Yesaya

65 “I ha nɛ nihi nɛ a bi we ye si ɔ hla ye se blɔ;

I ha nɛ nihi nɛ a hla we ye se blɔ ɔ na mi.

 2 I bli ye dɛ mi ligbi mluku ɔ tsuo kɛ ha ma ko nɛ a tue wa,

Kɛ ha nihi nɛ a nyɛɛɔ ngɛ blɔ nɛ dɛ nɔ,

Nɛ́ a diɔ mɛ nitsɛmɛ a susumihi a se ɔ;

 3 Ma nɛ tɔ̃ɔ ye nɔ be fɛɛ be ngɛ ye hɛ mi,

Nɛ́ a sãã afɔle ngɛ abɔɔhi a mi, nɛ a sãã afɔle nɛ jeɔ lasuku ngɛ bliikisi nɔ.

 4 A hiɔ si ngɛ yɔkɔhi a mi,

Nɛ a hwɔɔ laami hehi* kɛ ya siɔ mɔtu,

Nɛ a yeɔ kpotoo lo,

Nɛ ní hiɔmi ní hwonyu* ngɛ a buɛhi a mi.

 5 A deɔ ke, ‘Hii he nɛ o ngɛ ɔ; koo ba ye kasa nya,

Ejakaa i ngɛ klɔuklɔu pe mo.’*

 6 Hyɛ! A ngma ngɛ ye hɛ mi;

I be si hie dii,

Mohu ɔ, ma wo mɛ hiɔ,

Ma wo mɛ hiɔ sisiisi*

 7 Ngɛ a tɔmi ɔmɛ kɛ a nɛmɛ ɔmɛ a tɔmi ɔmɛ a he je,” Yehowa lɛ de.

“Ejakaa a sã afɔle nɛ jeɔ lasuku ngɛ yoku ɔmɛ a nɔ

Nɛ a pue ye hɛ mi si ngɛ yoku wawi ɔmɛ a nɔ,

Nɔ́ nɛ ma pee kekle ji, ma susu a hiɔwo ɔ ha mɛ sisiisi.”*

“Kaa bɔ nɛ ke a na wai ehe ngɛ wai yiblii sau mi

Nɛ́ nɔ ko deɔ ke, nyɛ ko kpata hɛ mi, ejakaa nɔ́ kpakpa* ko ngɛ mi ɔ,’

Jã nɛ ma pee ngɛ ye sɔmɔli ɔmɛ a he je;

I be mɛ tsuo a hɛ mi kpatae.

 9 Ma ngɔ nina* ko kɛ je Yakob mi,

Nɛ ma ngɔ nɔ ko kɛ je Yuda, nɛ yoku ɔmɛ maa pee e weto ní;

Nɔ nɛ i hla a maa ngɔ,

Nɛ ye sɔmɔlɔ ɔ maa hi lejɛ ɔ.

10 Sharon ma ba pee jijɔhi a ní yemi he,

Nɛ Akor Dɔgba a mi maa pee nahi a he jɔɔmi he

Kɛ ha ye we bi nɛ a hlaa ye se blɔ ɔ.

11 Se nyɛ piɛɛ nihi nɛ a kua Yehowa a he,

Nihi nɛ a hɛ je ye yoku klɔuklɔu ɔ nɔ ɔ,

Nihi nɛ a ngmɛɔ okplɔɔ ha Siade mawu,

Kɛ nihi nɛ a ngɔɔ wai nɛ a futu mi kɛ woɔ kpluhi a mi tɔ kɛ haa Sɛsɛɛ mawu ɔ.

12 Lɔ ɔ he ɔ, ma ngɔ nyɛ kɛ ha klaate,

Nɛ nyɛ tsuo nyɛ ma kplã si konɛ a gbe nyɛ,

Ejakaa i tsɛ, se nyɛ he we mi nɔ,

I tu munyu, se nyɛ bui tue;

Nyɛ ya nɔ nɛ nyɛ pee ní yayamihi ngɛ ye hɛ mi,

Nɛ nyɛ hla kaa nyɛ maa pee níhi nɛ ye bua jɔɛ he.”

14 Hyɛ! Ye sɔmɔli ɔmɛ ma nya akɛnɛ a tsui ngɛ bua jɔmi ɔ he je,

Se nyɛɛ lɛɛ, nyɛ ma fo ya ngɛ nyɛ tsui nɛ ngɛ nyɛ yee ɔ he je

Nɛ nyɛ maa ye aywilɛho akɛnɛ nyɛ hao ɔ he je.

15 Nyɛ ma si biɛ ko, nɛ jamɛ a biɛ ɔ lɛ nihi nɛ i hla a kɛ maa gbiɛ,

Nɛ Nyɔmtsɛ Matsɛ Yehowa maa gbe nyɛ ti nɔ fɛɛ nɔ,

Se e maa ngɔ biɛ kpa kɛ tsɛ lɛ nitsɛ e sɔmɔli ɔmɛ;

16 Konɛ nɔ fɛɛ nɔ nɛ ma hla jɔɔmi kɛ ha e he ngɛ zugba a nɔ ɔ,

Anɔkuale* Mawu ɔ nɛ jɔɔ lɛ,

Nɛ nɔ fɛɛ nɔ nɛ ma kã kita ngɛ zugba a nɔ ɔ

Nɛ e ngɔ anɔkuale* Mawu ɔ kɛ kã.

Ejakaa hɛ maa je blema haomi ɔmɛ a nɔ;

Ye hɛngmɛ be nae hu.

17 Ejakaa hyɛ! I ngɛ hiɔwe ehe kɛ zugba ehe bɔe;

Nɛ blema ní ɔmɛ be juɛmi mi bae,*

Nɛ a be tsui mi bae hulɔ.

Ejakaa hyɛ! I ngɛ Yerusalem nɛ ma ha nɛ nihi a bua maa jɔ ɔ bɔe

Nɛ i ngɛ e mi bimɛ bɔe nɛ a ma ha nɛ bua jɔmi maa ba.

19 Nɛ ye bua maa jɔ ngɛ Yerusalem he je, nɛ ma nya ngɛ ye we bi ɔmɛ a he je;

A be ya fomi loo kɔmɔ yemi he nue ngɛ e mi hu.”

20 “Bimwɔyo be si hie be bɔɔ pɛ kɛkɛ nɛ e ma gbo,

Nɛ jã nɔuu nɛ nɔmoyo hu be gboe be mi nɛ e yi e wami ligbi ɔ tsuo.

Ejakaa nɔ fɛɛ nɔ nɛ maa ye jeha lafa nɛ e ma gbo ɔ, a maa na lɛ kaa jokuɛ wayoo kɛkɛ,

Nɛ yayami peelɔ ɔ, ke e ye jeha lafa po a maa gbiɛ lɛ.*

21 A maa ma wehi nɛ a maa hi a mi,

Nɛ a maa pee wai ngmɔhi nɛ a maa ye a mi yiblii.

22 A be we mae nɛ nɔ kpa ko ma ba hi mi,

Nɛ a be ní due nɛ nɔ kpa ma ba ye mi ní.

Ejakaa ye we bi ɔmɛ a ligbi ɔmɛ maa pee kaa tsohi a ligbi,

Nɛ nihi nɛ i hla a maa ye ní nɛ a tsu ɔ mi ní nɛ a maa tɔ.

23 A be yaka dengme gboe,

Nɛ a be bimɛ fɔe kɛ ha haomi hulɔ,

Ejakaa nihi nɛ Yehowa jɔɔ mɛ ɔ a nina* ji mɛ,

A kɛ a sisi bimɛ.

24 Loko a ma tsɛ mi po ɔ, ma he mɛ nɔ;

Be mi nɛ a ngɛ munyu tue nɛ a gbi nya a, ma nu.

25 Ogbetee kɛ jijɔ ma bla kɛ ye ní,

Jata ma kpe nga kaa na,

Nɛ zu maa pee sinɔ niye ní.