Hiob
23 Hiob de ke:
2 “Mwɔnɛ ɔ hu ɔ, ma tu munyu wawɛɛ;
Ye he wami ta ejakaa i ngɛ kɛmɛe.
3 Kaa i le he nɛ ma na Mawu ngɛ ɔ!
Jinɛ ma ya he nɛ e ngɛ ɔ.
4 Nɛ i kɛ ye sane ɔ ma ya pue e hɛ mi
Nɛ ma tu munyuhi fuu nɛ́ ma kɛ fã ye he;
5 Ma hyɛ bɔ nɛ e ma ha mi heto ha
Nɛ ma bu nɔ́ nɛ e ma de mi ɔ tue.
6 Anɛ e kɛ e he wami ngua a maa wo ye he gbeye lo?
Dɛbi, i ngɛ nɔ mi mami kaa e maa bu mi tue.
7 Lejɛ ɔ lɛ nɔ nɛ da a kɛ lɛ ma dla a kpɛti sane ngɛ,
Nɛ ye Kojolɔ ɔ maa wo mi nguɔ si kake nyɔngloo.
8 Se ke i ya puje he ɔ, e be lejɛ ɔ;
Nɛ ke i kpale ye se hu, i nɛ lɛ.
9 Ke e ngɛ ní tsue ngɛ muɔ nɔ ɔ, i nɛ lɛ;
Ke e plɛ e he kɛ ya hiɔ nɔ hu, loloolo ɔ, i nɛ lɛ.
10 Se e le blɔ nɛ i ngɛ nɔ nyɛɛe ɔ.
Ke e ka mi ta a, ye he ma tsɔ kaa sika tsu.
11 I nyɛɛ e nane mami he ɔmɛ a se haa;
I nyɛɛ e blɔ ɔmɛ a nɔ pɛpɛɛpɛ nɛ i gba we kɛ ji nɔ.
12 I gba we kɛ ji mlaa nɛ e kɛ ha a he.
I kɛ e mlaa a to kaa juetli pe bɔ nɛ e ngɛ blɔ hyɛe ɔ po.*
13 Ke e to e yi mi kaa e maa pee nɔ́ ko ɔ, mɛnɔ ma nyɛ maa tsi e nya?
Ke e* suɔ kaa e maa pee nɔ́ ko ɔ, e peeɔ.
14 Ejakaa nɔ́ nɛ e to e yi mi* kaa e maa pee ha mi ɔ, e maa pee kɛ pi si,
Nɛ e ngɛ jamɛ a ní ɔmɛ fuu.
15 Enɛ ɔ he je nɛ i ngɛ haoe ngɛ e he ɔ nɛ;
Ke i susu e he ɔ, i yeɔ lɛ gbeye wawɛɛ.
16 Mawu ha nɛ ye tsui po,
Nɛ Ope ɔ ha nɛ i ye gbeye.
17 Se kɛ̃ ɔ, diblii ha we nɛ ma ma ye nya
Nɛ jã nɔuu nɛ diblii kpii nɛ ha ye hɛ mi ɔ ha we nɛ ma ma ye nya.