Sɛ Womi Kɛ Ya Ha Kolose Bi Ɔmɛ
1 Paulo, Kristo Yesu bɔfo ngɛ Mawu suɔmi nya, kɛ wa nyɛminyumu Timoteo, 2 kɛ ya ha ni klɔuklɔu ɔmɛ nɛ a ngɛ Kolose nɛ a ji anɔkualetsɛmɛ nɛ a kɛ Kristo Yesu pee kake ɔ:
Nyɛ nine nɛ su dloomi kɛ tue mi jɔmi nɛ je Mawu nɛ ji wa Tsɛ ɔ ngɔ ɔ nɔ.
3 Ke wa ngɛ sɔlee ha nyɛ ɔ, wa naa Mawu, wa Nyɔmtsɛ Yesu Kristo Tsɛ ɔ si be fɛɛ be, 4 ejakaa wa nu hemi kɛ yemi nɛ nyɛ ngɛ ngɛ Kristo Yesu mi kɛ suɔmi nɛ nyɛ ngɛ kɛ ha ni klɔuklɔu ɔmɛ tsuo ɔ he 5 ngɛ hɛ kɛ nɔ fɔmi nɛ a kɛ to ha nyɛ ngɛ hiɔwe ɔ he je. Nyɛ nu hɛ kɛ nɔ fɔmi nɛ ɔ he be ko nɛ be ɔ kɛ gu sane kpakpa a he anɔkuale sɛ gbi ɔ 6 nɛ e ba su nyɛ ngɔ ɔ nɔ. Kaa bɔ nɛ sane kpakpa a ngɛ yiblii woe nɛ e ngɛ hɛ mi yae ngɛ je ɔ mi tsuo ɔ, jã kɛ̃ nɛ e ngɛ pee ngɛ nyɛ kpɛti kɛ je ligbi ɔ nɛ nyɛ nu nɛ nyɛ le Mawu dloomi ɔ saminya ngɛ anɔkuale mi ɔ. 7 Lɔ ɔ ji nɔ́ nɛ nyɛ kase kɛ je wa nyɛmi nyɔguɛ Epafra nɛ wa suɔ lɛ ɔ ngɔ ɔ nɛ, nɔ nɛ e ji Kristo sɔmɔlɔ anɔkualetsɛ ngɛ wa nane mi ɔ. 8 Lɛ hu e ha nɛ wa le nyɛ suɔmi ɔ ngɛ mumi mi.
9 Enɛ ɔ hu he je nɛ kɛ je ligbi ɔ nɛ wa nu he ɔ, wa kpa we sɔlemi kɛ nyɛ hami gblegbleegble, nɛ wa biɔ kaa nyɛ hyi tɔtɔɔtɔ kɛ e suɔmi nya ní ɔ he nile nitsɛnitsɛ, ngɛ juɛmi tsuo kɛ mumi mi níhi a sisi numi mi ɔ nɛ, 10 konɛ nyɛɛ nyɛɛ bɔ nɛ sa Yehowa* nɛ́ nyɛɛ sa e hɛ mi kɛ pi si, be mi nɛ nyɛ ngɛ nɔ yae nɛ nyɛ ngɛ yiblii woe ngɛ ní tsumi kpakpa fɛɛ ní tsumi kpakpa mi, nɛ́ Mawu he nile nitsɛnitsɛ ɔ nɛ nyɛ ngɛ ɔ ngɛ hiɛe ɔ; 11 nɛ a ngɔ he wami tsuo kɛ waje nyɛ ngɛ e he wami ngua a nɛ hɛ mi ngɛ nyami ɔ he je, konɛ nyɛɛ kɛ tsui si tomi kɛ bua jɔmi nɛ fĩ si saminya, 12 be mi nɛ nyɛ naa Tsɛ ɔ si, nɔ nɛ e ha nɛ nyɛ he su konɛ nyɛɛ kɛ ni klɔuklɔu ɔmɛ nɛ dla gbosi ní ngɛ la a mi ɔ.
13 E kpɔ̃ wɔ kɛ je diblii ɔ mi he wami ɔ mi, nɛ e ngɔ wɔ kɛ ba wo e Bi nɛ e suɔ lɛ ɔ matsɛ yemi ɔ mi, 14 nɔ nɛ e he je nɛ a ngmɛɛ wa he kɛ gu kpɔmi nɔ́ ɔ nɔ, nɛ ji wa he yayami ɔmɛ nɛ a kɛ pa wɔ ɔ. 15 Lɛ ji Mawu nɛ a nɛ lɛ ɔ henɔ, kekleekle bi ngɛ bɔ níhi tsuo a kpɛti; 16 ejakaa e nɔ nɛ a gu kɛ bɔ ní kpahi tsuo nɛ ngɛ hiɔwe kɛ zugba a nɔ ɔ nɛ, níhi nɛ a naa kɛ hɛ ngmɛ, kɛ níhi nɛ a nɛ kɛ hɛ ngmɛ, matsɛ sɛhi jio, nyɔmtsɛ yemihi jio, nɔ yemihi jio, blɔ nyahi jio. E nɔ nɛ a gu kɛ bɔ ní kpahi tsuo, nɛ lɛ nɛ a bɔ mɛ ngɔ ha. 17 Jehanɛ se hu ɔ, e ngɛ loko ní kpahi tsuo ba, nɛ e nɔ lɛ a gu kɛ ha nɛ ní kpahi tsuo ba si himi mi, 18 nɛ lɛ ji nɔmlɔ tso ɔ, nɛ ji asafo ɔ yi. Lɛ ji sisije ɔ, kekleekle bi kɛ je gbogboehi a kpɛti, konɛ e ba pee kekleekle nɔ ngɛ níhi tsuo mi; 19 Ejakaa e sa Mawu hɛ mi kaa e ma ha nɛ hyimi tsuo nɛ hi e mi, 20 nɛ Mawu maa gu e nɔ kɛ dla e kɛ níhi tsuo a kpɛti, níhi nɛ a ngɛ zugba a nɔ jio, níhi nɛ a ngɛ hiɔwe jio, konɛ kɛ gu e muɔ ɔ nɛ e plɛ kɛ pue sɛumi tso* ɔ nɔ ɔ nɔ ɔ, e ha nɛ tue mi jɔmi nɛ ba.
21 Niinɛ, nyɛ nɛ be ko nɛ be ɔ, nyɛ tsɔ nyɛ he, nɛ nyɛ ji he nyɛli akɛnɛ nyɛ juɛmi ngɛ ní tsumi yayamihi a nɔ ɔ he je ɔ, 22 amlɔ nɛ ɔ, e gu jamɛ a nɔ ɔ he lo nɔmlɔ tso ɔ gbenɔ ɔ nɔ kɛ dla nyɛɛ kɛ lɛ nyɛ kpɛti, konɛ e ngɔ nyɛ kɛ da si ngɛ e hɛ mi kaa nihi nɛ a ngɛ klɔuklɔu nɛ mu ko kɛ sane ko be a he— 23 se ngɛ anɔkuale mi ɔ, ja nyɛ ya nɔ ngɛ hemi kɛ yemi ɔ mi, nɛ nyɛ pi si ngɛ sisi tomi ɔ nɔ nɛ nyɛ mimiɛɛ we, nɛ nyɛ je we nyɛ he kɛ ji sane kpakpa a nɛ nyɛ nu nɛ a fiɛɛ ngɛ adebɔ níhi tsuo nɛ a ngɛ hiɔwe sisi ɔ a kpɛti ɔ he hɛ kɛ nɔ fɔmi ɔ he. Sane kpakpa nɛ ɔ he nɛ imi Paulo i ba pee sɔmɔlɔ ngɛ ɔ nɛ.
24 Amlɔ nɛ ɔ, i ngɛ nyae ngɛ amanehlu ɔmɛ nɛ i ngɛ nae ngɛ nyɛ he ɔ he je, nɛ i ngɛ níhi nɛ e piɛ ngɛ Kristo ɔ amanehlu ɔmɛ a mi ngɛ ye he lo ɔ mi ɔ mi gblee ngɛ e nɔmlɔ tso ɔ nane mi, nɛ lɔ ɔ ji asafo ɔ nɛ. 25 I ba pee asafo nɛ ɔ sɔmɔlɔ ngɛ we nɔ hyɛmi ní tsumi ɔ nɛ e je Mawu ngɔ nɛ a kɛ ha mi ngɛ nyɛ nane mi konɛ ma fiɛɛ Mawu munyu ɔ kɛ pi si ɔ nya, 26 laami sane nɛ e ngɛ klɔuu ɔ nɛ a ngɔ kɛ laa kɛ je blema níhi a blɔ nya tomi* ɔmɛ kɛ yi nɔ ɔmɛ nɛ a be ɔ mi ɔ. Se amlɔ nɛ ɔ, e je kpo ngɔ tsɔɔ e ni klɔuklɔu ɔmɛ, 27 nihi nɛ e sa Mawu hɛ mi kaa e ma ha nɛ a le laami sane nɛ e ngɛ klɔuu nɛ ɔ hɛ mi nyami babauu ɔ ngɛ je ma amɛ a kpɛti ɔ, nɛ ji Kristo nɛ e kɛ nyɛ pee kake ɔ e hɛ mi nyami ɔ he hɛ kɛ nɔ fɔmi ɔ. 28 Lɛ ji nɔ nɛ wa ngɛ jajee, nɛ wa ngɛ nɔ fɛɛ nɔ ga woe, nɛ wa ngɛ nɔ fɛɛ nɔ ní tsɔɔe ngɛ juɛmi tsuo mi, konɛ waa ngɔ nɔmlɔ fɛɛ nɔmlɔ kɛ da si kaa nɔ nɛ e hi kɛ pi si ngɛ Kristo mi. 29 Enɛ ɔ he ɔ, ngɛ anɔkuale mi ɔ, i ngɛ ní tsue wawɛɛ, i kɛ e he wami ɔ nɛ ngɛ ní tsue wawɛɛ ngɛ ye mi ɔ ngɛ ye he mɔde bɔe wawɛɛ.