Abɛ
4 Ye bimɛ, nyɛɛ bu tsɛ tsɔsemi tue;
Nyɛɛ bu tue saminya konɛ nyɛ ná nɔ sisi numi,
2 Ejakaa ma ha nyɛ blɔ tsɔɔmi kpakpa;
Nyɛ ko kua ye ní tsɔɔmi ɔ.*
3 I ji bi kpakpa kɛ ha ye tsɛ,
Kɛ nɔ nɛ ye nyɛ suɔ wawɛɛ.
4 Ye tsɛ ɔ tsɔɔ mi ní, nɛ e de ke: “O tsui nɛ pɛtɛ ye munyu ɔmɛ a he wawɛɛ.
Moo ye ye mlaa amɛ a nɔ, konɛ o ya nɔ nɛ o hi wami mi.
5 Mo hla nile, mo hla nɔ́ sisi numi.
O hɛ nɛ ko je nɔ, nɛ ko gba kɛ je ye munyu ɔmɛ a he.
6 Ko kua, nɛ e maa po o he piɛ.
Moo suɔ, nɛ e maa bu o he.
7 Juɛmi ji nɔ́ nɛ he hia pe kulaa, lɔ ɔ he ɔ, mo hla juɛmi,
Nɛ ngɛ níhi tsuo nɛ o hla a se ɔ, mo hla nɔ́ sisi numi hulɔ.
8 E he nɛ hia mo wawɛɛ, nɛ e maa pee mo nɔmlɔ ngua.
Fua lɛ, nɛ e maa wo o hɛ mi nyami.
9 E maa ngɔ jlasi nɛ ngɛ fɛu kɛ bu o yi;
E maa ngɔ matsɛ pɛɛ nɛ ngɛ fɛu kɛ dla mo.”
10 Ye bi, bu tue, nɛ́ o kplɛɛ ye munyu ɔmɛ a nɔ,
Nɛ o wami se maa kɛ.
11 Ma tsɔɔ mo juɛmi blɔ ɔ;
Ma nyɛɛ o hɛ mi ngɛ dami blɔ ɔmɛ a nɔ.
12 Ke o ngɛ nyɛɛe ɔ, nɔ́ ko be mo blɔ tsie;
Nɛ ke o ngɛ fo tue ɔ, o be si tɛe.
13 Moo pɛtɛ tsɔsemi he; ko ha nɛ e je o dɛ.
Moo bu he, ejakaa e ma he o yi wami.
14 Koo gu yiwutsotsɛmɛ a blɔ nɔ,
Nɛ koo nyɛɛ yayami peeli a blɔ nɔ.
15 Moo yu o he ngɛ he, koo gu nɔ;
Gba kɛ je he, nɛ́ o be ngɛ he.
16 Ejakaa ke a pee we nɔ́ yayami ɔ, a nyɛ we mahe hwɔmi.
A hwɔ we mahe, ja a ha nɛ nɔ ko nɔ si.
17 Yi wu tso ní peepee ji abolo nɛ a yeɔ,
Nɛ basabasa peemi ji wai nɛ a nuɔ.
18 Se dali a blɔ ɔ ngɛ kaa mɔtu pu la nɛ ngɛ kpɛe,
Nɛ e yaa nɔ nɛ e kpɛɔ bɔɔbɔɔbɔɔ kɛ ya siɔ piani katakata.
19 Yiwutsotsɛmɛ a blɔ ɔ nɔ wo diblii kpii;
A li nɔ́ nɛ haa nɛ a tɛɔ si.
20 Ye bi, moo bu ye munyu ɔmɛ tue;
Moo bu ye munyu ɔmɛ tue saminya.*
21 O hɛ ko je a nɔ;
Ngɔɔ mɛ kɛ to ngɛ o tsui mi tɔɔ,
22 Nihi nɛ a nine suɔ nɔ ɔ maa hi wami mi
Nɛ a ma ná nɔmlɔ tso mi he wami kpakpa.
24 Mo je lakpa munyu* kɛ je o nya mi,
Nɛ ko ha nɛ sisimi munyu ko nɛ je o nya mi.
25 O hɛngmɛ nɛ hyɛ o hɛ mi tɛɛ,
Ee, ha nɛ o hɛngmɛ* nɛ hi nɔ́ nɛ ngɛ o hɛ mi ɔ nɔ.
26 Ha o blɔ ɔ nɔ nɛ da,*
Nɛ o blɔ ɔmɛ tsuo maa ye manye.
27 Ko gba kɛ ya hiɔ nɔ loo muɔ nɔ.
Je o he kɛ je nɔ́ yayami he.