Yesaya
50 Nɔ́ nɛ Yehowa ngɛ dee ji nɛ ɔ nɛ:
“Gba mi pomi womi nɛ i kɛ ngmɛɛ nyɛ nyɛ ɔ he ɔ, jije e ngɛ?
Nɛ nihi nɛ i hɛɛ mɛ hiɔ ɔ, a kpɛti mɛnɔ lɛ i jua nyɛ ngɔ ha?
Hyɛ! Nyɛ nitsɛmɛ nyɛ tɔmihi a he je nɛ a jua nyɛ ɔ nɛ,
Nɛ nyɛ nitsɛmɛ nyɛ yayamihi a he je nɛ a fiee nyɛ nyɛ ɔ nɛ.
2 “Mɛni he je nɛ benɛ i ba a, nɔ ko be hiɛ ɔ?
Mɛni he je nɛ benɛ i tsɛ ɔ, nɔ ko he we nɔ ɔ?
Anɛ ye nine ngɛ kpiti tsɔ pe bɔ nɛ ma nyɛ ma kpɔ̃ nyɛ lo?
Anɛ i be he wami nɛ ma kɛ kpɔ̃ nyɛ lo?
Hyɛ! I kãa wo ɔ hɛ mi nɛ e siɔ;
I haa nɛ pahi plɛɔ peeɔ nga kplanaa.
Kuma yeɔ lohi nɛ ngɛ mi ɔ nɛ a gboɔ,
Nɛ a saa ejakaa a nɛ́ nyu.
3 I ngɔ diblii kɛ ha hiɔwe ɔ,
Nɛ i ngɔ kpekpe kɛ pee e he hami nɔ́.”
E tsɛ̃ɛ̃ɔ mi mɔtu fɛɛ mɔtu;
E woɔ ye tue nɔ konɛ ma bu tue kaa ní kaselɔ.
5 Nyɔmtsɛ Matsɛ Yehowa bli ye tue,
Nɛ i tsɔ we atuã.
I gba we kɛ yɛ blɔ kpa nɔ.
6 I plɛ ye se mi kɛ ha nihi nɛ a ngɛ mi kpa fiaae ɔ
Nɛ i plɛ ye tsitsa kɛ ha nihi nɛ a ngɛ ye kpɛni bwɔmi hiaae ɔ.
I kɛ ye hɛ mi laa we hɛ mi si puemi níhi kɛ lada.
7 Se Nyɔmtsɛ Matsɛ Yehowa maa ye bua mi.
Lɔ ɔ he je nɛ ye hɛ mi be si puee ɔ nɛ.
Lɔ ɔ he je nɛ i ha nɛ ye hɛ mi pee kaa tɛ nɛ he wa a nɛ,
Nɛ i le kaa ye hɛ mi be si puee.
8 Nɔ nɛ bu mi dalɔ ɔ ngɛ ye kasa nya.
Mɛnɔ ma nyɛ maa po ye nya?*
É ha nɛ waa te si kɛ da si.*
Mɛnɔ lɛ e kɛ mi ngɛ sane?
É hɛ lɛ kɛ su ye he.
9 Hyɛ! Nyɔmtsɛ Matsɛ Yehowa maa ye bua mi.
Mɛnɔ lɛ e maa bu mi fɔ?
Hyɛ! Mɛ tsuo a maa pee kaa tako.
Nɛ wɔyewɔye maa ye mɛ.
10 Mɛnɔ lɛ e ngɛ nyɛ kpɛti nɛ e yeɔ Yehowa gbeye,
Nɛ e buɔ e sɔmɔlɔ ɔ gbi tue?
Mɛnɔ lɛ e nyɛɛ diblii kpii mi nɛ́ la ko be lejɛ ɔ?
Ha nɛ e ngɔ e hɛ kɛ fɔ Yehowa biɛ ɔ nɔ, nɛ e kpasa e Mawu ɔ.*
11 “Hyɛ! Nyɛ nihi tsuo nɛ nyɛ ngɛ la slɛe,
Nɛ nyɛ haa nɛ la kpɛɔ ɔ,
Nyɛɛ nyɛɛ ngɛ nyɛ la a nya,
Ngɛ la nɛ nyɛ slɛ nɛ e ngɛ tsoe ɔ nya.
Nɔ́ nɛ nyɛ ma ná kɛ je ye dɛ ji nɛ ɔ nɛ:
Nyɛ maa hwɔ si ngɛ piimi mi.