Yesaya
31 Musu tloo nihi nɛ a kpleɔ kɛ yaa Egipt nɛ a ya biɔ yemi kɛ buami,
Nihi nɛ a ngɔɔ a hɛ kɛ fɔɔ okpɔngɔhi a nɔ,
Nihi nɛ a ngɔɔ a hɛ kɛ fɔɔ ta zugba lɛhi a nɔ akɛnɛ a hiɛ babauu ɔ he je,
Nɛ a ngɔɔ a hɛ kɛ fɔɔ ta okpɔngɔhi* a nɔ, akɛnɛ a he wa a he je.
Se a ngɔɛ a hɛ kɛ fɔ we Israel Nɔ Klɔuklɔu ɔ nɔ,
Nɛ a hla we Yehowa se blɔ.
2 Se lɛ hu e ngɛ nile, nɛ e maa ngɔ haomi kɛ ba,
Nɛ nɔ́ nɛ e de ɔ, e be e nya se kpalee.
E maa te si kɛ wo yayami peeli a we,
Kɛ nihi nɛ a yeɔ kɛ buaa nihi nɛ peeɔ nɔ́ yayami ɔ.
3 Egiptbi ɔmɛ ɔ, nimli adesahi kɛkɛ ji mɛ, tsa pi Mawu ji mɛ;
A we okpɔngɔ ɔmɛ ɔ, he lo kɛkɛ ji mɛ, tsa pi mumi ji mɛ.
Ke Yehowa kpa e nine mi ɔ,
Nɔ fɛɛ nɔ nɛ e ma ba ye kɛ bua a ma tɛ si,
Nɛ nɔ fɛɛ nɔ nɛ a maa ye kɛ bua lɛ ɔ maa nɔ si;
Mɛ tsuo a hɛ mi ma kpata ngɛ be kake mi.
4 Ejakaa nɔ́ nɛ Yehowa de mi ji nɛ ɔ nɛ:
“Kaa bɔ nɛ jata, jata* nɛ ngɛ he wami huaa ke e nu lohwe ko,
Nɛ́ ke a tsɛ to hyɛli babauu kɛ ba kaa a ba fiee lɛ,
Nɛ́ a ngmlaa kpami ɔ
Aloo huhui nɛ a kpaa a wui e he gbeye ɔ,
Jã nɛ Yehowa tabohiatsɛ ɔ ma kple kɛ ba nɛ e ma ba hwu ta
Ngɛ Zion Yoku ɔ kɛ e kpongu ɔ nɔ.
5 Kaa bɔ nɛ lohwe pɛlitsɛ he sɔɔ kɛ baa zugba a, jã nɛ Yehowa tabohiatsɛ ɔ maa fã Yerusalem he.
E ma fã Yerusalem he nɛ e ma kpɔ̃ lɛ.
E maa na Yerusalem mɔbɔ nɛ e ma kpɔ̃ lɛ.”
6 “Oo Israel ma, nyɛɛ kpale kɛ ba nɔ nɛ nyɛ tsɔ atuã kɛ si lɛ wawɛɛ ɔ ngɔ. 7 Ejakaa jamɛ a ligbi ɔ, nɔ fɛɛ nɔ ma sake e sika hiɔ mawuhi nɛ se nami be a he ɔ, kɛ e sika tsu mawuhi nɛ se nami be a he nɛ́ nyɛɛ kɛ nyɛ nitsɛmɛ nyɛ nine pee, nɛ e ji yayami ɔ kɛ fɔ he.
8 Nɛ Asiriano ɔ maa nɔ ngɛ klaate nya, pi adesa klaate;
Nɛ klaate nɛ pi adesa nɔ́ ma kpata e hɛ mi.
E maa tu klaate ɔ nya fo,
Nɛ a maa nyɛ e nihewi ɔmɛ a nɔ nɛ a ma tsu ní kpakpataa.
9 Gbeye kɛkɛ ma ha nɛ e tɛsa a maa laa,
Nɛ okadi tso ɔ ma ha nɛ sawale maa nu e ma nikɔtɔma amɛ,”
Yehowa, nɔ nɛ e la a ngɛ Zion, nɛ e flɔɔnɔɔ ngɛ Yerusalem ɔ lɛ de.