Mateo Sane Kpakpa a
1 Womi nɛ tu Yesu Kristo,* David bi ɔ, kɛ Abraham bi ɔ weku kpa* he munyu:
2 Abraham fɔ Isak;
Isak fɔ Yakob;
Yakob fɔ Yuda kɛ e nyɛminyumu ɔmɛ;
3 Yuda kɛ Tama fɔ Perez kɛ Zera;
Perez fɔ Hezron;
Hezron fɔ Ram;
4 Ram fɔ Aminadab;
Aminadab fɔ Nashon;
Nashon fɔ Salmon;
5 Salmon kɛ Rahab fɔ Boaz;
Boaz kɛ Rut fɔ Obed;
Obed fɔ Yese;*
6 Yese fɔ Matsɛ David.
David kɛ Uria yo ɔ fɔ Salomo;
7 Salomo fɔ Rehoboam;
Rehoboam fɔ Abiya;
Abiya fɔ Asa;
8 Asa fɔ Yehoshafat;
Yehoshafat fɔ Yehoram;
Yehoram fɔ Uziah;
9 Uziah fɔ Yotam;
Yotam fɔ Ahaz;
Ahaz fɔ Hezekia;
10 Hezekia fɔ Manase;
Manase fɔ Amon;
Amon fɔ Yosia;
11 Benɛ a maa nuu Israelbi ɔmɛ nyɔguɛ kɛ ho Babilon ya a, Yosia fɔ Yekonia kɛ e nyɛminyumu ɔmɛ.
12 Benɛ a nuu mɛ nyɔguɛ kɛ ho Babilon ya se ɔ, Yekonia fɔ Shealtiel;
Shealtiel fɔ Zerubabel;
13 Zerubabel fɔ Abiud;
Abiud fɔ Eliakim;
Eliakim fɔ Azor;
14 Azor fɔ Zadok;
Zadok fɔ Akim;
Akim fɔ Eliud;
15 Eliud fɔ Eleazar;
Eleazar fɔ Mathan;
Mathan fɔ Yakob;
16 Yakob fɔ Yosef nɛ ji Maria huno ɔ. Maria lɛ e fɔ Yesu, nɔ nɛ a tsɛɔ lɛ ke Kristo ɔ nɛ.
17 Lɔ ɔ he ɔ, yi nɔ ɔmɛ tsuo ji nɛ ɔ nɛ: kɛ je Abraham nɔ kɛ ba su David nɔ ɔ peeɔ yi nɔ 14; kɛ je David nɔ kɛ ba su be nɛ a nuu Israelbi ɔmɛ nyɔguɛ kɛ ho Babilon ya a peeɔ yi nɔ 14; kɛ je be nɛ a nuu mɛ nyɔguɛ kɛ ya Babilon kɛ ba su be nɛ a fɔ Kristo ɔ peeɔ yi nɔ 14.
18 Se bɔ nɛ a plɛ kɛ fɔ Yesu Kristo ha ji nɛ ɔ nɛ. Benɛ Yosef wo Yesu nyɛ Maria si kaa e maa ngɔ lɛ, se e kɛ lɛ ba hí si lolo ɔ, mumi klɔuklɔu* ɔ ha nɛ e ngɔ hɔ. 19 Se akɛnɛ e huno Yosef ji dalɔ nɛ e sume kaa e ma pue Maria hɛ mi si he je ɔ, e to e yi mi kaa e kɛ lɛ maa po gba a mi nɛ́ nɔ ko be he nue. 20 Se benɛ e susu nɔ́ nɛ ɔ he ta a, hyɛ! Yehowa* bɔfo ko je e he kpo kɛ tsɔɔ lɛ ngɛ nlami mi, nɛ e de lɛ ke: “Yosef, David bi, koo ye gbeye kaa o maa ngɔ o yo Maria kɛ ho we mi ya, ejakaa mumi klɔuklɔu ɔ lɛ ha nɛ e ngɔ hɔ ɔ nɛ. 21 E ma fɔ binyumu, nɛ o maa wo lɛ biɛ ke Yesu,* ejakaa e ma he e we bi ɔmɛ a yi wami kɛ je a he yayami ɔmɛ a mi.” 22 Ní nɛ ɔmɛ tsuo ba mi konɛ munyu nɛ Yehowa* tu kɛ gu e gbalɔ ɔ nɔ ɔ nɛ ba mi. E de ke: 23 “Hyɛ! Yomiyo ɔ maa ngɔ hɔ, nɛ e ma fɔ binyumu, nɛ a maa wo lɛ biɛ ke Yimanuel,” nɛ e sisi ji, “Mawu Kɛ Wɔ Ngɛ.”
24 Kɛkɛ nɛ Yosef hɛ tsɛ̃ kɛ je mahe ɔ mi, nɛ e pee nɔ́ nɛ Yehowa* bɔfo ɔ de lɛ ɔ, nɛ e ngɔ e yo ɔ kɛ ho we mi ya. 25 Se Yosef kɛ Maria ná we bɔmi hluu kɛ ya si be nɛ e fɔ binyumu, nɛ e wo lɛ biɛ ke Yesu.