fɔ nibwɔhi nine.’” Lɔ ɔ he ɔ, Saul kɛ Samuel ye ní jamɛ a ligbi ɔ. 25 Kɛkɛ nɛ a kple kɛ je he nɛ ya hiɔwe ɔ kɛ ho ma a mi ya, nɛ e ya nɔ nɛ e kɛ Saul tu munyu ngɛ tsu ko yi mi. 26 A te si mla, nɛ benɛ je na a, Samuel tsɛ Saul ngɛ tsu ɔ yi mi, nɛ e de ke: “Dla konɛ ma wo mo blɔ.” Lɔ ɔ he ɔ, Saul dla nɛ e kɛ Samuel tsuo ho kpo ɔ nya ya. 27 Benɛ a ngɛ kplee kɛ yaa ma a nya a, Samuel de Saul ke: “Mo de o tsɔlɔ ɔ nɛ e sɛ wa hlami, se moo lɛɛ moo da si, konɛ ma ha nɛ o nu sɛ gbi nɛ je Mawu ngɔ ɔ.” Lɔ ɔ he ɔ, tsɔlɔ ɔ sɛ a hlami.