Hiob
22 Kɛkɛ nɛ Elifaz nɛ je Teman ɔ de ke:
2 “Anɛ nɔmlɔ adesa he ngɛ se nami ko ha Mawu lo?
Anɛ nɔ ko nɛ ngɛ nɔ́ se kɔmi he maa ba se nami kɛ ha lɛ lo?
4 Anɛ e maa gbla o tue
Nɛ e kɛ mo maa ya kojomi he akɛnɛ o yeɔ lɛ gbeye ɔ lo?
5 Anɛ pi mo nitsɛ o yayami peemi ɔ nɛ hiɛ babauu
Kɛ tɔmihi nɛ o yaa nɔ nɛ o tɔ̃ɔ he je nɛ e ba jã lo?
6 Ke o pa sika kɛ ha nihi ɔ, o ngɔɔ níhi ngɛ a dɛ yaka gu.
Nɛ o kpɔɔ bo ngɛ nihi a he nɛ a hɛɔ a he gu.*
7 O ha we nɔ nɛ pɔ tɔ lɛ ɔ nyu nɛ́ e nu,
Nɛ o ha we nɔ nɛ hwɔ ngɛ lɛ yee ɔ niye ní nɛ́ e ye.
8 Nyumu nɛ he wa nɔ́ ji zugba a nɛ,
Nɛ nɔ nɛ hɛ mi ngɛ nyami ɔ lɛ hiɔ nɔ.
9 Se o haa nɛ yalɔyihi hoɔ kɛ a dɛ mi gu,
Nɛ o kuɔ awusa bimɛ* a nine.
10 Enɛ ɔ he je nɛ klamahi* bɔle mo kɛ kpe ɔ nɛ,
Nɛ gbeye níhi woɔ o he gbeye tlukaa nɛ;
11 Enɛ ɔ he je nɛ diblii wo nɛ o nyɛ we nɛ o hyɛ nɔ́ ɔ nɛ,
Nɛ nyu kpekpemi ha o nɔ ɔ nɛ.
12 Anɛ Mawu be hiɔwe lokoo lo?
Nɛ moo hyɛ bɔ nɛ dodoe ɔmɛ ngɛ tsitsaa lokoo ha.
13 Se o de ke: ‘Mɛni kulaa lɛ Mawu le?
Anɛ e ma nyɛ maa kojo kɛ gu diblii kpii mi lo?
14 Bɔkuhi ha e hɛ mi bɔ nɛ pee nɛ e ko hyɛ nɔ́
Benɛ e ngɛ nyɛɛe ngɛ hiɔwe tsitsaa lokoo ɔ.’
15 Anɛ o maa nyɛɛ blema blɔ
Nɛ́ nimli yayahi nyɛɔ nɔ ɔ nɔ lo?
16 Blɔ nɛ nihi nɛ́ a sa mɛ kɛ ho loko e su a be,
Nɛ́ nyu kpekpemi fɔ a sisi tomi ɔ kɛ je ɔ nɔ lo?
17 A ngɛ anɔkuale Mawu ɔ dee ke: ‘Ko gba wa nya!’
Nɛ a de hu ke ‘Mɛni Ope ɔ ma nyɛ maa pee wɔ?’
18 Se lɛ nɛ e haa nɛ a we mi hyiɔ tɔ kɛ ní kpakpahi.
(susumi yayahi kaa kikɛ nɛ ɔ lɛɛ, a bɛ ye yi mi kulaa.)
19 Nihi nɛ a da a maa na nɔ́ nɛ ɔ nɛ a ma nya,
Nɛ nɔ nɛ sane ko be e he ɔ maa ye a he fɛu nɛ e ma de ke:
20 ‘A kpata wa he nyɛli ɔmɛ a hɛ mi,
Nɛ la ma kpata a níhi nɛ piɛ ɔ hɛ mi.’
21 Moo le Lɛ, nɛ o ma ná tue mi jɔmi;
Kɛkɛ ɔ, o ma ná ní kpakpahi.
22 Moo kplɛɛ mlaa nɛ je e nya mi ɔ nɔ,
Nɛ o ngɔ e munyu ɔmɛ kɛ to o tsui mi.
23 Ke o kpale kɛ ba Ope ɔ ngɔ ɔ, o ma ná ní ekohu;
Ke o je nɔ́ nɛ dɛ kɛ je o bo tsu ɔ mi,
24 Nɛ o sake o sika tsu* ɔ kɛ fɔ zugba
Nɛ o sake sika tsu nɛ je Ofir kɛ pue tɛsahi a kpɛ ɔ,
25 Kɛkɛ ɔ, Ope ɔ ma ba pee o sika tsu,*
Nɛ e maa pee o sika hiɔ nɛ hi pe kulaa.
26 Kɛkɛ ɔ, o bua maa jɔ ngɛ Ope ɔ mi,
Nɛ o ma wo o hɛ nɔ kɛ tsɔɔ Mawu.
27 O ma kpa lɛ pɛɛ, nɛ e maa bu mo tue;
Nɛ o maa ye o si womi ɔmɛ a nɔ.
28 Nɔ́ fɛɛ nɔ́ nɛ o to o yi mi kaa o maa pee ɔ maa ye manye,
Nɛ la ma kpɛ kɛ pue o blɔ ɔ nɔ.
29 Ejakaa ke o kɛ he nɔ womi tu munyu ɔ, o hɛ mi ma pue si,
Se nɔ nɛ baa e he si* lɛɛ, e ma he e yi wami.
30 E ma he nihi nɛ sane ko be a he ɔ a yi wami;
Lɔ ɔ he ɔ, ke o nine he tsɔ ɔ, lɛɛ bɔ fɛɛ bɔ nɛ ji ɔ, e ma he o yi wami.”