Yesaya
6 Ngɛ jeha nɛ Matsɛ Uziah gbo ɔ mi ɔ, i na Yehowa nɛ e hii si ngɛ matsɛ sɛ gojoo ko nɛ a wo nɔ ɔ nɔ, nɛ e tade klɔii ɔ nya hyi sɔlemi we ɔ. 2 Serafhi daa si ngɛ e yi nɔ; a ti nɔ fɛɛ nɔ ngɛ pɛli ekpa. A ti nɔ fɛɛ nɔ* kɛ pɛli enyɔ ha e hɛ mi, nɛ e kɛ enyɔ ha e nane he, nɛ e kɛ enyɔ teɔ kɛ yaa kɛ baa.
3 Nɛ a ti nɔ fɛɛ nɔ deɔ e sibi ke;
“Klɔuklɔu, klɔuklɔu, klɔuklɔu ji Yehowa tabohiatsɛ ɔ.
E hɛ mi nyami ɔ hyi zugba a nɔ tsuo tɔ.”
4 Nɛ ngmlaa nɛ a kpa a nya wami ɔ* ha nɛ sinya plɛmi he ɔmɛ ngɛ sinya kpoku ɔmɛ a nɔ ɔ mimiɛ, nɛ lasuku hyi we ɔ tɔ.
5 Kɛkɛ nɛ i de ke: “Kpo mo ha mi!
I gbo ta,*
Ejakaa i ji adesa nɛ e nya he tsɔ we,
Nɛ i ngɛ nihi nɛ a nya he tsɔ we a kpɛti;
Ejakaa ye hɛngmɛ na Matsɛ ɔ, Yehowa tabohiatsɛ ɔ nitsɛ!”
6 Kɛkɛ nɛ seraf ɔmɛ a kpɛti nɔ kake te kɛ ba ye ngɔ, nɛ e hɛɛ la ngu hɛuu nɛ e kɛ abɛɛle kɔ kɛ je afɔle sami latɛ ɔ nɔ ngɛ e dɛ. 7 E ta ye nya he nɛ e de ke:
“Hyɛ! Nɔ́ nɛ ɔ sa o nya he.
A je o fɔ yemi ɔ,
Nɛ a ngɔ o he yayami ɔ kɛ ke mo.”*
8 Kɛkɛ nɛ i nu Yehowa gbi nɛ ngɛ bie ke: “Mɛnɔ ma tsɔ, nɛ mɛnɔ maa ya ha wɔ?” Nɛ i de ke: “I ngɛ hiɛ ɔ! Moo tsɔ mi!”
9 Nɛ e he nɔ ke, “Yaa nɛ o ya de nimli nɛ ɔmɛ ke:
‘Nyɛ maa nu si abɔ,
Se nyɛ be sisi nue;
Nyɛ maa na si abɔ,
Se nyɛ be nile ko náe.’
10 Ha nɛ nimli nɛ ɔmɛ a tsui nɛ kplii,
Ha nɛ a tue mi nɛ ti,
Nɛ́ o ha nɛ a hɛngmɛ ɔmɛ nɛ ma,
Konɛ a ko hyɛ kɛ a hɛngmɛ,
Nɛ́ a ko nu kɛ a tue,
Konɛ a tsui nɛ ko nu sisi,
Nɛ́ a ko kpale a se nɛ a tsa mɛ.”
11 Kɛkɛ nɛ i bi ke: “Oo Yehowa, kɛ yaa si mɛni be?” Nɛ e de ke:
“Kɛ yaa si be nɛ ma amɛ a hɛ mi ma kpata nɛ nɔ ko be a mi hie hu,
Nɛ́ nihi be we ɔmɛ a mi hie hu,
Nɛ́ zugba a hɛ mi ma kpata nɛ e maa pee ma doku;
12 Kɛ yaa si be nɛ Yehowa ma je nihi kɛ ho tsitsaa ya,
Nɛ́ zugba a maa pee ma doku kulaa.
13 “Se kɛ̃ ɔ, mi dlami nyɔngma mi kake maa piɛ ngɛ nɔ, nɛ a maa kpale sã lɛ ekohu kaa tso ngua ko kɛ oak tso nɛ́ ke a po mɛ kɛ fɔ si ɔ, a siɔ tso kpoku ɔ; ngmɛdu* klɔuklɔu maa pee e tso kpoku.”