1 Kronika
23 Benɛ David bwɔ nɛ e piɛ bɔɔ nɛ e ma gbo ɔ,* e wo e binyumu Salomo matsɛ konɛ e ye Israel nɔ. 2 Lɔ ɔ se ɔ, e bua Israel ma nikɔtɔma amɛ, osɔfo ɔmɛ, kɛ Levibi ɔmɛ tsuo a nya. 3 A kane Levibi ɔmɛ a kpɛti nihi nɛ a ye kɛ je jeha 30 kɛ yaa a; benɛ a kane nyumu fɛɛ nyumu ɔ, a ná nihi 38,000. 4 Ngɛ nimli nɛ ɔmɛ a kpɛti ɔ, nihi 24,000 sɔmɔ kaa Yehowa we ɔ ní tsumi ɔ nɔ hyɛli, nihi 6,000 ji nikɔtɔmahi kɛ kojoli, 5 nihi 4,000 ji agbo nya buli, nɛ nihi 4,000 ngɔɔ la fiami níhi kɛ jeɔ Yehowa yi. David de ngɛ la fiami ní nɛ ɔmɛ a he ke, “I pee konɛ a kɛ fia yi jemi lahi.”
6 Lɔ ɔ se ɔ, David gba a mi kɛ wo kuuhi a mi ngɛ Levi binyumu ɔmɛ a nya: Gershon, Kohat, kɛ Merari. 7 Ngɛ Gershonbi ɔmɛ a kpɛti ɔ, Ladan kɛ Shimei. 8 Ladan binyumuhi ji Yehiel, nɛ ji a nyatsɛ ɔ, Zetam, kɛ Yoel, mɛ ni etɛ. 9 Shimei binyumuhi ji Shelomot, Haziel, kɛ Haran, mɛ ni etɛ. Ni nɛ ɔmɛ ji a tsɛmɛ a we ɔmɛ a nyatsɛmɛ kɛ ha Ladan. 10 Nɛ Shimei binyumuhi ji Yahat, Zina, Yeush, kɛ Beria. Shimei binyumuhi ji ni eywiɛ nɛ ɔmɛ. 11 Yahat ji a nyatsɛ, nɛ Zizah ji nɔ enyɔne. Se akɛnɛ Yeush kɛ Beria be binyumuhi fuu he je ɔ, a kane mɛ kaa we kake mi bimɛ,* nɛ a ha mɛ blɔ nya ní tsumi kake.
12 Kohat binyumuhi ji Amram, Izhar, Hebron, kɛ Uziel, mɛ ni eywiɛ. 13 Amram binyumuhi ji Aaron kɛ Mose. Se a hla Aaron ngɔ to kulaa kaa e kɛ e binyumu ɔmɛ nɛ a tsu He Klɔuklɔu Pe Kulaa a he, nɛ́ a sã afɔlehi ngɛ Yehowa hɛ mi, nɛ́ a sɔmɔ lɛ, nɛ́ a jɔɔ nihi ngɛ e biɛ mi kɛ ya neneene. 14 Mose, nɛ ji anɔkuale Mawu ɔ nɔmlɔ ɔ lɛɛ, a wo e binyumu ɔmɛ a biɛ ta kɛ piɛɛ Levibi ɔmɛ a wɛtso ɔ he. 15 Mose binyumuhi ji Gershom kɛ Eliezer. 16 Ngɛ Gershom binyumu ɔmɛ a kpɛti ɔ, Shebuel ji a nyatsɛ. 17 Ngɛ Eliezer sisi bimɛ ɔmɛ* a kpɛti ɔ, Rehabia ji a nyatsɛ; Eliezer be binyumu kpahi, se Rehabia lɛɛ e ngɛ binyumuhi babauu. 18 Ngɛ Izhar binyumu ɔmɛ a kpɛti ɔ, Shelomit ji a nyatsɛ. 19 Hebron binyumuhi ji Yeria, nɛ ji a nyatsɛ ɔ, Amaria ji nɔ enyɔne, Yahaziel ji nɔ etɛne, nɛ Yekameam ji nɔ eywiɛne. 20 Uziel binyumuhi ji Mika, nɛ ji a nyatsɛ ɔ, nɛ Ishia ji nɔ enyɔne.
21 Merari binyumuhi ji Mahli kɛ Mushi. Mahli binyumuhi ji Eleazar kɛ Kish. 22 Eleazar be binyumuhi, biyihi pɛ lɛ e ngɛ nɛ e kɛ gbo. Lɔ ɔ he ɔ, Kish binyumu ɔmɛ, nɛ ji a wekuli* ɔmɛ ngɔ mɛ kaa a yihi. 23 Mushi binyumuhi ji Mahli, Eder, kɛ Yeremot, mɛ ni etɛ.
24 Ni nɛ ɔmɛ ji Levi binyumuhi nɛ a ye kɛ je jeha 20 kɛ yaa, nɛ́ a kane mɛ nɛ a ngma a biɛ ngɛ a tsɛmɛ a we ɔmɛ, kɛ a tsɛmɛ a we ɔmɛ a nyatsɛmɛ ɔmɛ a nya; a wo a biɛ ta kaa a sɔmɔ ngɛ Yehowa we ɔ. 25 Ejakaa David de ke: “Yehowa, Israel Mawu ɔ ha e we bi ɔmɛ he jɔmi, nɛ e maa hi Yerusalem kɛ ya neneene. 26 Jehanɛ hu ɔ, e he be hiae nɛ Levibi ɔmɛ nɛ a tloo bo tsu klɔuklɔu ɔ, aloo níhi nɛ a kɛ sɔmɔɔ ngɛ mi ɔ ekoeko hu.” 27 Ngɛ nyagbe blɔ tsɔɔmi nɛ David kɛ ha a nya a, a kane Levibi nɛ a ye kɛ je jeha 20 kɛ yaa a. 28 A ní tsumi ji kaa a maa ye bua Aaron binyumu ɔmɛ kɛ sɔmɔ ngɛ Yehowa we ɔ, nɛ́ a hyɛ yale ɔmɛ kɛ ní yemi tsu ɔmɛ a nɔ, nɛ́ a tsukɔ nɔ́ klɔuklɔu fɛɛ nɔ́ klɔuklɔu he, nɛ́ a tsu ní tsumi saisaa nɛ e he maa hia kaa a tsu ngɛ anɔkuale Mawu ɔ we ɔ. 29 A yeɔ kɛ buaa kɛ peeɔ abolo nɛ a toɔ* ɔ, mamu bukɔbukɔ nɛ a kɛ sãã ngma afɔle ɔ, akpɔɔnɔɔ nɛ masa be mi ɔ, kã tɛtlɛɛ mi keeki ɔmɛ, kɛ ma nɛ a futu ɔ, nɛ a yeɔ kɛ buaa kɛ susuɔ níhi tsuo a hiɛmi kɛ a klemi hulɔ. 30 Daa mɔtu ɔ, a daa si kɛ naa Yehowa si, nɛ a jeɔ e yi, nɛ a peeɔ jã gbɔkuɛ hulɔ. 31 Be fɛɛ be nɛ a maa sã sami afɔlehi kɛ ha Yehowa ngɛ Hejɔɔmi Ligbi ɔmɛ kɛ nyɔhiɔ ehe ɔmɛ a nɔ, kɛ gbijlɔ yemi be ɔmɛ a mi ɔ, a yeɔ kɛ buaa. A peeɔ jã daa ngɛ Yehowa hɛ mi kaa bɔ nɛ a he mlaa amɛ tsɔɔ ɔ. 32 Jehanɛ hu ɔ, a tsuɔ blɔ nya ní tsumihi nɛ a kɛ wo a dɛ ngɛ kpe he bo tsu ɔ mi kɛ he klɔuklɔu ɔ he ní, nɛ a peeɔ níhi nɛ e sa kaa a pee kɛ ha a nyɛmimɛ nɛ ji Aaron binyumu ɔmɛ konɛ a sɔmɔ ngɛ Yehowa we ɔ.