Yeremia

42 Kɛkɛ nɛ tabo nya dali ɔmɛ, kɛ Karea bi Yohanan, Hoshaya bi Yezania, kɛ ma a mi bi ɔmɛ tsuo, kɛ je nɔ nyafii pe kulaa nɔ kɛ ya si nɔ ngua pe kulaa nɔ ɔ ba 2 nɛ a ba de gbalɔ Yeremia ke: “Wa kpa mo pɛɛ, moo bu wa ní bimi nɛ ɔ tue, nɛ o sɔle ha Yehowa o Mawu ɔ ha waa kɛ nihi nɛ piɛ nɛ ɔmɛ tsuo, ejakaa kaa bɔ nɛ o ngɛ hyɛe ɔ, nihi bɔɔ ko pɛ lɛ a piɛ. 3 Yehowa o Mawu ɔ nɛ tsɔɔ wɔ blɔ nɛ sa kaa waa nyɛɛ nɔ kɛ nɔ́ nɛ e sa kaa waa pee.”

4 Gbalɔ Yeremia ha mɛ heto ke: “I nu nyɛ ní bimi ɔ, nɛ ma sɔle kɛ ha Yehowa nyɛ Mawu ɔ kaa bɔ nɛ nyɛ de ɔ; nɛ nɔ́ fɛɛ nɔ́ nɛ Yehowa ma de mi ɔ, ma ba bɔ nyɛ. I be nyɛ munyu kake ngmelu po nɔ lae.”

5 A de Yeremia ke: “Blɔ tsɔɔmi nɛ Yehowa o Mawu ɔ kɛ ma ha mo ke o ba de wɔ ɔ, ke wa yi nɔ pɛpɛɛpɛ ɔ, lɛɛ Yehowa nɛ pee odasefono anɔkualetsɛ kɛ si wɔ. 6 Ke nɔ́ kpakpa jio, nɔ́ yaya jio, wa maa bu Yehowa wa Mawu ɔ, nɔ nɛ wa ngɛ mo e ngɔ tsɔe ɔ gbi tue, konɛ e hi ha wɔ, ejakaa Yehowa wa Mawu ɔ gbi tue lɛ wa bu ɔ nɛ.”

7 Ligbi nyɔngma se ɔ, Yehowa kɛ Yeremia tu munyu. 8 Enɛ ɔ he ɔ, e tsɔ nɛ a ya tsɛ Karea bi Yohanan kɛ tabo nya dali ɔmɛ nɛ a kɛ lɛ ngɛ ɔ, kɛ ni ɔmɛ tsuo, kɛ je nɔ nyafii pe kulaa nɔ kɛ ya si nɔ ngua pe kulaa nɔ kɛ ba. 9 Nɛ e de mɛ ke: “Nɔ́ nɛ Yehowa Israel Mawu ɔ, nɔ nɛ nyɛ tsɔ mi kaa ma ngɔ nyɛ ni bimi kaa e na nyɛ mɔbɔ ɔ kɛ ya fɔ e hɛ mi ɔ de ji nɛ ɔ nɛ: 10 ‘Ke niinɛ nɛ nyɛ maa hi zugba nɛ ɔ nɔ ɔ, lɛɛ ma fia nyɛ kɛ ma si nɛ i be nyɛ kue, ma du nyɛ, nɛ i be nyɛ hiae, ejakaa ma pia ye he* ngɛ amanehlu nɛ i kɛ ba nyɛ nɔ ɔ he. 11 Nyɛ ko ye Babilon matsɛ ɔ gbeye hu.’

“‘Nyɛ ko ye lɛ gbeye,’ Yehowa lɛ de, ‘ejakaa i kɛ nyɛ ngɛ, nɛ ma he nyɛ yi wami, nɛ ma kpɔ̃ nyɛ kɛ je e dɛ. 12 Nɛ ma na nyɛ mɔbɔ, nɛ lɛ hu e maa na nyɛ mɔbɔ, nɛ e ma ha nɛ nyɛɛ kpale kɛ ya nyɛ nitsɛmɛ nyɛ zugba a nɔ.

13 “‘Se ke nyɛ de ke dɛbi, wa be si hie ngɛ zugba nɛ ɔ nɔ!” nɛ nyɛ bui Yehowa nyɛ Mawu ɔ gbi tue, 14 nɛ nyɛ de ke, “Dɛbi, wa maa ya Egipt zugba a nɔ mohu, he nɛ wa be ta nae, nɛ wa be titimati* pɛmi he nue, nɛ abolo he hwɔ be wɔ yee ngɛ; nɛ lejɛ ɔ lɛ wa maa hi ɔ,” 15 lɛɛ, nyɛ Yudabi nɛ piɛ, nyɛɛ bu Yehowa munyu ɔ tue. Nɔ́ nɛ Yehowa tabohiatsɛ, Israel Mawu ɔ de ji nɛ ɔ nɛ: “Ke nyɛ fia nyɛ pɛɛ si kaa nyɛ maa kpale kɛ ya Egipt nɛ nyɛ ma ya hi lejɛ ɔ kokooko ɔ,* 16 lɛɛ, klaate ɔ nɛ nyɛ ngɛ gbeye yee ɔ ma ba ná nyɛ ngɛ Egipt zugba a nɔ, nɛ hwɔ ɔ nɛ nyɛ ngɛ gbeye yee ɔ, jamɛ a hwɔ ɔ nɔuu maa nyɛɛ nyɛ se kɛ ya Egipt, nɛ nyɛ ma gbo ngɛ lejɛ ɔ. 17 Nɛ nyumu ɔmɛ tsuo nɛ a fia a pɛɛ si kaa a maa ya Egipt nɛ́ a ma ya hi lejɛ ɔ kokooko ɔ, klaate, hwɔ kɛ gbenɔ hiɔ* nɛ sãã nɔ maa gbe mɛ. A kpɛti nɔ ko nɔ ko yi be wami náe, nɛ a kpɛti nɔ ko nɔ ko hu be haomi nɛ ma kɛ ba a nɔ ɔ mi jee.”’

18 “Ejakaa nɔ́ nɛ Yehowa tabohiatsɛ, Israel Mawu ɔ de ji nɛ ɔ nɛ: ‘Kaa bɔ nɛ i plɛ ye mi mi fumi kɛ ye mi mi la a kɛ pue Yerusalembi ɔmɛ a nɔ ɔ, jã nɔuu lɛ ma plɛ ye mi mi la a kɛ pue nyɛ nɔ, ke nyɛ ho Egipt ya a, nɛ nyɛ ma plɛ pee gbiɛmi nɔ́, he gbeye womi nɔ́, zo nɔ́, kɛ hɛ mi si puemi nɔ́, nɛ nyɛ be zugba nɛ ɔ nae hu gblegbleegble.’

19 “Nyɛ Yudabi nɛ piɛ, Yehowa tu munyu kɛ si nyɛ. Nyɛ ko ya Egipt. Nyɛ ná nɛ nyɛɛ le paa kaa, i bɔ nyɛ kɔkɔ mwɔnɛ ɔ ligbi nɛ ɔ 20 kaa, nyɛ tɔmi ɔmɛ ma ha nɛ nyɛ* hɛ mi ma kpata. Ejakaa nyɛ tsɔ mi Yehowa nyɛ Mawu ɔ ngɔ, nɛ nyɛ de ke, ‘Moo sɔle kɛ ha Yehowa wa Mawu ɔ ha wɔ, nɛ́ o de wɔ nɔ́ fɛɛ nɔ́ nɛ Yehowa wa Mawu ɔ ma de mo ɔ, nɛ wa maa pee.’ 21 I de nyɛ ni nɛ ɔmɛ mwɔnɛ ɔ, se nyɛ be Yehowa nyɛ Mawu ɔ tue bue, nɛ nyɛ be níhi nɛ e tsɔ mi ke ma ba de nyɛ ɔ ekoeko pee. 22 Enɛ ɔ he ɔ, nyɛ ná nɛ nyɛɛ le paa kaa, klaate, hwɔ kɛ gbenɔ hiɔ nɛ sãã nɔ maa gbe nyɛ ngɛ he nɛ nyɛ suɔ kaa nyɛ ma ya hi ɔ.”