2 Matsɛmɛ
19 Benɛ Matsɛ Hezekia nu nɔ́ nɛ ɔ pɛ ɔ, e gba e tade ɔmɛ, nɛ e bu kpekpe, nɛ e ho Yehowa we ɔ ya. 2 Kɛkɛ nɛ e tsɔ Eliakim, nɔ nɛ hyɛɛ we* ɔ nɔ ɔ, Shebna, nɛ ji womi ngmalɔ ɔ, kɛ osɔfo ɔmɛ a nikɔtɔma amɛ kɛ a he kpekpe kɛ ho gbalɔ Yesaya, nɛ ji Amoz binyumu ɔ ngɔ ya. 3 A ya de lɛ ke: “Nɔ́ nɛ Hezekia ngɛ dee ji nɛ ɔ nɛ, ‘Ligbi nɛ ɔ ji haomi, kɛ hɛ mi kami,* kɛ hɛ mi si puemi ligbi; ejakaa fɔmi su gbongu mi,* se he wami ko be nɛ a kɛ ma fɔ. 4 Eko ɔ, Yehowa, o Mawu ɔ maa nu Rabshake munyu ɔmɛ tsuo, nɔ nɛ e nyɔmtsɛ nɛ ji Asiria matsɛ ɔ tsɔ nɛ e ba bɔ Mawu hɛ kalɔ ɔ ahlua a, nɛ Yehowa, o Mawu ɔ maa kojo lɛ ngɛ munyuhi nɛ e nu ɔ he je. Lɔ ɔ he ɔ, moo sɔle kɛ ha nihi nɛ piɛ nɛ a yi ná wami ɔ.’”
5 Lɔ ɔ he ɔ, Matsɛ Hezekia sɔmɔli ɔmɛ ya Yesaya ngɔ, 6 nɛ Yesaya de mɛ ke: “Nɔ́ nɛ nyɛ ya de nyɛ nyɔmtsɛ ɔ ji nɛ ɔ nɛ, ‘Nɔ́ nɛ Yehowa ngɛ dee ji nɛ ɔ nɛ: “Ko ha nɛ munyuhi nɛ o nu, nɛ ji munyuhi nɛ Asiria matsɛ ɔ tsɔli ɔmɛ kɛ bɔ mi ahlua a nɛ wo o he gbeye. 7 Hyɛ, ma ngɔ susumi ko kɛ wo e yi mi,* nɛ e maa nu sɛ gbi ko, nɛ e maa kpale kɛ ho lɛ nitsɛ e zugba nɔ ya; nɛ ma ha nɛ́ e nɔ ngɛ klaate nya ngɛ lɛ nitsɛ e zugba nɔ.”’”
8 Benɛ Rabshake nu kaa Asiria matsɛ ɔ je Lakish ɔ, e kpale kɛ ho e ngɔ ya, nɛ e ya na lɛ nɛ e kɛ Libna ngɛ ta hwue. 9 Jehanɛ ɔ, matsɛ ɔ nu nɛ a ngɛ dee ngɛ Etiopia Matsɛ Tirhaka he ke: “Hyɛ, e je kpo kɛ ba konɛ e kɛ mo nɛ ba hwu ta.” Lɔ ɔ he ɔ, e kpale tsɔ tsɔli kɛ ya Hezekia ngɔ ya de lɛ ke: 10 “Nɔ́ nɛ nyɛ ya de Yuda Matsɛ Hezekia ji nɛ ɔ nɛ, ‘Ko ha nɛ o Mawu ɔ nɛ o ngɔ o hɛ kɛ fɔ e nɔ ɔ nɛ e sisi mo ke: “A kɛ Yerusalem be Asiria matsɛ ɔ dɛ woe.” 11 Hyɛ! O nu níhi nɛ Asiria matsɛmɛ ɔmɛ pee zugba amɛ tsuo, bɔ nɛ a kpata a hɛ mi ha a. Anɛ moo lɛɛ a ma kpɔ̃ mo lo? 12 Je ma amɛ nɛ ye nɛmɛ ɔmɛ kpata a hɛ mi ɔ, anɛ a mawu ɔmɛ nyɛ nɛ a kpɔ̃ mɛ lo? Jije Gozan, Haran, Rezef, kɛ Edenbi ɔmɛ tsuo nɛ a ngɛ Telasar a ngɛ? 13 Jije Hamat matsɛ ɔ, Arpad matsɛ ɔ, kɛ Sefarvaim ma amɛ, Hena, kɛ Iva matsɛmɛ ɔmɛ ngɛ?’”
14 Hezekia ngɔ sɛ womi ɔmɛ ngɛ tsɔli ɔmɛ a dɛ nɛ e kane. Kɛkɛ nɛ Hezekia ho Yehowa we ɔ ya, nɛ e ya bli mi ngɛ Yehowa hɛ mi. 15 Nɛ Hezekia bɔni sɔlemi ha Yehowa ke: “Oo Yehowa, Israel Mawu, mo nɛ o hii si ngɛ matsɛ sɛ nɔ ngɛ kerubhi a nɔ,* mo pɛ ji anɔkuale Mawu ngɛ zugba a nɔ matsɛ yemi ɔmɛ tsuo a nɔ. Mo lɛ o bɔ hiɔwe kɛ zugba. 16 Oo Yehowa, mo ta tue nɛ o nu! Oo Yehowa, mo bli o hɛngmɛ nɛ o hyɛ! Moo nu munyuhi nɛ Senakerib tsɔ kaa a kɛ ba bɔ Mawu hɛ kalɔ ɔ ahlua a. 17 Oo Yehowa, e ji anɔkuale kaa Asiria matsɛmɛ ɔmɛ kpata je ma amɛ kɛ a zugba amɛ a hɛ mi. 18 Nɛ a sake a mawu ɔmɛ pue la mi, ejakaa pi mawuhi ji mɛ, mohu ɔ, a ji adesahi a nine nya ní tsumi, a ji tsohi kɛ tɛhi. Enɛ ɔ he je nɛ a nyɛ nɛ a kpata a hɛ mi ɔ nɛ. 19 Se amlɔ nɛ ɔ, Oo Yehowa, wa Mawu, wa kpa mo pɛɛ nɛ o he wa yi wami ngɛ e dɛ, konɛ zugba a nɔ matsɛ yemi ɔmɛ tsuo nɛ a le kaa mo pɛ ji Mawu, Oo Yehowa.”
20 Kɛkɛ nɛ Yesaya, Amoz binyumu ɔ tsɔ nɛ a kɛ sɛ gbi nɛ ɔ ya ha Hezekia ke: “Nɔ́ nɛ Yehowa, Israel Mawu ɔ ngɛ dee ji nɛ ɔ nɛ, ‘I nu sɔlemi nɛ o sɔle kɛ ha mi kɛ kɔ Asiria Matsɛ Senakerib he ɔ. 21 Munyu nɛ Yehowa tu kɛ si lɛ ji nɛ ɔ nɛ:
“Zion biyo yomiyo ɔ ngɛ o he guɛ gbee, e ngɛ o he fɛu yee.
Yerusalem biyo ɔ ngɛ e yi mimiɛe kɛ ngɛ mo woe.
22 Mɛnɔ ahlua lɛ o bɔ nɛ o tu musu bɔmi munyu kɛ si ɔ?
Mɛnɔ nɔ lɛ o wo o gbi nɔ ngɛ,
Nɛ o pã o hɛ mi kɛ wo ɔ?
Israel Nɔ Klɔuklɔu ɔ lɛ o pee jã kɛ si ɔ nɛ!
23 O gu o tsɔli ɔmɛ a nɔ kɛ bɔ Yehowa ahlua, nɛ o de ke,
‘Ma ngɔ ye ta zugba lɛhi babauu ɔ,
Nɛ ma kuɔ kɛ ya yokuhi a yi mi,
Ma ya Lebanon hehi nɛ kɛ pe kulaa a.
Ma poo e seda tso ngua amɛ, e junipa tso kpakpa amɛ.
Ma ya e hehi nɛ ngɛ tsitsaa lokoo ɔ, e hue tsohi nɛ a ngɛ kusuu ɔ mi.
24 Ma tsua vuhi, nɛ ma nu ma se nyu;
I kɛ ye nane si ma ha nɛ Egipt pa amɛ* tsuo maa mii.’
25 Anɛ o nui lo? Kɛ je blema lokoo nɛ a ma nya si.*
Kɛ je blema nɛ i dla kɛ to.
Amlɔ nɛ ɔ, ma ha nɛ e ba mi.
O ma ha nɛ mahi nɛ́ a fia gbogbo wo a he ɔ nɛ́ a plɛ pee ma dokuhi.
26 Ma amɛ a mi bi ɔmɛ a he wami maa ta;
A maa ye gbeye, nɛ zo maa gbe mɛ.
A maa pee kaa zugba nɔ hu, kɛ nga mumu,
A maa pee kaa tsu yi mi nga nɛ puje he kɔɔhiɔ ha nɛ e gbli.
27 Se i le o si himi, kɛ o yami kɛ o bami,
Kɛ be nɛ o ná ye he abofu,
28 Ejakaa i nu ye he abofu nɛ o ná kɛ bɔ nɛ o ngɛ huãe ha a.
Lɔ ɔ he ɔ, ma ngɔ ye gbowe ɔ kɛ wo o gugwɔ mi, nɛ ma wo o nya mi kpa,
Nɛ ma kpale mo kɛ gu blɔ nɛ o gu nɔ kɛ ba a nɔ.”
29 “‘Nɛ enɛ ɔ maa pee okadi ha mo:* Jeha nɛ ɔ mi ɔ, nyɛ maa ye níhi nɛ mɛ nitsɛmɛ a puɛ;* nɛ jeha enyɔne ɔ mi ɔ, nyɛ maa ye ngma* nɛ maa puɛ kɛ je lɔ ɔ mi; se jeha etɛne ɔ lɛɛ nyɛ ma du wu nɛ nyɛ ma kpa, nɛ nyɛ maa pee wai ngmɔhi, nɛ nyɛ maa ye a mi ní. 30 Yuda we ɔ mi bi ɔmɛ nɛ́ maa tu fo, nɛ ji nihi nɛ a maa piɛ ɔ, a ma tsɛ̃ sipoku kɛ sɛ zu mi, nɛ a maa wo yiblii. 31 Ejakaa ni komɛ maa piɛ nɛ a maa je Yerusalem, nɛ nihi nɛ a he a yi wami maa je Zion Yoku ɔ nɔ. Yehowa tabohiatsɛ ɔ maa pee enɛ ɔ kɛ hɛdɔ.
32 “‘Lɔ ɔ he ɔ, nɔ́ nɛ Yehowa ngɛ dee ngɛ Asiria matsɛ ɔ he ji nɛ ɔ nɛ:
“E be ma nɛ ɔ mi sɛe
Nɛ e be kɛ̃ɛ̃ mi bi ko tsɛ̃e kɛ ya lejɛ ɔ
Nɛ e kɛ tsɛ̃i ko ba be lɛ tuae
Nɛ e be ta hwumi kpoku* ko fiae kɛ wo he.
33 Blɔ nɛ e gu nɔ kɛ ba a, lɔ ɔ nɔ e maa gu kɛ kpale kɛ ho;
E be ma nɛ ɔ mi sɛe,” Yehowa lɛ de.
34 “Ma fã ma nɛ ɔ he, nɛ ma he e yi wami ngɛ imi nitsɛ ye he je,
Kɛ ye sɔmɔlɔ David hu he je.”’”
35 Jamɛ a nyɔ ɔ mi nɔuu ɔ, Yehowa bɔfo ɔ je kpo, nɛ e ya kpata nyumuhi 185,000 a hɛ mi ngɛ Asiria tabo ɔ sito he ɔ mi. Mɔtu mla benɛ ni ɔmɛ te si ɔ, a na gbogboe ɔmɛ tsuo nɛ pueɔ si. 36 Lɔ ɔ he ɔ, Asiria Matsɛ Senakerib je lejɛ ɔ, nɛ e kpale kɛ ho Nineve ya, nɛ e ya hi lejɛ ɔ. 37 Nɛ benɛ e ya kplã si ngɛ e mawu Nisrok we* ɔ, lɛ nitsɛ e binyumuhi Adramelek kɛ Sharezer ngɔ klaate kɛ gbe lɛ, nɛ a tu fo kɛ ho Ararat zugba a nɔ ya. Nɛ e binyumu Esarhadon ba ye matsɛ ngɛ e se.