La
136 Nyɛɛ na Yehowa si, ejakaa e hi;
E suɔmi nɛ se pui ɔ ngɛ kɛ yaa neneene.
2 Nyɛɛ na mawuhi a Mawu ɔ si,
Ejakaa e suɔmi nɛ se pui ɔ ngɛ kɛ yaa neneene.
3 Nyɛɛ na nyɔmtsɛmɛ a Nyɔmtsɛ ɔ si,
Ejakaa e suɔmi nɛ se pui ɔ ngɛ kɛ yaa neneene.
4 Lɛ pɛ nɛ e peeɔ nyakpɛ ní nguanguahi,
Ejakaa e suɔmi nɛ se pui ɔ ngɛ kɛ yaa neneene.
5 E kɛ ga* pee hiɔwe ɔ,
Ejakaa e suɔmi nɛ se pui ɔ ngɛ kɛ yaa neneene.
6 E bli zugba a mi ngɛ nyu nɔ,
Ejakaa e suɔmi nɛ se pui ɔ ngɛ kɛ yaa neneene.
7 E pee kane nguangua amɛ,
Ejakaa e suɔmi nɛ se pui ɔ ngɛ kɛ yaa neneene,
8 E pee pu ɔ konɛ e ye pia nɔ,
Ejakaa e suɔmi nɛ se pui ɔ ngɛ kɛ yaa neneene,
9 E pee nyɔhiɔ ɔ kɛ dodoe ɔmɛ konɛ a ye nyɔ nɔ,
Ejakaa e suɔmi nɛ se pui ɔ ngɛ kɛ yaa neneene.
10 E gbe kekleekle bimɛ ngɛ Egipt ɔ,
Ejakaa e suɔmi nɛ se pui ɔ ngɛ kɛ yaa neneene.
11 E je Israel kɛ je a kpɛti,
Ejakaa e suɔmi nɛ se pui ɔ ngɛ kɛ yaa neneene,
12 E kɛ nine si wami, kɛ he wami kpetekpleenyɛ lɛ je mɛ,
Ejakaa e suɔmi nɛ se pui ɔ ngɛ kɛ yaa neneene.
13 E gba Wo Tsu ɔ mi enyɔ,*
Ejakaa e suɔmi nɛ se pui ɔ ngɛ kɛ yaa neneene.
14 E ha nɛ Israel gu wo ɔ kpɛti,
Ejakaa e suɔmi nɛ se pui ɔ ngɛ kɛ yaa neneene.
15 E tsitsɛɛ Farao kɛ e tabo ɔ ngɔ wo Wo Tsu ɔ mi,
Ejakaa e suɔmi nɛ se pui ɔ ngɛ kɛ yaa neneene.
16 E nyɛɛ e we bi ɔmɛ a hɛ mi kɛ gu nga a nɔ,
Ejakaa e suɔmi nɛ se pui ɔ ngɛ kɛ yaa neneene.
17 E fiaa matsɛmɛ nguanguahi ní,
Ejakaa e suɔmi nɛ se pui ɔ ngɛ kɛ yaa neneene.
18 E gbe matsɛmɛ nɛ a he wa,
Ejakaa e suɔmi nɛ se pui ɔ ngɛ kɛ yaa neneene,
19 E gbe Amorbi ɔmɛ a matsɛ Sihon
Ejakaa e suɔmi nɛ se pui ɔ ngɛ kɛ yaa neneene,
20 E gbe Bashan matsɛ Og,
Ejakaa e suɔmi nɛ se pui ɔ ngɛ kɛ yaa neneene.
21 E ngɔ a zugba a kɛ ha kaa weto ní,
Ejakaa e suɔmi nɛ se pui ɔ ngɛ kɛ yaa neneene,
22 Kaa e sɔmɔlɔ Israel weto ní,
Ejakaa e suɔmi nɛ se pui ɔ ngɛ kɛ yaa neneene.
23 Benɛ wa hao ɔ, e kai wɔ,
Ejakaa e suɔmi nɛ se pui ɔ ngɛ kɛ yaa neneene.
24 E ya nɔ nɛ e kpɔ̃ wɔ kɛ je wa he nyɛli ɔmɛ a dɛ,
Ejakaa e suɔmi nɛ se pui ɔ ngɛ kɛ yaa neneene.
25 E haa nɔ́ fɛɛ nɔ́ nɛ ngɛ wami mi ɔ* niye ní,
Ejakaa e suɔmi nɛ se pui ɔ ngɛ kɛ yaa neneene.
26 Nyɛɛ na Mawu nɛ ngɛ hiɔwe ɔ si,
Ejakaa e suɔmi nɛ se pui ɔ ngɛ kɛ yaa neneene.