Hiob
21 Hiob ha heto ke:
2 “Nyɛɛ bu nɔ́ nɛ ma de nɛ ɔ tue saminya;
Nɛ nyɛɛ ngɔ lɔ ɔ kɛ wo ye bua.
3 Nyɛ ná tsui ha mi nɛ ma tu munyu;
Ke i tu munyu tã a, nyɛ ma nyɛ maa ye ye he fɛu.
4 Anɛ adesa lɛ i ngɛ ye sane ɔ jajee ha lo?
Ke jã a, jinɛ ma to ye tsui si lo?*
5 Nyɛɛ hyɛ mi nɛ́ ye he nɛ pee nyɛ nyakpɛ.
Nyɛɛ ngɔ nyɛ nine kɛ to nyɛ nya he.
6 Ke i susu he ɔ, i haoɔ,
Nɛ ye nɔmlɔ tso ɔ tsuo doɔ blibliibli.
7 Mɛni he je nɛ yiwutsotsɛmɛ a se kɛɔ,
A bwɔɔ kotokoto nɛ a peeɔ niatsɛmɛ ɔ?*
8 A bimɛ ngɛ a hɛ mi be fɛɛ be,
Nɛ a naa a sisi bimɛ po.
9 A wehi ngɛ slɔkee, nɔ́ ko wui a he gbeye,
Nɛ Mawu kɛ e kpa a gblɛ a tue.
10 Ke a na ku ɔmɛ kuɔ na yi ɔmɛ pɛ kɛkɛ a ná mi;
A na amɛ fɔɔ nɛ́ a mi sane we.
11 A binyumu ɔmɛ tuɔ fo ngɛ kpo ɔ nɔ kaa to kuuhi,
Nɛ a bimɛ ɔmɛ tuɔ kɛ yaa kɛ baa.
12 A laa nɛ a fiaa akasawa kɛ saku kɛ toɔ he,
Nɛ ke a nu nɛ a ngɛ bɛ kpae pɛ kɛkɛ a bua jɔ.
14 Se a deɔ anɔkuale Mawu ɔ ke, ‘Ko gba wa nya!
Wa sume nɛ wa maa le o blɔ ɔmɛ.
15 Mɛnɔ ji Ope ɔ, nɛ́ e sa nɛ wa ja lɛ?
Ke wa le lɛ ɔ, mɛni se wa ma ná?’
16 Se i le kaa a be he wami ko ngɛ a ní nami ɔ nɔ.
I kɛ yiwutsotsɛmɛ a susumi* kpɛti kɛ.
17 Si enyɛmɛ a gbeɔ yiwutsotsɛmɛ a kane ɔ?
Si enyɛmɛ nɛ amanehlu baa a nɔ?
Si enyɛmɛ nɛ Mawu kɛ e we abofu ɔ kpataa a hɛ mi?
18 Anɛ a pee kaa nga gbigbli nɛ́ kɔɔhiɔ muɔɔ kɛ yaa
Aloo kaa tsakati* nɛ ahumi muɔɔ kɛ yaa lo?
19 Mawu maa ngɔ adesa tue gblami kɛ fɔ si ha e bimɛ.
Se Mawu nɛ wo lɛ hiɔ nɛ e na bɔ nɛ e mi ngɛ ha.
20 Lɛ nitsɛ e hɛngmɛ nɛ́ na e hɛ mi kpatami ɔ,
Nɛ lɛ nɔuu é nu Ope ɔ mi mi fumi ɔ.
21 Ke a po e wami nɔ kpiti ɔ
E susuu we nɔ́ nɛ maa ba e sisi bimɛ a nɔ ɔ he hu ngɛ e se.
22 Anɛ nɔ ko ma nyɛ maa tsɔɔ Mawu nile lo,*
Be mi nɛ lɛ ji nɔ nɛ e kojoɔ nihi nɛ a nɔ kuɔ ɔ?
23 Nɔ ko gboɔ be mi nɛ e ngɛ he wami wawɛɛ
Benɛ e be nyagba ko nɛ e he mi jɔ lɛ,
24 Benɛ e fiɔhi pee agbo
Nɛ e wuhi a he wa.*
25 Se nɔ kpa hu gboɔ kɛ aywilɛho,*
Nɛ́ e sɛ e nya nɔ́ kpakpa ko gblee.
26 Mɛ tsuo a maa hwɔ si ngɛ zu mi,
Nɛ gɔgɔhi maa ha mɛ tsuo a nɔ.
27 Hyɛ! I le nɔ́ tutuutu nɛ nyɛ ngɛ susue
Kɛ gahi nɛ nyɛ ngɛ toe nɛ́ nyɛ kɛ pee mi nɔ́ nɛ dɛ ɔ.*
28 Ejakaa nyɛ deɔ ke, ‘Jije niatsɛ we ɔ ngɛ,
Nɛ jije bo tsu nɛ yiwutsotsɛ hiɔ mi ɔ ngɛ?’
29 Anɛ nyɛ bi we blɔ hiali sane lo?
Anɛ nyɛ kase we níhi nɛ a kpa si nɛ a na a* saminya lo?
30 Kaa a haa nɛ yiwutsotsɛ yeɔ e he ngɛ amanehlu be mi
Nɛ a kpɔ̃ɔ̃ lɛ ngɛ mi mi fumi be ɔ mi lo?
31 Mɛnɔ maa su e he nɛ e ma de lɛ ke e ní peepee ɔmɛ hí,
Nɛ mɛnɔ maa wo lɛ hiɔ ngɛ nɔ́ nɛ e pee ɔ he?
32 Ke a ngɔ lɛ kɛ ho gɔ ɔ mi ya a,
A maa bu e gɔ ɔ he.
33 Zu kpɔhi nɛ a ngɛ dɔgba mi ɔ maa ngɔ há lɛ,
Nɛ adesahi tsuo maa nyɛɛ e se*
Kaa nihi babauu nɛ a be nyɛe maa kane nɛ a sɛ e hlami.
34 Lɔ ɔ mɛni he je nɛ nyɛ tuɔ munyuhi nɛ se nami be he kɛ woɔ ye bua a?
Hetohi nɛ nyɛ ngɛ mi hae ɔ, lakpa sɔuu!”