Yesaya
24 Hyɛ! Yehowa ma je nɔ fɛɛ nɔ ngɛ zugba a nɔ, nɛ zugba maa fɔ si gu.
E ma plɛ zugba a hɛ mi ngɔ bu si nɛ e maa gbɛ nihi nɛ a ngɛ nɔ ɔ kɛ fia.
2 Nɔ́ kake ɔ nɔuu lɛ maa ba nɔ fɛɛ nɔ nɔ:
Ma a jio, osɔfo ɔmɛ jio,
Sɔmɔlɔ jio, nyɔmtsɛ jio,
Mawayo jio, e nyɔmtsɛ yo jio,
Ní helɔ jio, ní jualɔ jio,
Nɔ nɛ paa nɔ́ jio, nɔ nɛ a pa lɛ nɔ́ jio,
Nɔ nɛ a ye lɛ hiɔ jio, nɔ nɛ e ye hiɔ jio.
3 Nɔ ko nɔ ko be piɛe ngɛ zugba a nɔ;
A maa mwɔɔ nɔ́ fɛɛ nɔ́ nɛ ngɛ nɔ ɔ,
Ejakaa Yehowa lɛ tu munyu nɛ ɔ.
4 Zugba a ngɛ aywilɛho yee;* e ngɛ gbɔjɔe.
Zugba a gbli; e ngɛ gboe.
Nihi nɛ a he biɛ ngɛ zugba a nɔ ɔ ngɛ gbɔjɔe.
5 Nihi nɛ a ngɛ zugba a nɔ ɔ wo zugba a he mu,
Ejakaa a yi mlaa a nɔ,
A tsake blɔ tsɔɔmi ɔ,
Nɛ a yi somi nɛ ngɛ kɛ yaa neneene* ɔ nɔ.
6 Lɔ ɔ he je nɛ gbiɛmi ɔ ngɛ zugba a hɛ mi kpatae ɔ nɛ,
Nihi nɛ a ngɛ zugba a nɔ ɔ ye fɔ.
Lɔ ɔ he je nɛ nihi nɛ a ngɛ zugba a nɔ ɔ a he pi,
Nɛ e piɛ nihi bɔɔ ko pɛ ɔ nɛ.
7 Wai ehe ɔ ngɛ aywilɛho yee,* wai tso ɔmɛ ngɛ gboe,
Nihi tsuo nɛ a tsui nyaa a ngɛ ya foe.
8 Bua jɔmi nɛ akasawa pɛmi ngɔɔ kɛ baa a se po;
Nihi nɛ a jeɔ a hɛja a, a hoo peemi ɔ se po;
Saku pɛmi nɛ ngɔɔ ɔ se po.
9 A nuɔ wai se a la we kɛ tui he,
Nɛ dã duɔ ha nihi nɛ a nuɔ ɔ.
10 Ma nɛ a je he ɔ kuɔ pue si;
A nga we fɛɛ we nya konɛ nɔ ko nɛ ko sɛ mi.
11 A ngɛ wai he ya foe ngɛ gbɛjegbɛ ɔmɛ a nɔ.
Bua jɔmi tsuo ta;
Bua jɔmi nɛ ngɛ zugba a nɔ ɔ se po.
12 Ma a plɛ pee ma doku;
A kuɔ agbo ɔ kɛ pue si dukuduku.*
13 Kikɛ ji bɔ nɛ e maa ba ye we bi ɔmɛ a nɔ ngɛ zugba a nɔ ngɛ ma amɛ a kpɛti:
E maa pee kaa oliv tso yiblii nɛ a kplɔ nɛ e piɛ,
Kaa wai yiblii nɛ a kpa sisi nɛ piɛ.
14 A ma wo a gbi nɔ,
A kɛ bua jɔmi ma nya.
A maa jaje Yehowa we agboje ɔ kɛ je wo ɔ nya.*
15 Lɔ ɔ he je nɛ a ma je Yehowa yi kɛ je puje he ɔ nɛ;
A maa je zugba kpɔhi nɛ a ngɛ wo ɔ nɔ ɔ a nɔ kɛ wo Yehowa Israel Mawu ɔ biɛ ɔ hɛ mi nyami.
16 Wa nu lahi kɛ je zugba a nyagbe he ɔmɛ ke:
“Dalɔ ɔ hɛ mi nɛ ba nyami!”*
Se i de ke: I ngɛ gbɔjɔe, i ngɛ gbɔjɔe!
Kpo mo ha mi! Nɔ sisili sisi nihi;
Nɔ sisili gu sisimi blɔ nɔ kɛ sisi nihi.”
17 Nyɛ zugba a nɔ bi, gbeye kɛ muɔhi kɛ klamahi ngɛ nyɛ mlɛe.
18 Nɔ fɛɛ nɔ nɛ e maa tu fo kɛ je gbeye ngmlaa nya a maa nɔ muɔ mi,
Nɛ nɔ fɛɛ nɔ nɛ maa je kpo kɛ je muɔ ɔ mi ɔ, klama a maa du lɛ.
Ejakaa a ma bli hiɔwe agbo ɔmɛ,
Nɛ zugba a sisi tomi ɔ ma mimiɛ.
19 Zugba a mi gba;
A hoso zugba a;
Zugba a mimiɛ wawɛɛ.
20 Zugba a ngɛ dedee kaa dã tɔlɔ,
Nɛ e ngɛ mimiɛe kɛ ngɛ yae kɛ ngɛ bae kaa gba nɛ kɔɔhiɔ sɛ mi.
E yayami ɔ jiɔ ngɛ e kuɛ nɔ,
Nɛ e maa nɔ si, nɛ e be nyɛe maa te si hu.
21 Jamɛ a ligbi ɔ, Yehowa maa kojo hiɔwe tabo ɔ,
Kɛ zugba a nɔ matsɛmɛ ɔmɛ ngɛ zugba a nɔ.
22 Nɛ a ma bua a nya
Kaa bɔ nɛ a buaa nihi nɛ a wo mɛ tsu a nya kɛ woɔ tsu womi he ɔ,*
Nɛ a ma nga a yi kɛ wo muɔ ɔ mi;
Ligbihi babauu se ɔ, a ma ba hyɛ mɛ.
23 Zo maa gbe nyɔhiɔ ɔ,
Nɛ pu ɔ hɛ mi ma pue si,
Ejakaa Yehowa tabohiatsɛ ɔ ba pee matsɛ ngɛ Zion Yoku ɔ nɔ kɛ Yerusalem,
E hɛ mi ba nyami ngɛ e we bi ɔmɛ a ma nikɔtɔma amɛ* a hɛ mi.