Hiob
34 Enɛ ɔ he ɔ, Elihu ya nɔ nɛ e de ke:
2 “Nyɛ nihi nɛ nyɛ ngɛ juɛmi, nyɛɛ bu ye munyu ɔmɛ tue;
Nyɛ nihi nɛ nyɛ le ní wawɛɛ, nyɛɛ bu mi tue.
3 Ejakaa tue lɛ a kɛ buɔ munyu tue saminya
Kaa bɔ nɛ a kɛ lilɛ hu saa niye ní nya hyɛɔ ɔ.
4 Nyɛ ha nɛ wɔ nitsɛmɛ wa hla mi nɛ waa hyɛ nɔ́ nɛ da;
Nyɛ ha nɛ wɔ nitsɛmɛ waa mwɔ wa yi mi kpɔ ngɛ nɔ́ nɛ da he.
5 Ejakaa Hiob de ke, ‘Ye nɔ́ da,
Se Mawu yi dami sane ha mi.
6 Anɛ ma ye lakpa ngɛ bɔ nɛ e sa nɛ a kojo mi haa he lo?
Ye pa amɛ be hie tsami, pohu i pee we yayami ko.’
7 Mɛnɔ po lɛ ngɛ kaa Hiob,
Nɛ́ e nuɔ jɛmi munyuhi kaa a nuɔ nyu ɔ?
8 E kɛ yayami peeli bɔɔ
Nɛ e kɛ yiwutsotsɛmɛ peeɔ kake.
9 Ejakaa e de ke, ‘Ke adesa ko ngɛ mɔde bɔe kaa e maa sa Mawu hɛ mi ɔ
E be he se ko náe.’
10 Lɔ ɔ he ɔ, nyɛɛ bu mi tue, nyɛ nihi nɛ nyɛ nuɔ nɔ́ sisi:*
E be bae kɔkɔɔkɔ kaa anɔkuale Mawu ɔ maa pee yiwutso ní,
Aloo kaa Ope ɔ maa pee nɔ́ nɛ dɛ blɔ!
11 Ejakaa nɔ́ nɛ adesa tsuɔ ɔ, lɔ ɔ nɔ lɛ e maa da kɛ wo lɛ hiɔ
Nɛ e maa ngɔ nɔ́ nɛ jeɔ e ní peepee ɔ mi kɛ baa a kɛ ba e nɔ.
12 Ngɛ anɔkuale mi ɔ, Mawu pee we yiwutso ní;
Ope ɔ plɛ we dami sane hɛ mi kɛ bu si.
13 Mɛnɔ ngɔ zugba kɛ wo e dɛ,
Nɛ mɛnɔ lɛ hla lɛ kɛ da je ɔ tsuo nya?*
14 Ke e ngɔ e juɛmi* kɛ ma adesahi a nɔ,
Ke e bua a wami kɛ a mumi nya kɛ ha e he ɔ,
15 Nimli tsuo* a hɛ mi ma kpata,
Nɛ adesahi maa kpale kɛ ho zu mi ya ekohu.
16 Lɔ ɔ he ɔ, ke o ngɛ nɔ́ sisi numi ɔ, lɛɛ moo bu nɔ́ nɛ ɔ tue;
Moo bu nɔ́ nɛ ma de ɔ tue saminya.
17 Anɛ e sa kaa nɔ ko nɛ e hiɔ dami sane yemi nɛ e ye nihi a nɔ lo,
Aloo o maa bu nɔ nɛ he wa nɛ e da a fɔ lo?
18 Anɛ o ma de matsɛ ke, ‘Yaka nɔmlɔ ji mo,’
Aloo o ma de odehehi ke ‘Yiwutsotsɛmɛ ji nyɛ’ lo?
19 Nɔ ko ngɛ nɛ́ e hyɛ we ganɔhi a hɛ mi
Nɛ e bui niatsɛmɛ pe ohiatsɛmɛ,*
Ejakaa e nine nya ní tsumi ji mɛ tsuo.
20 A gboɔ tlukaa nyɔ mi kpɛti;
A he doɔ blibliibli kɛkɛ a gbo;
Nihi nɛ a he wa po, a jeɔ mɛ kɛ je ɔ, se pi adesa ninehi nɛ a kɛ jeɔ mɛ.
21 Ejakaa Mawu hɛngmɛ ngɛ nɔmlɔ adesa blɔ ɔmɛ a nɔ,
Nɛ e naa adesa nane hiamihi tsuo.
22 Diblii aloo diblii kpii ko be
Nɛ́ yayami peeli ma nyɛ maa laa a he ngɛ mi.
23 Ejakaa Mawu tui be pɔtɛɛ kɛ ha adesa ko
Nɛ e ba e ngɔ konɛ e kojo lɛ.
24 E kuɔ nihi nɛ a he wa a nɛ́ e he hia we nɛ e hla a sane ko mi
Nɛ e ngɔɔ ni kpahi kɛ daa a nane mi.
25 Ejakaa e le nɔ́ nɛ a ngɛ pee ɔ;
E yeɔ a nɔ kunimi nyɔ mi, nɛ a hɛ mi kpataa.
26 E fiaa mɛ ní ngɛ a yiwutso ɔ he je,
Ngɛ he nɛ nɔ fɛɛ nɔ maa na mɛ ngɛ.
27 Ejakaa a kpa e se nyɛɛmi
Nɛ a be bumi kɛ ha e blɔ ɔmɛ kulaa;
28 A haa nɛ ohiatsɛmɛ foɔ ya kɛ tsɛɔ lɛ,
Nɛ e nuɔ nihi nɛ a be yemi kɛ bualɔ ko ɔ a ya fomi.
29 Ke Mawu ma e nya a, mɛnɔ ma nyɛ maa bu lɛ fɔ?
Ke e ngɔ e hɛ mi kɛ laa a, mɛnɔ ma nyɛ maa na lɛ?
Ke e ngɔ e hɛ mi kɛ laa je ma ko aloo nɔmlɔ ko jio, jã nɔuu,
30 Bɔ nɛ pee nɛ nɔ ko nɛ li Mawu ɔ* nɛ ko ye nɔ
Aloo e ko tsɔ̃ nihi klama.
31 Ke o hyɛ ɔ, nɔ ko ma nyɛ ma de Mawu ke,
‘I pee we yayami ko, se kɛ̃ ɔ, a gbla ye tue lo’?
32 Ke o hyɛ ɔ, nɔ ko ma nyɛ ma de ke, ‘Moo tsɔɔ mi nɔ́ nɛ e sa kaa i ko na se i nɛ ɔ;
Nɛ ke i pee nɔ́ ko nɛ hí ɔ, i be pee hu lo’?
33 Anɛ e sa nɛ e wo mo hiɔ ngɛ o susumi nya be mi nɛ o kua e kojomi ɔ lo?
Mo nitsɛ mo tsɔɔ nɔ́ nɛ o maa pee, tsa pi imi.
Lɔ ɔ, nɔ́ nɛ o le saminya a, mo de mi.
34 Nyumuhi nɛ a ngɛ nɔ́ sisi numi* kɛ juɛmi nɛ́ a ngɛ mi tue bue ɔ
Ma de mi ke,
35 ‘Hiob li nɔ́ nɛ e ngɛ dee ɔ,
Nɛ nile be e munyu ɔmɛ a mi.’
36 Ha nɛ a ka Hiob* kɛ ya si nyagbe
Ejakaa hetohi nɛ e haa a ngɛ kaa yiwutsotsɛmɛ a munyuhi!
37 E ngɔɔ atuã tsɔmi kɛ piɛɛɔ e yayami ɔ he;
E gbɔɔ e dɛ mi ngɛ wa hɛ mi kɛ yeɔ wa he fɛu
Nɛ e tuɔ munyu babauu kɛ siɔ anɔkuale Mawu ɔ!”