Hiob
13 “Ee, ye hɛngmɛ na ní nɛ ɔmɛ tsuo,
Ye tue nu, nɛ e nu sisi.
2 Nɔ́ nɛ nyɛ le ɔ, imi hu i le;
Nyɛ pã we mi ngɛ blɔ ko nɔ.
3 Imi lɛɛ, i suɔ kaa i kɛ Ope ɔ nitsɛ mohu maa tu munyu;
I suɔ nɛ i kɛ Mawu nɛ hla níhi a nya.
4 Nyɛɛ lɛɛ, nyɛɛ kɛ lakpa ngɛ ye he kpae;
Nyɛ tsuo nyɛ ngɛ kaa tsopatsɛmɛ nɛ a he be se nami.
5 I ná nɛ nyɛ ma nyɛ nya mohu,
Jinɛ lɔ ɔ ko tsɔɔ kaa nyɛ ji juɛmitsɛmɛ.
6 I kpa nyɛ pɛɛ nɛ nyɛɛ bu ye sane ɔ tue,
Nɛ nyɛɛ bu ye nya mi munyu tue.
7 Anɛ nyɛ maa da Mawu nane mi kɛ tu munyuhi nɛ dɛ lo,
Aloo nyɛ maa tu sisimi munyuhi kɛ ha lɛ lo?
8 Anɛ nyɛ ma fĩ e se lo,*
Aloo nyɛ maa suɔ kaa nyɛ maa ye anɔkuale Mawu ɔ sane ha lɛ lo?
9 Ke Mawu ke e maa kpa nyɛ mi fitsofitso ɔ, anɛ e maa hi ha nyɛ lo?
Anɛ nyɛ maa sisi lɛ kaa bɔ nɛ nyɛ maa sisi adesa a lo?
10 Ke nyɛ bɔ mɔde kaa nyɛ maa hyɛ nɔ hɛ mi ngɛ laami mi ɔ,
E ma kã nyɛ hɛ mi kokooko.
11 Anɛ e we agboje ɔ be nyɛ he gbeye woe lo,
Nɛ e he gbeye be nyɛ nɔ puee lo?
12 Nyɛ juɛmi munyu ɔmɛ a he be se nami kaa lazu.
Nɛ munyuhi nɛ nyɛɛ kɛ ngɛ nyɛ he fae ɔ* a he wɛ kaa he piɛ pomi níhi nɛ a kɛ zu pee.
13 Nyɛ ma nyɛ nya nɛ ma tu munyu.
Konɛ nɔ́ nɛ maa ba ye nɔ ɔ nɛ ba!
15 Ke e maa gbe mi po, ma ya nɔ nɛ ma mlɛ;
Ma fã ye he ngɛ e hɛ mi.
16 Kɛkɛ ɔ, e ma ba pee ye yi wami helɔ,
Ejakaa nɔ ko nɛ li Mawu* be nyɛe maa ba e hɛ mi.
17 Nyɛɛ bu ye munyu ɔ tue saminya;
Nyɛɛ bu nɔ́ nɛ i ngɛ dee ɔ tue.
18 Hyɛ, amlɔ nɛ ɔ, i dla ye sane ɔ kɛ fɔ si.
I le kaa ye nɔ́ da.
19 Mɛnɔ kɛ mi ma nyɛ maa hwu?
Ke i ke ma ma ye nya a, ma gbo.*
20 Ye Mawu, moo pee níhi enyɔ ko pɛ ha mi,*
Konɛ ma ko laa ye he ngɛ o hɛ mi:
21 Mo je o nine nɛ jiɔ ɔ ngɛ ye nɔ kɛ ya se kulaa,
Nɛ mo ko ha nɛ o he gbeye nɛ ha nɛ sawale nɛ nu mi.
22 Ke e maa hi ɔ, moo tu munyu, nɛ ma he nɔ́,
Aloo mo ha nɛ imi mohu ma tu munyu, konɛ o ha mi heto.
23 Mɛni tɔmi i tɔ̃, nɛ mɛni yayami lɛ i pee?
Moo tsɔɔ mi ye tɔmi ɔ kɛ ye he yayami ɔ.
24 Mɛni he je nɛ o kɛ o hɛ mi laa mi
Nɛ o bu mi kaa o he nyɛlɔ ɔ?
25 Anɛ o maa wo ba nɛ kɔɔhiɔ ngɛ lɛ fiae ɔ he gbeye lo
Aloo o maa fiee nga gbigbli se lo?
26 O yaa nɔ nɛ o ngmaa sanehi nɛ dɛ nɛ o po kɛ fɔ ye nɔ ɔ kɛ fɔɔ si,
Nɛ o haa nɛ i woɔ yayamihi nɛ i pee ngɛ ye nihe be mi ɔ he hiɔ.
27 O bɔ ye nanehi pã,
O hyɛɔ he fɛɛ he nɛ i yaa totooto,
Nɛ o kadiɔ ye nane mami he ɔmɛ tsuo.
28 Enɛ ɔ he ɔ, adesa* puɛɔ kaa nɔ́ ko nɛ sa.
Kaa tade nɛ wɔyewɔye ye.