Yohane Sane Kpakpa a

2 Ngɛ ligbi etɛne ɔ nɔ ɔ, a ngmɛ yo kpeemi okplɔɔ ko ngɛ Kana, ngɛ Galilea, nɛ Yesu yayo ngɛ lejɛ ɔ. 2 A fɔ Yesu kɛ e kaseli ɔmɛ hu nine kɛ ya yo kpeemi okplɔɔ ngmɛmi ɔ sisi.

3 Benɛ wai ɔ miɔ nɛ e maa ta a, Yesu yayo de lɛ ke: “A be wai.” 4 Se Yesu de lɛ ke: “Yo,* mɛni enɛ ɔ kɔɔ ngɛ imi kɛ mo wa he? Ye be ɔ sui lolo.” 5 E yayo de ni nɛmɛ nɛ a ngɛ sɔmɔe ɔ ke: “Nɔ́ fɛɛ nɔ́ nɛ e ma de nyɛ ɔ, nyɛɛ pee.” 6 Jamɛ a be ɔ mi ɔ, tɛ buɛhi ekpa nɛ a kɛ nyu woɔ mi ngɛ lejɛ ɔ kaa bɔ nɛ Yudabi ɔmɛ a he tsukɔmi mlaa a tsɔɔ ɔ. Nyu susumi nɔ́* enyɔ loo etɛ yaa eko fɛɛ eko mi. 7 Yesu de mɛ ke: “Nyɛɛ yɛ nyu kɛ wo a mi nɛ a hyi tɔtɔɔtɔ.” Lɔ ɔ he ɔ, a wo a mi nyu nɛ a hyi tɔtɔɔtɔ. 8 Lɔ ɔ se ɔ, e de mɛ ke: “Jehanɛ ɔ, nyɛɛ yɛ eko kɛ ya ha nɔ nɛ e ngɛ okplɔɔ ngmɛmi ɔ nɔ hyɛe ɔ.” Kɛkɛ nɛ a yɛ eko kɛ ya. 9 Benɛ nɔ nɛ e ngɛ okplɔɔ ngmɛmi ɔ nɔ hyɛe ɔ sa e nya nyu nɛ amlɔ nɛ ɔ, e plɛ pee wai ɔ, akɛnɛ e li he nɛ e je kɛ ba he je ɔ (se sɔmɔli ɔmɛ nɛ a yɛ nyu ɔ lɛɛ a le), nɔ nɛ e ngɛ okplɔɔ ngmɛmi ɔ nɔ hyɛe ɔ tsɛ ayɛflo huno ɔ 10 nɛ e de lɛ ke: “Nɔ fɛɛ nɔ jeɔ wai kpakpa a kpo kekle, nɛ ke nihi de loko e jeɔ nɔ́ nɛ e hí ɔ kpo. Se moo lɛɛ o ngɔ wai kpakpa a kɛ to kɛ ba si amlɔ nɛ ɔ.” 11 Yesu pee nɔ́ nɛ ɔ ngɛ Kana, ngɛ Galilea kɛ je okadihi nɛ e pee ɔmɛ a sisi, nɛ e ha nɛ e hɛ mi nyami ɔ je kpo, nɛ e kaseli ɔmɛ he lɛ ye.

12 Ngɛ enɛ ɔ se ɔ, e kɛ e yayo kɛ e nyɛminyumu ɔmɛ kɛ e kaseli ɔmɛ kple kɛ ho Kapernaum ya, se a se ya kɛ we ngɛ lejɛ ɔ.

13 Jehanɛ ɔ, Yudabi ɔmɛ a Hetsɔmi ɔ su ta, nɛ Yesu kuɔ kɛ ya Yerusalem. 14 E ya na nihi nɛ a ngɛ nahi kɛ jijɔhi kɛ beleku lahuɛhi juae ɔ, kɛ sika tsakeli nɛ a hii si ngɛ a sɛhi a nɔ ngɛ sɔlemi we ɔ. 15 Enɛ ɔ he ɔ, e lo kpa, nɛ lɔ ɔ se ɔ, e fiee ni ɔmɛ tsuo kɛ a jijɔ ɔmɛ kɛ a na amɛ kɛ je sɔlemi we ɔ, nɛ e plɛ sika tsakeli ɔmɛ a sika a kɛ pue si, nɛ e tsɛ̃ a we okplɔɔ ɔmɛ ngɔ bu si. 16 Nɛ e de ni nɛmɛ nɛ a ngɛ beleku lahuɛ ɔmɛ juae ɔ ke: “Nyɛɛ ngɔ ní nɛ ɔmɛ kɛ je hiɛmɛ nɛ ɔ kɛ ho! Nyɛ kpa jua yemi ngɛ ye Tsɛ ɔ we ɔ!”* 17 E kaseli ɔmɛ kai kaa a ngma ke: “Suɔmi nɛ i ngɛ kɛ ha o we ɔ ngɛ kaa la nɛ ngɛ tsoe ngɛ ye mi.”

18 Lɔ ɔ he ɔ, Yudabi ɔmɛ bi lɛ ke: “Akɛnɛ o ngɛ ní nɛ ɔmɛ pee he je ɔ, mɛni okadi o ma nyɛ maa pee kɛ tsɔɔ wɔ?” 19 Yesu ha mɛ heto ke: “Nyɛɛ hule sɔlemi we nɛ ɔ kɛ pue si, nɛ ma ngɔ ligbi etɛ kɛ wo nɔ kɛ ma si.” 20 Kɛkɛ nɛ Yudabi ɔmɛ de ke: “Jeha 46 sɔuu lɛ a kɛ ma sɔlemi we nɛ ɔ, nɛ moo o maa ngɔ ligbi etɛ kɛ wo nɔ kɛ ma si lo?” 21 Se sɔlemi we nɛ e ngɛ he munyu tue ɔ ji e nɔmlɔ tso ɔ nɛ. 22 Benɛ a tle lɛ si kɛ je yɔkɔ ɔ mi ɔ, e kaseli ɔmɛ kai kaa e pɔɔ munyu nɛ ɔ tumi, nɛ a he ngmami ɔ kɛ nɔ́ nɛ Yesu de ɔ ye.

23 Se kɛ̃ ɔ, benɛ e ngɛ Yerusalem ngɛ Hetsɔmi gbijlɔ ɔ sisi ɔ, nihi babauu ná hemi kɛ yemi ngɛ e biɛ ɔ mi benɛ a na okadihi nɛ e ngɛ pee ɔ. 24 Se Yesu nitsɛ lɛɛ e kɛ e hɛ fɔɛ a nɔ, ejakaa e le mɛ tsuo 25 nɛ e he hia we kaa e ha nɛ nɔ ko nɛ e ye adesa he odase, ejakaa e le nɔ́ nɛ ngɛ adesa mi.