Yohane Sane Kpakpa a

1 Sisije ɔ, Munyu ɔ ngɛ, nɛ Munyu ɔ kɛ Mawu lɛ ngɛ, nɛ Munyu ɔ ngɛ kaa Mawu. 2 Sisije ɔ, nɔ nɛ ɔ kɛ Mawu lɛ ngɛ. 3 E nɔ lɛ níhi tsuo gu kɛ ba, nɛ nɔ́ kake ngmelu po bɛ nɛ pi e nɔ nɛ e gu kɛ ba.

Nɔ́ nɛ ba 4 kɛ gu e nɔ ɔ ji wami, nɛ wami ɔ ji adesahi a la. 5 Nɛ la a ngɛ kpɛe ngɛ diblii ɔ mi, se diblii ɔ nyɛ we nɛ e ye e nɔ.

6 A tsɔ nyumu ko kaa Mawu nane mi dalɔ kɛ ba; e biɛ ji Yohane. 7 Nyumu nɛ ɔ ba kaa odase yelɔ, bɔ nɛ pee nɛ e ba ye la a he odase, konɛ kɛ gu e nɔ ɔ, nimli slɔɔtohi tsuo nɛ a nyɛ nɛ a he ye. 8 Pi lɛ ji jamɛ a la a, se e ba konɛ e ba ye jamɛ a la a he odase.

9 E be kɛe nɛ la nitsɛnitsɛ ɔ nɛ haa nimli slɔɔtohi tsuo la a maa ba je ɔ mi. 10 E ngɛ je ɔ mi momo, nɛ e nɔ lɛ je ɔ gu kɛ ba, se je ɔ li lɛ. 11 E ba lɛ nitsɛ e we mi, se lɛ nitsɛ e we bi ɔmɛ he we lɛ. 12 Se nihi tsuo nɛ a ha lɛ hɛ mi ɔ, e ha mɛ he blɔ konɛ a ba pee Mawu bimɛ, ejakaa a heɔ e biɛ ɔ yeɔ. 13 Nɛ pi muɔ mi, aloo he lo nya, aloo adesa suɔmi nya nɛ a je kɛ fɔ mɛ, mohu ɔ, Mawu mi.

14 Enɛ ɔ he ɔ, Munyu ɔ ba plɛ he lo, nɛ e ba hi si ngɛ wa kpɛti, nɛ wa na e hɛ mi nyami ɔ, kaa hɛ mi nyami nɛ bi kake too náa kɛ jeɔ e tsɛ ngɔ; nɛ Mawu dloomi kɛ anɔkuale hyi lɛ tɔ. 15 (Yohane ye e he odase, ee, e kpa ngmlaa ke: “Nɔ nɛ ɔ ji nɔ nɛ i de ngɛ e he ke, ‘Nɔ nɛ e ma ngɛ ye se ɔ sɛ ye hlami, ejakaa e ngɛ loko i ba’ a nɛ.”) 16 Ejakaa wɔ tsuo wa nine su dloomi nɔ nɔtonɔto kɛ je e ngɔ akɛnɛ dloomi hyi lɛ tɔtɔɔtɔ ɔ he je. 17 Ejakaa Mose nɔ lɛ a gu nɛ a ngɔ Mlaa a kɛ ha, se dloomi ɔ kɛ anɔkuale ɔ lɛɛ, Yesu Kristo nɔ a gu kɛ ba. 18 Adesa ko nɛ Mawu hyɛ; mawu bi kake too ɔ nɛ e ngɛ Tsɛ ɔ kasa nya* a lɛ e tsɔɔ bɔ nɛ Mawu ngɛ ha.

19 Enɛ ɔ ji odase nɛ Yohane ye benɛ Yudabi ɔmɛ tsɔ osɔfohi kɛ Levibi kɛ je Yerusalem kɛ ya e ngɔ nɛ a ya bi lɛ ke: “Mɛnɔ ji mo?” ɔ nɛ. 20 E laa we mɛ nɔ́ ko nɔ, mohu ɔ, e gba mi kpoo nɛ e de mɛ ke: “Pi imi ji Kristo ɔ.” 21 Nɛ a bi lɛ ke: “Lɛɛ mɛnɔ ji mo mɔ? Anɛ mo ji Eliya lo?” Nɛ e he nɔ ke: “Pi imi.” “Anɛ mo ji Gbalɔ ɔ lo?” Nɛ e ha heto ke: “Dɛbi!” 22 Enɛ ɔ he ɔ, a bi lɛ ke: “Mɛnɔ ji mo? De wɔ konɛ wa nyɛ nɛ wa ná heto kɛ ya ha ni nɛmɛ nɛ a tsɔ wɔ ɔ. Mɛni o ngɛ dee ngɛ mo nitsɛ o he?” 23 E de ke: “Imi ji nɔ nɛ e gbi ngɛ pɛe wawɛɛ ngɛ nga a nɔ ke, ‘Nyɛ dla Yehowa* blɔ ɔ nɛ e da tlɔmɔɔ’ ɔ nɛ, kaa bɔ nɛ gbalɔ Yesaya de ɔ.” 24 Ni nɛmɛ nɛ a tsɔ mɛ kɛ ba a je Farisi bi ɔmɛ a ngɔ. 25 Enɛ ɔ he ɔ, a bi lɛ sane nɛ a de lɛ ke: “Ke pi mo ji Kristo ɔ, aloo Eliya, aloo Gbalɔ ɔ, lɛɛ mɛni he je mɔ nɛ o baptisiɔ nihi ɔ?” 26 Yohane ha mɛ heto ke: “Imi lɛɛ i baptisiɔ nihi ngɛ nyu mi. Se nɔ ko daa si ngɛ nyɛ kpɛti nɛ nyɛ li lɛ, 27 nɔ nɛ e ma ngɛ ye se ɔ, e tokota nya kpa tete po, i sɛ nɔ nɛ e pɛneɔ.” 28 Ní nɛ ɔmɛ ya nɔ ngɛ Betania ngɛ Yordan Pa a se, he nɛ Yohane ngɛ nihi baptisie ngɛ ɔ.

29 E nɔ jena a, e na Yesu nɛ e ma e ngɔ, nɛ e de ke: “Nyɛɛ hyɛ, Mawu Jijɔ Bi ɔ nɛ e ngɔɔ je ɔ he yayami ɔ kɛ yaa a ji nɛ ɔ nɛ! 30 Nɔ nɛ ɔ ji nɔ nɛ i de ngɛ e he ke: ‘Nyumu ko maa ba ngɛ ye se nɛ́ e sɛ ye hlami, ejakaa e ngɛ loko i ba’ a nɛ. 31 Imi po jinɛ i li lɛ, se i ba ngɛ nihi baptisie ngɛ nyu mi konɛ kɛ gu lɔ ɔ nɔ ɔ, a je lɛ kpo kɛ tsɔɔ Israel.” 32 Yohane ye e he odase hulɔ. E de ke: “I na mumi ɔ nɛ ngɛ si kplee kɛ je hiɔwe kɛ ma kaa beleku lahuɛ, nɛ mumi ɔ ya nɔ nɛ e hi e nɔ. 33 Imi po jinɛ i li lɛ, se nɔ nɛ e tsɔ mi ke ma ba baptisi nihi ngɛ nyu mi ɔ de mi ke: ‘Nɔ nɛ o maa na kaa mumi ɔ ngɛ si kplee kɛ ma e nɔ, nɛ e maa ya nɔ nɛ e maa hi e nɔ ɔ, lɛ ji nɔ nɛ e baptisiɔ nihi ngɛ mumi klɔuklɔu ɔ mi ɔ nɛ.’ 34 Nɛ i na nɔ́ nɛ ɔ, nɛ i ye he odase kaa nɔ nɛ ɔ ji Mawu Bi ɔ nɛ.”

35 E nɔ jena ekohu ɔ, Yohane kɛ e kaseli ɔmɛ a kpɛti ni enyɔ daa si, 36 nɛ benɛ e na Yesu nɛ e ngɛ nyɛɛe ɔ, e de ke: “Nyɛɛ hyɛ, Mawu Jijɔ Bi ɔ ji nɛ ɔ nɛ!” 37 Benɛ kaseli enyɔ ɔmɛ nu nɛ e de nɔ́ nɛ ɔ, a nyɛɛ Yesu se. 38 Kɛkɛ nɛ Yesu plɛ e he, nɛ benɛ e na kaa a ngɛ e se nyɛɛe ɔ, e bi mɛ ke: “Mɛni nyɛ ngɛ hlae?” A de lɛ ke: “Rabi, (nɛ e sisi ji, “Tsɔɔlɔ”), jije ji o hi he?” 39 Nɛ e de mɛ ke: “Nyɛɛ ba, nɛ nyɛ maa na.” Enɛ ɔ he ɔ, a ya nɛ a ya na he nɛ e ngɛ ɔ, nɛ a kɛ lɛ hi lejɛ ɔ ligbi kake; enɛ ɔ ya nɔ maa pee ngmlɛfia nyɔngmane* ɔ mi. 40 Ni enyɔ ɔmɛ nɛ a nu nɔ́ nɛ Yohane de ɔ nɛ́ a ya nyɛɛ Yesu se ɔ, a kpɛti nɔ kake ji Andrea, nɛ ji Simon Petro nyɛminyumu ɔ. 41 E na lɛ nitsɛ e nyɛminyumu Simon kekle, nɛ e de lɛ ke: “Wa na Mesia a” (nɛ e sisi ji “Kristo” ɔ), 42 nɛ e nyɛɛ e hɛ mi kɛ ya Yesu ngɔ. Benɛ Yesu hyɛ lɛ ɔ, e de ke: “Mo ji Simon, Yohane binyumu ɔ nɛ; a ma tsɛ mo ke Kefa” (nɛ e sisi ji “Petro”).

43 E nɔ jena a, Yesu ngɛ hlae nɛ e maa je kɛ ho Galilea ya. Kɛkɛ nɛ e na Filipo nɛ e de lɛ ke: “Ba nyɛɛ ye se.” 44 Filipo je Betsaida, nɛ ji ma nɛ Andrea kɛ Petro je mi ɔ mi. 45 Filipo na Natanael nɛ e de lɛ ke: “Wa na nɔ nɛ Mose ngma e he sane ngɛ Mlaa a mi, nɛ Gbali ɔmɛ hu ngma e he sane ɔ: Yesu, Yosef bi ɔ nɛ e je Nazaret ɔ.” 46 Se Natanael bi lɛ ke: “Anɛ nɔ́ kpakpa ko ma nyɛ maa je Nazaret kɛ ba lo?” Filipo de lɛ ke: “Ba nɛ o ba hyɛ.” 47 Yesu na Natanael nɛ e ma e ngɔ, nɛ e de ngɛ e he ke: “Nyɛɛ hyɛ, Israelno ngmingmiingmi nɛ lakpa ko be e mi ji nɛ ɔ nɛ.” 48 Natanael bi lɛ ke: “Kɛ o plɛ kɛ le mi kɛɛ?” Yesu ha lɛ heto ke: “Benɛ o ngɛ fig tso ɔ sisi nɛ Filipo ná we nɛ e tsɛ mo lolo ɔ, i na mo.” 49 Natanael he nɔ ke: “Rabi, mo ji Mawu Bi ɔ nɛ, mo ji Israel Matsɛ ɔ nɛ.” 50 Yesu ha lɛ heto ke: “Akɛnɛ i de mo ke i na mo ngɛ fig tso ɔ sisi ɔ he je nɛ o he ye ɔ lo? O maa na ní nguanguahi nɛ pe enɛ ɔmɛ.” 51 Lɔ ɔ se ɔ, e de lɛ ke: “Niinɛ, ngɛ anɔkuale mi ɔ, i ngɛ nyɛ dee ke, nyɛ maa na nɛ hiɔwe nya bli nɛ Mawu bɔfo ɔmɛ ngɛ kuɔe, nɛ a ngɛ kplee kɛ ngɛ nɔmlɔ Bi ɔ ngɔ bae.”