5 Mose

7 “Ke Yehowa o Mawu ɔ kɛ mo ya su zugba nɛ e piɛ bɔɔ nɛ o maa su nɔ nɛ́ o maa ngɔ ɔ nɔ ɔ, e maa fiee je mahi nɛ a he hiɛ babauu ɔ hu ngɛ o hɛ mi: Hit bi ɔmɛ, Girgash bi ɔmɛ, Amor bi ɔmɛ, Kanaan bi ɔmɛ, Periz bi ɔmɛ, Hiv bi ɔmɛ, kɛ Yebus bi ɔmɛ. A ji je ma kpaago nɛ a he hiɛ nɛ a he wa pe nyɛ. 2 Yehowa o Mawu ɔ maa ngɔ mɛ kɛ wo o dɛ, nɛ o maa ye a nɔ kunimi. Bɔ fɛɛ bɔ nɛ ji ɔ, mo kpata a hɛ mi. O kɛ mɛ nɛ ko so somi ko, nɛ koo na mɛ mɔbɔ hulɔ. 3 O kɛ mɛ nɛ ko sɛ gba si himi mi.* Koo ngɔ o biyi ɔmɛ kɛ ha a binyumu ɔmɛ, nɛ koo ngɔ a biyi ɔmɛ kɛ ha o binyumu ɔmɛ hulɔ. 4 Ejakaa a ma ha nɛ o bimɛ ɔmɛ ma kpa ye se nyɛɛmi, nɛ a ma ya sɔmɔ mawu kpahi; ke e ba lɛ jã a, Yehowa mi mi ma fu nyɛ wawɛɛ, nɛ e ma kpata o hɛ mi amlɔ nɔuu.

5 “Mohu ɔ, nɔ́ nɛ nyɛɛ pee mɛ ji nɛ ɔ nɛ: Nyɛɛ ywia a we afɔle sami la tɛ ɔmɛ kɛ a wɔ titima amɛ, nɛ nyɛɛ poo a wɔ tso* ɔmɛ, nɛ nyɛɛ sã a we amaga amɛ. 6 Ejakaa o ji ma klɔuklɔu kɛ ha Yehowa o Mawu ɔ, nɛ Yehowa o Mawu ɔ hla mo kɛ je mahi tsuo nɛ a ngɛ zugba a nɔ ɔ a kpɛti kaa o ba pee e ma, e weto ní klɛdɛɛ.*

7 “Pi hiɛmi nɛ nyɛ he hiɛ pe ma kpa amɛ he je nɛ Yehowa je suɔmi kpo kɛ tsɔɔ nyɛ, nɛ́ e hla nyɛ, ejakaa nyɛ ji ma nyafii pe kulaa ngɛ ma amɛ tsuo a kpɛti. 8 Mohu ɔ, suɔmi nɛ Yehowa suɔ nyɛ, kɛ kita nɛ e kã nyɛ nɛmɛ ɔmɛ nɛ e ye nɔ ɔ he je nɛ Yehowa ngɔ kɔni si wami kɛ je nyɛ, konɛ e kɛ kpɔ̃ nyɛ kɛ je nyɔguɛ yemi mi,* kɛ je Egipt matsɛ Farao he wami* sisi ɔ nɛ. 9 O le saminya kaa Yehowa o Mawu ɔ ji anɔkuale Mawu, Mawu nɛ yeɔ anɔkuale, nɛ́ e yeɔ e somi nɔ, nɛ e jeɔ suɔmi nɛ se pui kpo kɛ tsɔɔ nihi nɛ a suɔ lɛ nɛ́ a yeɔ e mlaa amɛ a nɔ ɔ, kɛ ya siɔ yi nɔ akpe nɔ. 10 Se e ma kpata ni nɛmɛ nɛ a nyɛɛ lɛ ɔ a hɛ mi. E be tsle toe kaa e kɛ ni nɛmɛ nɛ a nyɛɛ lɛ ɔ maa ye; e ma kpata a hɛ mi. 11 Enɛ ɔ he ɔ, o hɛ nɛ hi mlaahi, kɛ blɔ tsɔɔmihi, kɛ kojomihi nɛ i kɛ ngɛ mo hae mwɔnɛ ɔ nɔ, nɛ o ye a nɔ.

12 “Ke nyɛ ya nɔ nɛ nyɛ bu kojomi nɛ ɔmɛ tue, nɛ nyɛ ye a nɔ, nɛ nyɛɛ kɛ tsu ní ɔ, Yehowa o Mawu ɔ maa ye e somi kɛ suɔmi nɛ se pui nɛ e kã o nɛmɛ ɔmɛ kita ngɛ he ɔ nɔ. 13 E maa suɔ mo, nɛ e maa jɔɔ mo, nɛ e ma ha nɛ o he maa hiɛ. Ee, e maa jɔɔ mo kɛ bimɛ babauu,* nɛ e maa jɔɔ o zugba a nɔ niba ní, o ngma, o wai ehe, o nu, o na amɛ a bimɛ, kɛ o to ɔmɛ a bimɛ ngɛ zugba nɛ e kã o nɛmɛ ɔmɛ kita kaa e kɛ ma ha mo ɔ nɔ. 14 O maa pee nɔ nɛ a jɔɔ lɛ pe kulaa ngɛ ma amɛ tsuo a kpɛti; nyumu ko loo yo ko be o mi hie nɛ e be fɔe, nɛ o lohwe ɔmɛ hu eko be si hie nɛ e be fɔe. 15 Yehowa ma je hiɔhi tsuo kɛ je o nɔ, nɛ e kɛ hiɔ yayahi nɛ o le ngɛ Egipt ɔ ekoeko be o nɔ bae. Mohu ɔ, e kɛ maa ba nihi tsuo nɛ a nyɛɔ mo ɔ a nɔ. 16 Mahi tsuo nɛ Yehowa o Mawu ɔ kɛ maa wo o dɛ ɔ, mo kpata a hɛ mi.* A he ko pee mo* mɔbɔ, nɛ ko sɔmɔ a mawu ɔmɛ hulɔ, ejakaa lɔ ɔ maa pee klama kɛ ha mo.

17 “Ke o de ngɛ o tsui mi ke, ‘Je ma nɛ ɔmɛ a he hiɛ pe wɔ. Kɛ ma plɛ kɛ fiee mɛ ha kɛɛ?’ ɔ, 18 koo ye mɛ gbeye. Mo kai nɔ́ nɛ Yehowa o Mawu ɔ pee Farao kɛ Egipt bi ɔmɛ tsuo ɔ, 19 kojomi* nguahi nɛ o na kɛ o hɛngmɛ, kɛ okadihi kɛ nyakpɛ níhi, kɛ kɔni si wami, kɛ bɔ nɛ Yehowa o Mawu ɔ ngɔ e he wami kpetekpleenyɛ ɔ* kɛ je mo ɔ. Jã nɛ Yehowa o Mawu ɔ maa pee mahi tsuo nɛ o yeɔ mɛ gbeye ɔ. 20 Yehowa o Mawu ɔ ma ha nɛ a hao,* kɛ ya si be nɛ ni nɛmɛ nɛ a piɛ, kɛ ni nɛmɛ nɛ a ngɛ a he laae kɛ je o hɛ mi ɔ a hɛ mi ma kpata. 21 Koo ye gbeye ngɛ a he je, ejakaa Yehowa o Mawu ɔ kɛ mo ngɛ, e ji Mawu kpetekpleenyɛ nɛ e he ngɛ gbeye.

22 “Bɔ fɛɛ bɔ nɛ ji ɔ, Yehowa o Mawu ɔ maa fiee je ma nɛ ɔmɛ bɔɔbɔɔbɔɔ kɛ je o hɛ mi. E be hae nɛ o kpata a hɛ mi oya nɔuu, bɔ nɛ pee nɛ nga mi lohwe awi yeli ɔmɛ a he nɛ ko ba hiɛ kɛ wo nyɛ he. 23 Yehowa o Mawu ɔ maa ngɔ mɛ kɛ wo o dɛ mi, nɛ e ma ha nɛ o ye a nɔ kunimi kulaa kɛ ya si be nɛ a hɛ mi ma kpata. 24 E maa ngɔ a matsɛmɛ ɔmɛ kɛ wo o dɛ mi, nɛ o ma tsu* a biɛhi ngɛ hiɔwe sisi. Nɔ ko nɔ ko be nyɛe maa da o hɛ mi kɛ ya si be nɛ o ma kpata a hɛ mi kulaa. 25 Nyɛɛ sã a mawu ɔmɛ a we amaga amɛ ngɛ la mi. Nɛ a he sika hiɔ kɛ sika tsu ɔmɛ hu o bua ko jɔ eko he, nɛ koo ngɔ eko hulɔ, bɔ nɛ pee nɛ e ko ba pee klama kɛ ha mo, ejakaa e ji ní hiemi* ní ha Yehowa o Mawu ɔ. 26 Koo ngɔ ní hiemi* níhi kɛ ba o we ɔ mi, nɛ́ o ba pee nɔ́ nɛ a ma kpata hɛ mi kaa jamɛ a nɔ́ ɔ. E sa nɛ o hie lɛ kulaa, nɛ e he nɛ pee mo tai, ejakaa e ji nɔ́ nɛ a ma kpata hɛ mi.