1 Kronika
27 Israelbi ɔmɛ, nɛ ji a tsɛmɛ a we ɔmɛ a nyatsɛmɛ ɔmɛ, nimli akpehi kɛ nimli lafahi a nya dali ɔmɛ, kɛ a nikɔtɔma amɛ nɛ a sɔmɔɔ matsɛ ɔ, nɛ́ a tsuɔ kuu ɔmɛ nɛ a baa nɛ a yaa daa nyɔhiɔ ngɛ jeha a mi tsuo ɔ, a sane fɛɛ sane he ní ɔ, a yibɔ ji nɛ ɔ nɛ; nihi 24,000 lɛ ngɛ kuu fɛɛ kuu mi.
2 Nɔ nɛ hyɛɔ kekleekle kuu ɔ nɛ ba sɔmɔɔ ngɛ kekleekle nyɔhiɔ ɔ mi ɔ nɔ ji Yashobeam, nɛ ji Zabdiel binyumu ɔ, nɛ nihi 24,000 lɛ ngɛ e kuu ɔ mi. 3 Ngɛ Perez binyumu ɔmɛ a kpɛti ɔ, lɛ ji kuu ɔmɛ nɛ a sɔmɔɔ ngɛ kekleekle nyɔhiɔ ɔ mi ɔ a nya dali ɔmɛ tsuo a nyatsɛ. 4 Nɔ nɛ hyɛɔ kuu ɔ nɛ ba sɔmɔɔ ngɛ nyɔhiɔ nɛ ji enyɔne ɔ mi ɔ ji Dodai, Ahohino ɔ, kɛ e kuu ɔ, nɛ Miklot ji a hɛ mi nyɛɛlɔ, nɛ nihi 24,000 lɛ ngɛ e kuu ɔ mi. 5 Kuu nɛ ji etɛ ɔ nɛ ba sɔmɔɔ ngɛ nyɔhiɔ etɛne ɔ mi ɔ nya dalɔ ji Benaya, nɛ ji osɔfo nɔkɔtɔma Yehoyada binyumu ɔ, nɛ nihi 24,000 lɛ ngɛ e kuu ɔ mi. 6 Benaya nɛ ɔ ji tatsɛ nɛ he wa ngɛ nimli nyingmi etɛ ɔmɛ a kpɛti, nɛ lɛ nɛ e hyɛɔ nimli nyingmi etɛ ɔmɛ a nɔ, nɛ e binyumu Amizabad ji nɔ nɛ hyɛɔ e kuu ɔ nɔ. 7 Nɔ nɛ ji eywiɛ nɛ a hla kɛ ha nyɔhiɔ nɛ ji eywiɛ ɔ ji Asahel, Yoab nyɛminyumu ɔ, nɛ e binyumu Zebadia lɛ yeɔ e se, nɛ nihi 24,000 lɛ ngɛ e kuu ɔ mi. 8 Nya dalɔ nɛ ji enuɔ nɛ a hla kɛ ha nyɔhiɔ nɛ ji enuɔ ɔ ji Shamhut, Izrahino ɔ, nɛ nihi 24,000 lɛ ngɛ e kuu ɔ mi. 9 Nɔ nɛ ji ekpa nɛ a hla kɛ ha nyɔhiɔ nɛ ji ekpa a ji Ira, Tekoano Ikesh binyumu ɔ, nɛ nihi 24,000 lɛ ngɛ e kuu ɔ mi. 10 Nɔ nɛ ji kpaago nɛ a hla kɛ ha nyɔhiɔ nɛ ji kpaago ɔ ji Helez, Pelonno ɔ nɛ je Efraimbi ɔmɛ a kpɛti ɔ, nɛ nihi 24,000 lɛ ngɛ e kuu ɔ mi. 11 Nɔ nɛ ji kpaanyɔ nɛ a hla kɛ ha nyɔhiɔ nɛ ji kpaanyɔ ɔ ji Sibekai, Hushano ɔ nɛ je Zerabi ɔmɛ a kpɛti ɔ, nɛ nihi 24,000 lɛ ngɛ e kuu ɔ mi. 12 Nɔ nɛ ji nɛɛ nɛ a hla kɛ ha nyɔhiɔ nɛ ji nɛɛ ɔ ji Abiezer, Anatotno ɔ nɛ je Benyaminbi ɔmɛ a kpɛti ɔ, nɛ nihi 24,000 lɛ ngɛ e kuu ɔ mi. 13 Nɔ nɛ ji nyɔngma nɛ a hla kɛ ha nyɔhiɔ nɛ ji nyɔngma a ji Maharai, Netofano ɔ nɛ je Zerabi ɔmɛ a kpɛti ɔ, nɛ nihi 24,000 lɛ ngɛ e kuu ɔ mi. 14 Nɔ nɛ ji 11 nɛ a hla kɛ ha nyɔhiɔ nɛ ji 11 ɔ ji Benaya, Piratonno nɛ je Efraim binyumu ɔmɛ a kpɛti ɔ, nɛ nihi 24,000 lɛ ngɛ e kuu ɔ mi. 15 Nɔ nɛ ji 12 nɛ a hla kɛ ha nyɔhiɔ nɛ ji 12 ɔ ji Heldai, Netofano ɔ nɛ je Otniel binyumu ɔmɛ a kpɛti ɔ, nɛ nihi 24,000 lɛ ngɛ e kuu ɔ mi.
16 Israel wɛtso ɔmɛ a hɛ mi nyɛɛli ɔmɛ ji nɛ ɔmɛ nɛ: Ngɛ Rubenbi ɔmɛ a kpɛti ɔ, Eliezer, nɛ ji Zikri binyumu ɔ ji a hɛ mi nyɛɛlɔ; ngɛ Simeonbi ɔmɛ a kpɛti ɔ, Shefatia, Maaka binyumu ɔ; 17 ngɛ Levibi ɔmɛ a kpɛti ɔ, Hashabia, Kemuel binyumu ɔ; ngɛ Aaronbi ɔmɛ a kpɛti ɔ, Zadok; 18 ngɛ Yudabi ɔmɛ a kpɛti ɔ, Elihu, nɛ ji David nyɛminyumu ɔmɛ a ti nɔ kake; ngɛ Isakarbi ɔmɛ a kpɛti ɔ, Omri, Mikael binyumu ɔ; 19 ngɛ Zebulunbi ɔmɛ a kpɛti ɔ, Ishmaya, nɛ ji Obadia binyumu ɔ; ngɛ Naftalibi ɔmɛ a kpɛti ɔ, Yerimot, Azriel binyumu ɔ; 20 ngɛ Efraimbi ɔmɛ a kpɛti ɔ, Hoshea, Azazia binyumu ɔ; ngɛ Manase wɛtso fã a mi ɔ, Yoel, Pedaya binyumu ɔ; 21 ngɛ Manase wɛtso fã a nɛ ngɛ Gilead ɔ mi ɔ, Ido, Zakaria binyumu ɔ; ngɛ Benyaminbi ɔmɛ a kpɛti ɔ, Yaasiel, Abner binyumu ɔ; 22 ngɛ Danbi ɔmɛ a kpɛti ɔ, Azarel, Yeroham binyumu ɔ. Ni nɛ ɔmɛ ji Israel wɛtso ɔmɛ a mi nikɔtɔmahi.
23 David kane we nihi nɛ a ye jeha 20 kɛ ni nɛmɛ nɛ a sui jã a, ejakaa Yehowa wo si kaa e ma ha nɛ Israel he maa hiɛ babauu kaa hiɔwe dodoehi. 24 Yoab, nɛ ji Zeruya binyumu ɔ bɔni mɛ kanemi, se e gbi nya; nɛ Mawu we abofu ba Israel nɔ* ngɛ enɛ ɔ he je, nɛ a ngɔɛ yibɔ nɛ a ná a kɛ piɛɛ we Matsɛ David be ɔ mi yi nɔ sane amaniɛ bɔmi ɔ he.
25 Nɔ nɛ hyɛɔ matsɛ ɔ juetli to he ɔmɛ a nɔ ji Azmavet, Adiel binyumu ɔ. Yonatan, nɛ ji Uziah binyumu ɔ lɛ hyɛɔ nito he* ɔmɛ nɛ a ngɛ ngmɔ ɔmɛ, ma amɛ, kɔpe ɔmɛ, kɛ mɔ ɔmɛ a mi ɔ nɔ. 26 Nɔ nɛ hyɛɔ ní tsuli nɛ a huɔ ngmɔ ɔ a nɔ ɔ ji Ezri, Kelub binyumu ɔ. 27 Nɔ nɛ hyɛɔ wai ngmɔ ɔmɛ a nɔ ji Shimei, Ramano ɔ; nɔ nɛ hyɛɔ wai yiblii nɛ a kɛ peeɔ wai ɔ nɔ ji Zabdi, Shifmino ɔ. 28 Nɔ nɛ hyɛɔ oliv ngmɔ ɔmɛ kɛ sikamore tso ɔmɛ nɛ a ngɛ Shefela a nɔ ji Baal Hanan, Gederno ɔ; nɔ nɛ hyɛɔ nu to he ɔmɛ a nɔ ji Yoash. 29 Nɔ nɛ hyɛɔ na amɛ nɛ a yeɔ ní ngɛ Sharon ɔ nɔ ji Shitrai, Sharonno ɔ, nɛ nɔ nɛ hyɛɔ na amɛ nɛ a ngɛ dɔ ɔ mi ɔ a nɔ ji Shafat, Adlai binyumu ɔ. 30 Nɔ nɛ hyɛɔ afukpɔngɔ ɔmɛ a nɔ ji Obil, Ishmaelno ɔ; nɔ nɛ hyɛɔ teji yi ɔmɛ a nɔ ji Yedeya, Meronotno ɔ. 31 Nɔ nɛ hyɛɔ to kuu ɔmɛ a nɔ ji Yaziz, Hagrino ɔ. Ni nɛ ɔmɛ tsuo ji Matsɛ David weto ní ɔmɛ a nya dali.
32 Yonatan, nɛ ji David nyɛmi binyumu ɔ ji ga wolɔ, nɛ e ji nyumu nɛ nuɔ nɔ́ sisi, nɛ e ji womi ngmalɔ hulɔ, nɛ Yehiel, Hakmoni binyumu ɔ hyɛɛ matsɛ ɔ binyumu ɔmɛ a nɔ. 33 Ahitofel ji matsɛ ɔ ga wolɔ, nɛ Hushai, Arkino ɔ ji matsɛ ɔ huɛ.* 34 Ngɛ Ahitofel se ɔ, Yehoyada, nɛ ji Benaya binyumu ɔ, kɛ Abiatar; nɛ Yoab ji matsɛ ɔ tabo ɔ nya dalɔ.