Ezekiel
28 Yehowa kɛ mi tu munyu ekohu nɛ e de mi ke: 2 “Nɔmlɔ bi, mo de Tiro hɛ mi nyɛɛlɔ ɔ ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ:
“Akɛnɛ o wo o he nɔ ngɛ o tsui mi he je ɔ, o yaa nɔ nɛ o deɔ ke, ‘mawu ko ji mi.
I hiɔ si ngɛ mawu matsɛ sɛ nɔ ngɛ wo ɔ kpɛti.’
Se, nɔmlɔ kɛkɛ ji mo, tsa pi mawu ji mo,
E ngɛ mi kaa ngɛ o tsui mi ɔ, o nuɔ he kaa mawu ko ji mo.
3 Hyɛ! O susu kaa o le ní pe Daniel,
Nɛ lɔ ɔ he ɔ, laami sane ko be nɛ a kɛ laa mo.
4 O juɛmi kɛ o nɔ́ se kɔmi ha nɛ o pee niatsɛ,
Nɛ o yaa nɔ nɛ o kɛ sika tsu kɛ sika hiɔ toɔ ngɛ o juetli to he ɔ.
5 Ga lemi nɛ o kɛ yeɔ jua a ha nɛ o ná ní,
Nɛ o ní nami ɔ ha nɛ o wo o he nɔ ngɛ o tsui mi.”’
6 “‘Enɛ ɔ he ɔ, nɔ́ nɛ Nyɔmtsɛ Matsɛ Yehowa de ji nɛ ɔ nɛ:
“Akɛnɛ o nu he ngɛ o tsui mi kaa mawu ji mo he je ɔ,
7 Ma ha nɛ nibwɔhi nɛ ji nihi nɛ a yi mi wa pe kulaa nɛ a ngɛ je ma amɛ a mi ɔ ma ba tua mo,
A maa hia klaate kɛ puɛ nɔ́ fɛɛ nɔ́ nɛ ngɛ fɛu nɛ́ o juɛmi ɔ ha nɛ o ná a.
Nɛ a ma ble o hɛ mi nyami ɔ.
8 A ma kple mo si kɛ ya muɔ mi,*
Nɛ o ma gbo gbenɔ yeyee ngɛ wo ɔ kpɛti.
9 Anɛ o maa ya nɔ ma de nɔ nɛ ngɛ mo gbee ɔ ke, ‘mawu ko ji mi’ lo?
O maa pee kaa nɔmlɔ kɛkɛ se pi mawu ngɛ nihi nɛ a ngɛ mo blee ɔ a dɛ mi.”’
10 ‘Nibwɔhi maa gbe mo kaa nihi nɛ a pui mɛ ɔ a kpɛti nɔ kake,
Imi nitsɛ lɛ i tu munyu nɛ ɔ nɛ,’ Nyɔmtsɛ Matsɛ Yehowa lɛ de.”
11 Yehowa kɛ mi tu munyu ekohu nɛ e de mi ke: 12 “Nɔmlɔ bi, mo la aywilɛho yemi la kɛ kɔ Tiro matsɛ ɔ he nɛ o de lɛ ke, ‘nɔ́ nɛ Nyɔmtsɛ Matsɛ Yehowa de ji nɛ ɔ nɛ:
“Ke a ngɛ nɔ ko nɛ e he nɔ́ fɛɛ nɔ́ hi kɛ pi si he munyu tue ɔ, lɛɛ mo,
Juɛmi hyi mo tɔ, nɛ o he fɛu ɔ ye mluku.
13 Jinɛ Eden, nɛ ji Mawu abɔɔ ɔ mi lɛ o ngɛ.
A kɛ tɛhi nɛ a he jua wa nɛ ɔmɛ lɛ dla mo,
Rubi, topaz, kɛ yaspi; krisolito, oniks* kɛ yade; safiro, tɛkuɔis kɛ emerald;
A ngɔ mɛ kɛ ma sika tsu nɔ.
Ligbi ɔ nɛ a bɔ mo ɔ, jamɛ a ligbi ɔ nɔuu lɛ a pee ní nɛ ɔmɛ.
14 I hla mo kaa kerub nɛ́ a pɔ lɛ nu nɛ e gbɛ e pɛlihi a mi.
Mawu yoku klɔuklɔu ɔ nɔ lɛ jinɛ o ngɛ, nɛ o nyɛɛɔ kɛ yaa kɛ baa ngɛ tɛhi nɛ a ngɛ tsoe kaa la a, a kpɛti.
15 Kɛ je ligbi nɛ a bɔ mo ɔ, a nɛ tɔtɔmi ko ngɛ o blɔ ɔmɛ a nɔ
Kɛ ya si benɛ a na nɔ́ nɛ dɛ ngɛ o mi.
16 Akɛnɛ o ye jua wawɛɛ he je ɔ,
Awi yemi ba hyi mo tɔ, nɛ o bɔni yayami peemi.
Enɛ ɔ he ɔ, ma po mo kɛ je Mawu yoku ɔ nɔ kɛ fɔ he kaa nɔ́ ko nɛ he tsɔ we, nɛ ma kpata o hɛ mi,
Oo kerub nɛ o gbɛ o pɛlihi a mi, ma je mo kɛ je tɛhi nɛ a ngɛ tsoe kaa la a, a kpɛti.
17 O he fɛu ɔ he je ɔ, o tsui wo e he nɔ.
O hɛ mi nyami ɔ he je ɔ, o puɛ o juɛmi ɔ.
Ma sake mo kɛ fɔ zugba a nɔ.
Ma ha nɛ matsɛmɛ maa hyɛ mo.
18 O tɔmi ngua kɛ anɔkuale nɛ o yi ngɛ o jua yemi ɔ mi he je ɔ, o ha nɛ o jami he ɔmɛ a he tsɔ we.
Ma ha nɛ la maa je o mi kɛ ba, nɛ e ma kpata o hɛ mi.
Ma ha nɛ́ o pee kaa lazu ngɛ zugba a nɔ, ngɛ nihi tsuo nɛ a ngɛ mo hyɛe ɔ a hɛ mi.
19 Nihi tsuo nɛ a le mo ngɛ ni ɔmɛ a kpɛti ɔ maa hyɛ mo gaa nɛ o he maa pee mɛ nyakpɛ.
O nyagbe maa ba tlukaa nɛ e maa pee gbeye,
Nɛ o maa laa gbidigbidi kɛ ya neneene.”’”
20 Kɛkɛ nɛ Yehowa kɛ mi tu munyu ekohu nɛ e de mi ke: 21 “Nɔmlɔ bi, mo plɛ o hɛ mi kɛ tsɔɔ Sidon nɛ o gba kɛ si lɛ. 22 Mo de ke, ‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ:
“I kɛ mo ná, Oo Sidon, a maa wo ye hɛ mi nyami ngɛ o mi;
Nɛ ke i gbla e tue nɛ a tsu ye he ngɛ e mi ɔ, nihi ma ná le kaa imi ji Yehowa.
23 Ma tsɔ gbenɔ hiɔ nɛ sãã nɔ kɛ ya e mi, nɛ muɔ maa be ngɛ e gbɛjegbɛ ɔmɛ a nɔ.
Ke klaate ɔ je he slɔɔtohi kɛ ba ná lɛ ɔ, nihi ma gbo ngɛ e mi;
Nɛ a maa le kaa imi ji Yehowa.
24 “‘“Kɛkɛ ɔ, mio kpahi nɛ plaa a nɔ kɛ mio tsohi nɛ a nya yeɔ nɔ, nɛ ji nihi nɛ a yeɔ a he fɛu ɔ be Israel we ɔ bɔlee hu; nɛ nihi ma ná maa le kaa imi ji Nyɔmtsɛ Matsɛ Yehowa.”’
25 “‘Nɔ́ nɛ Nyɔmtsɛ Matsɛ Yehowa de ji nɛ ɔ nɛ: “Ke i kpale bua Israel we ɔ nya kɛ je je mahi nɛ a gbɛ mɛ kɛ fia a mi ɔ a nɔ ɔ, a maa pee mi klɔuklɔu ngɛ je ma amɛ a hɛ mi. Nɛ a maa hi a zugba nɛ i kɛ ha ye sɔmɔlɔ Yakob ɔ nɔ. 26 A maa hi si slɔkee ngɛ zugba a nɔ nɛ a maa ma wehi nɛ a maa pee wai ngmɔhi. Nɛ ke i gbla nihi nɛ a bɔle mɛ nɛ a yeɔ a he fɛu ɔ a tue ɔ, a maa hi si slɔkee; nɛ a ma ná le kaa imi ji Yehowa a Mawu ɔ nɛ.”’”