2 Mose

21 “Mlaahi nɛ ó wo mɛ ji nɛ ɔmɛ nɛ:

2 “Ke o he Hebri no nyɔguɛ ɔ, e ma sɔmɔ mo jeha ekpa, se ngɛ jeha kpaagone ɔ mi ɔ, o ngmɛɛ e he nɛ e ho faa, e ko wo nɔ́ ko nɔ́ ko. 3 Ke lɛ nɔ kake nɛ e ba a, lɛ nɔ kake nɛ e kpale kɛ ho. Ke e kɛ e yo nɛ ba a, lɛɛ e kɛ e yo ɔ nɛ a kpale kɛ ho. 4 Ke e nyɔmtsɛ ɔ ha lɛ yo nɛ e kɛ lɛ fɔ binyumuhi aloo biyihi ɔ, yo ɔ kɛ e bimɛ ɔmɛ maa pee e nyɔmtsɛ ɔ níhi, nɛ lɛ nɔ kake too e maa ho. 5 Se ke nyɔguɛ ɔ kua ke e be jee, nɛ e de ke: ‘I suɔ ye nyɔmtsɛ ɔ, ye yo ɔ, kɛ ye bimɛ ɔmɛ, lɔ ɔ he ɔ, i sume nɛ ma ye ye he’ ɔ, 6 e nyɔmtsɛ ɔ nɛ e ngɔ lɛ kɛ ba anɔkuale Mawu ɔ hɛ mi. Lɔ ɔ se ɔ, é ngɔ lɛ kɛ ba sinya a nya loo sinya tso ɔ he, nɛ́ e nyɔmtsɛ ɔ nɛ ngɔ abui kɛ gbu e tue, konɛ e pee e nyɔmtsɛ ɔ nyɔguɛ e wami be tsuo.

7 “Ke nɔ ko jua e biyo kaa nyɔguɛ ɔ, biyo ɔ be e he yee kaa bɔ nɛ nyumu nyɔguɛ maa ye e he ɔ. 8 Ke e nyɔmtsɛ ɔ bua jɔɛ e he, nɛ e sume kaa e maa ngɔ lɛ kaa e yo kpa, se e ngɛ hlae nɛ e jua lɛ kɛ ha nɔ kpa a,* e be he blɔ nɛ e juaa lɛ kɛ haa ma je li, ejakaa ke e pee jã a, e sisi nyɔguɛ ɔ. 9 Ke e ngɔ lɛ kɛ ha e binyumu ɔ, lɛɛ é ha lɛ biyo blɔ nya ní. 10 Ke e ya ngɔ yo kpa a, e sɛ nɛ e gbɔ e kekle yo ɔ nya mi ngma, e heha ní, kɛ e gba si himi blɔ nya nɔ́ ɔ nɔ.* 11 Ke e pee we ní etɛ nɛ ɔmɛ ha we nyɔguɛ ɔ, lɛɛ e ma nyɛ maa je faa nɛ e be sika ko woe.

12 “Nɔ fɛɛ nɔ nɛ maa fia nɔ ko nɔ́ nɛ e ma gbo ɔ, á gbe lɛ. 13 Se ke pi nɛ e je blɔ, nɛ anɔkuale Mawu ɔ ngmɛ blɔ nɛ e ba jã a, ma tsɔɔ nyɛ he ko nɛ e ma nyɛ maa tu fo kɛ ya. 14 Ke nɔ ko mi mi fu e nyɛmi nɔmlɔ nɛ e je blɔ nɛ e gbe lɛ ɔ, á gbe lɛ, ke e ma bi nɛ a gbla lɛ kɛ je ye we afɔle sami la tɛ ɔ he po. 15 Nɔ fɛɛ nɔ nɛ e maa fia e tsɛ loo e nyɛ nɔ́ ɔ, á gbe lɛ.

16 “Ke nɔ ko ju nɔmlɔ nɛ e ya jua lɛ, aloo a na nɔ nɛ e ju ɔ ngɛ e dɛ ɔ, á gbe lɛ.

17 “Nɔ fɛɛ nɔ nɛ e maa gbiɛ e tsɛ loo e nyɛ* ɔ, á gbe lɛ.

18 “Ke nyumuhi ngɛ pɛe nɛ nɔ kake fia e nyɛmi tɛ aloo kɔ̃,* nɛ e gbo we se e tlɔ sa mi ɔ, nɔ́ nɛ a pee ji nɛ ɔ nɛ: 19 Ke e nyɛɔ nɛ e teɔ si nɛ e kɛ tso nyɛɛɔ ngɛ kpo nɔ ɔ, lɛɛ a be nɔ nɛ e fia lɛ nɔ́ ɔ tue gblae. Be nɛ nɔ nɛ plaa a nyɛ we ní tsumi, kɛ ya si be nɛ e ma ná he wami kɛ pi si ɔ he hiɔ pɛ nɛ é wo.

20 Ke nɔ ko ngɔ tso kɛ fia e nyɔguɛ nyumu aloo e nyɔguɛ yo nɛ e gbo ngɛ e nine nɔ ɔ, a gbla jamɛatsɛ ɔ tue kɛ to nane mi. 21 Se ke nyɔguɛ ɔ hi si ligbi kake loo ligbi enyɔ loko e gbo ɔ, lɛɛ a ko gbla nyɔmtsɛ ɔ tue kɛ to nane mi, ejakaa e nyɔmtsɛ ɔ je sika kɛ he lɛ.

22 “Ke nyumuhi ngɛ kunɔ nɔe nɛ a he ya si yohɔyo ko nɛ e fɔ be mi nɛ e sui e fɔmi be,* se gbenɔ* ko ji mi kɛ bɛ ɔ, nɔ nɛ e he si lɛ ɔ nɛ e wo hiɔ nɛ yo ɔ huno ɔ ma bɔ lɛ ɔ; é wo kɛ gu kojoli ɔmɛ a nɔ. 23 Se ke gbenɔ ko je mi kɛ ba a, lɛɛ á ngɔ wami kɛ to wami nane mi,* 24 á ngɔ hɛngmɛ kɛ to hɛngmɛ nane mi, á ngɔ lungu kɛ to lungu nane mi, á ngɔ nine kɛ to nine nane mi, á ngɔ nane kɛ to nane nane mi, 25 á ngɔ la sami kɛ to la sami nane mi, á ngɔ plaami kɛ to plaami nane mi, nɛ á ngɔ kɔ̃ kɛ to kɔ̃ nane mi.

26 “Ke nyumu ko fia e nyɔguɛ nyumu loo e nyɔguɛ yo hɛngmɛ nɔ́ nɛ e pɛ ɔ, e ha nɛ e nyɔguɛ ɔ nɛ e ho faa kɛ to e hɛngmɛ ɔ nɛ pɛ ɔ nane mi. 27 Nɛ ke e fia e nyɔguɛ nyumu loo e nyɔguɛ yo nɔ́ nɛ e lungu hia a, e ha nɛ e nyɔguɛ ɔ nɛ e ho faa kɛ to e lungu ɔ nɛ e hia a nane mi.

28 “Ke na si nɔ ko koli, nyumu jio, yo jio, nɛ nɔ ɔ gbo ɔ, a fiaa na a tɛ nɛ e gbo, a ko ye e lo; se natsɛ ɔ lɛɛ a ko gbla e tue. 29 Se ke na ko pɔɔ nɔ koli simi nɛ a bɔ natsɛ ɔ kɔkɔ se e hyɛ we lɛ saminya, nɛ e gbe nyumu ko loo yo ko ɔ, a fiaa na a tɛ, nɛ a gbe natsɛ ɔ hulɔ. 30 Ke a tsɔɔ lɛ nɔ́ nɛ e ha kɛ kpɔ̃ e he* ɔ, e ha nɔ́ fɛɛ nɔ́ nɛ a tsɔɔ kaa e ha kaa kpɔmi nɔ́ ɔ, konɛ e* yi nɛ ná wami. 31 Binyumu nɛ na a si jio, biyo nɛ e si jio, a kɛ natsɛ ɔ nɛ ye ngɛ mlaa nɛ ɔ nɔuu nya. 32 Ke na a ya si nyɔguɛ nyumu loo nyɔguɛ yo ɔ, natsɛ ɔ nɛ ha nyɔguɛ ɔ nyɔmtsɛ ɔ shekel* 30, nɛ a fiaa na a tɛ nɛ e gbo.

33 “Ke nɔ ko bli muɔ ko nya kɛ fɔ si, aloo e tsua muɔ nɛ e bu we nya nɛ na aloo teji ya nɔ mi ɔ, 34 nɔ nɛ tsua muɔ ɔ nɛ e to nane mi. E wo lohwetsɛ ɔ hiɔ, nɛ́ e ngɔ lohwe gbogboe ɔ. 35 Ke nɔ ko na plaa nɔ kpa na nɛ e gbo ɔ, a jua na hɛngmengmletsɛ ɔ nɛ a gba sika a, nɛ a gba na gbogboe ɔ hulɔ. 36 Aloo ke a ná le kaa na a pɔɔ nɔ koli simi se natsɛ ɔ hyɛ we lɛ saminya a, natsɛ ɔ nɛ e ngɔ na kɛ to na nane mi, nɛ e ngɔ na gbogboe ɔ.