Yesaya
54 “Mo yosa nɛ o fɔ we, o kɛ bua jɔmi nɛ he ose!
Mo nɛ o kɔ̃ɔ̃ we hiɛ, o bua nɛ jɔ nɛ o nya kɛ bua jɔmi,
Ejakaa nɔ nɛ a kua lɛ ɔ binyumuhi* hiɛ
Pe yo nɛ e ngɛ huno* ɔ binyumuhi,” Yehowa lɛ de.
2 “Ha nɛ o bo tsu ɔ mi nɛ bli gbajaa.
Ha nɛ o bo tsu ngua a he bo ɔ mi nɛ bli.
Gblaa mi wawɛɛ, ha nɛ bo tsu kpa amɛ nɛ a ka,
Nɛ o ha nɛ o bo tsu plɛɛko ɔmɛ a he nɛ wa.
3 Ejakaa o mi ma bli kɛ ya hiɔ nɔ kɛ muɔ nɔ.
O nina maa ye je mahi a nɔ,
Nɛ a ma ya hi ma doku ɔmɛ a mi.
4 Koo ye gbeye, ejakaa o hɛ mi be si puee;
Nɛ ko ha nɛ zo nɛ pee mo, ejakaa o nine be si nyɛe.
O hɛ maa je zo nɛ gbe mo ngɛ o nihe mi ɔ nɔ,
Nɛ o be o hɛ mi nɛ pue si benɛ o huno ɔ gbo ɔ kaie hu.”
5 Ejakaa o Bɔlɔ* Ngua a ngɛ kaa o huno,*
E biɛ ji Yehowa tabohiatsɛ,
Nɛ Israel Nɔ Klɔuklɔu ɔ ji o Kpɔlɔ,
A ma tsɛ lɛ ke je ɔ tsuo Mawu.
6 Yehowa tsɛ mo kaa yogbayo nɛ a kua lɛ nɛ e ngɛ aywilɛho yee,*
Kaa yo nɛ a kpee lɛ ngɛ e yihe mi nɛ a kua lɛ,” o Mawu ɔ lɛ de.
7 “I kua mo be kpiti ko,
Se i kɛ mɔbɔ nami maa kpale bua o nya kɛ ba ekohu.
8 Benɛ ye mi mi fu wawɛɛ ɔ,* i ngɔ ye hɛ mi kɛ laa mo be bɔɔ,
Se i kɛ neneene suɔmi maa na mo mɔbɔ, Yehowa, o Kpɔlɔ ɔ lɛ de.
9 Enɛ ɔ ngɛ kaa Noa be ɔ mi kɛ ha mi.
Kaa bɔ nɛ i kã kita kaa Noa be ɔ mi nyu be zugba a hɛ mi hae hu ɔ,
Jã nɛ i kã kita kaa ye mi mi be nyɛ fue hu, nɛ i be nyɛ hɛ mi kae hulɔ.
10 Yoku ɔmɛ ma nyɛ maa je a da he,
Nɛ yoku wawi ɔmɛ ma nyɛ ma mimiɛ,
Se i be ye suɔmi nɛ se pui ɔ jee ngɛ o nɔ,
Nɛ ye tue mi jɔmi somi ɔ hu be mimiɛe, Yehowa, nɔ nɛ naa mo mɔbɔ ɔ lɛ de.
11 Oo mo yo nɛ o hao, mo nɛ kɔɔhiɔ fia mo kɛ ya kɛ ba, nɛ o be bua wolɔ,
I ngɔ mɔɔta nɛ he wa kɛ ngɛ o tɛ ɔmɛ fiae
Nɛ i ngɔ safiro kɛ fia o sisi tomi ɔ.
12 I kɛ rubi tɛ lɛ maa fia o gbogbo ɔ yi mi,
Nɛ i kɛ tɛhi nɛ a ngɛ kpɛe* maa pee o we agbo ɔmɛ
Nɛ i kɛ tɛhi nɛ a he jua wa maa fia o huzu ɔmɛ tsuo.
14 O nane maa pi si ngɛ dami mi.
A ma je yi mi wami kɛ je o he kɛ ya tsitsaa,
O be nɔ́ ko nɔ́ ko gbeye yee, nɛ nɔ́ ko nɔ́ ko be o he gbeye woe,
Ejakaa e be o he sue.
15 Ke nɔ ko ba tua mo ɔ,
Pi imi nɛ i tsɔ lɛ.
Nɔ fɛɛ nɔ nɛ e ma ba tua mo ɔ maa nɔ ngɛ o nya.”
Imi nɔuu lɛ i bɔ nɔ nɛ kpataa nɔ hɛ mi ɔ, konɛ e kpata nɔ hɛ mi.
17 Ta hwumi nɔ́ ko be nɛ a maa sɔ̃ kɛ si nyɛ nɛ e maa ye manye,
Nɛ lilɛ fɛɛ lilɛ nɛ maa te si kɛ wo nyɛ ngɛ kojomi he ɔ, a maa bu lɛ fɔ.
Enɛ ɔ ji Yehowa sɔmɔli a weto ní,*
Nɛ a dami ɔ je ye ngɔ,” Yehowa lɛ de.