Yesaya
46 Bel ngɔ e hɛ mi kɛ bu si, Nebo ma e yi si.
A ngɔ a we amaga amɛ kɛ pue lohwehi a se mi, a kɛ pue lohwehi nɛ a kɛ muɔɔ tlomi ɔ a nɔ,
Kaa tlomi nɛ mi jiɔ nɛ a kɛ tloo lohwehi nɛ pɔ tɔ a he.
2 Mɛ tsuo a ma a yi si nɛ a ngɔ a hɛ mi kɛ bu si;
A be nyɛe ma kpɔ̃ tlomi ɔmɛ,*
Nɛ mɛ nitsɛmɛ* hu a ma ya je nyɔguɛ yemi mi
3 “Oo Yakob we, kɛ nyɛ nihi tsuo nɛ piɛ ngɛ Israel we ɔ, nyɛɛ bu mi tue,
Mo nɛ i ye bua mo kɛ je o fɔmi mi nɛ i hyɛ o nɔ kɛ je fɔmi kotoku mi ɔ.
4 Ke o bwɔ po, i be tsakee;
Ke o yi bwɔmi hɛ mua po, ma ya nɔ nɛ ma hɛɛ o mi.
Kaa bɔ nɛ i pee kɛ ba si amlɔ nɛ ɔ, ma hyɛ o nɔ, nɛ ma hɛɛ o mi, nɛ ma kpɔ̃ mo.
5 Mɛnɔ he nɛ nyɛ maa ngɔ mi kɛ to, aloo nyɛ ma de ke e kɛ mi sɔ, loo e ngɛ kaa imi,
Nɛ wa je wa sibi?
6 Ni komɛ ngɛ nɛ a plɛɔ sika tsu kɛ jeɔ a sika kpɛɛ mi;
A ngmɛɛ sika hiɔ ngɛ sɛni nɔ.
A bɔɔ dade he ní tsulɔ apaa nɛ e kɛ peeɔ amaga
Kɛkɛ ɔ, a kplãã si haa lɛ, ee, a jaa lɛ.*
7 A woɔ nɔ kɛ fɔɔ a konɔ;
A kɛ ya maa e mahe, nɛ e hiɔ he nɛ a kɛ lɛ ma a pɛ.
E hiɛ e nane kɛ ji he nɛ a kɛ lɛ ma a.
A kpaa ngmla kɛ tsɛɔ lɛ, se e pui a nya mi fɛɛ;
E be nyɛe ma kpɔ̃ nɔ ko kɛ je haomi mi.
8 Nyɛ kai nɔ́ nɛ ɔ, nɛ́ nyɛɛ pee kã.
Nyɛ kɛ to ngɛ nyɛ tsui mi nyɛ yayami peeli.
Imi ji Mawu, nɛ nɔ ko be nɛ e ngɛ kaa imi.
10 Kɛ je sisije lɛ i gba níhi nɛ maa ba,
Nɛ kɛ je blema lokoo nɛ i de níhi nɛ a bɛ mi lolo.
I de ke, ‘Yi mi kpɔ nɛ i mwɔ* ɔ maa ba mi kokooko,
Nɛ ma pee nɔ́ fɛɛ nɔ́ nɛ i suɔ.’
11 I ngɛ lohwe pɛlitsɛ ko nɛ e yeɔ lohwe kpahi tsɛe kɛ je puje he,
Nɛ i ngɛ nɔ ko tsɛe kɛ je zugba ko nɛ e nɔ kɛ wawɛɛ ɔ nɔ konɛ e ba tsu yi mi kpɔ nɛ i mwɔ ɔ* he ní.
I tu munyu, nɛ i be ye nya se kpalee.
I to ye yi mi, nɛ ma tsu he ní.
12 Nyɛ nihi nɛ nyɛ tsui ti,* nyɛɛ bu mi tue,
Nyɛ nɛ nyɛɛ kɛ nɔ́ nɛ da peemi he kɛ.
13 I ha nɛ ye dami ɔ su si ta;
E be se tsitsaa,
Nɛ ye yi wami hemi ɔ be se kpɛe.
Ma ha nɛ yi wami hemi maa ba Zion, nɛ i kɛ ye hɛ mi nyami ɔ ma ha Israel.”