Ezekiel
24 Yehowa kɛ mi tu munyu ekohu ngɛ jeha nɛɛne ɔ we nyɔhiɔ nyɔngma a we ligbi nyɔngma a nɔ, nɛ e de mi ke: 2 “Nɔmlɔ bi, mo kadi ligbi nɛ ɔ,* nɛ ji mwɔnɛ ligbi nɛ ɔ kɛ fɔ si. Babilon matsɛ ɔ je Yerusalem tuami ɔ sisi mwɔnɛ ligbi nɛ ɔ. 3 Nɛ moo bu abɛ kɛ kɔ atuã tsɔli nɛ ɔmɛ a he nɛ́ o de ke:
“Nɔ́ nɛ Nyɔmtsɛ Matsɛ Yehowa de ji nɛ ɔ nɛ:
“Ngɔɔ buɛ* kɛ ma la nɔ nɛ o yɛ nyu kɛ wo mi.
4 O kɛ lo nɛ a poo mi, nɛ ji lo kpakpahi nɛ wo mi,
E fiɔ kɛ e kɔni; nɛ o kɛ wu kpakpa amɛ nɛ wo mi nɛ a hyi lɛ tɔ.
5 Moo ngɔ jijɔ ɔmɛ a kpɛti nɔ́ nɛ hi pe kulaa a, nɛ o to lɛ́ kɛ wo buɛ ɔ sisi tsuo.
Moo ngɔ wu ɔ kɛ piɛɛ lo ɔ nɛ a poo ɔ he, nɛ o hoo nɛ e be saminya.”’
6 “Lɔ ɔ he ɔ, nɔ́ nɛ Nyɔmtsɛ Matsɛ Yehowa de ji nɛ ɔ nɛ:
‘Musu tloo muɔ si puemi ma a, buɛ nɛ e mi nɔ kana, nɛ a je we kana a nɛ ngɛ mi ɔ!
Mo je lo ɔ nɛ a poo ɔ kɛ je mi kakaaka; koo fɔ a nɔ sɔ.
7 Ejakaa muɔ si nɛ ma nɛ ɔ pue ɔ ngɛ e mi loloolo; e plɛ pue tɛsa nɔ.
E plɛ we kɛ pue zugba konɛ e ngɔ zu kɛ ha nɔ.
8 Bɔ nɛ pee nɛ i kɛ abofu nɛ nya wa nɛ ye lue he je ɔ,
I ngɔ e muɔ ɔ kɛ pue tɛsa kpataa nɛ ngɛ tsɛ̃e ɔ nɔ
Konɛ a ko ha nɔ.’
9 “Enɛ ɔ he ɔ, nɔ́ nɛ Nyɔmtsɛ Matsɛ Yehowa de ji nɛ ɔ nɛ:
‘Musu tloo muɔ si puemi ma a!
Ma bua lɛ́ ɔ nya nɛ e ya hiɔwe.
10 Ngɔɔ lɛ́ babauu kɛ pue nɔ, nɛ o ha nɛ la a nɛ tso,
Moo hoo lo ɔ nɛ e be saminya, mo plɛ e he nyu ɔ kɛ pue he, nɛ o ha nɛ wu ɔ nɛ ngla.
11 Ngɔɔ buɛ ɔ nɛ nɔ́ ko be mi ɔ kɛ ma la ngu hɛuu ɔ nɔ nɛ e dɔ la
Konɛ akɔblee nɛ a kɛ pee buɛ ɔ nɛ tsu paa.
Mu nɛ ngɛ mi ɔ maa sile kɛ je mi, nɛ e mi kana a tsuo maa ta pɛsɛpɛsɛ.
12 E ngɛ ahuto nɛ e he wa,
Ejakaa e mi kana babauu ɔ ji.
Mo sake kɛ fɔ la a mi kɛ e mi kana a tsuo!’
13 “‘O je mi bami sasɛ ɔ ji nɔ́ nɛ wo o he mu. I bɔ mɔde kaa ma ha nɛ o he nɛ tsɔ, se o he mu ɔ ha we nɛ o he nɛ tsɔ. O he be tsɔe kɛ ya si be nɛ ye mi mi nɛ fu mo ɔ nya maa ba si. 14 Imi Yehowa nitsɛ lɛ i de. E maa ba mi. Nɔ́ ko be nyɛe maa tsi mi blɔ, i be mɔbɔ nae, nɛ i be ye he piae. A maa kojo mo ngɛ o blɔ ɔmɛ kɛ o ní peepee ɔmɛ a nya.’ Nyɔmtsɛ Matsɛ Yehowa lɛ de.”
15 Yehowa kɛ mi tu munyu ekohu, nɛ e de mi ke: 16 “Nɔmlɔ bi, ma ha nɛ o suɔlɔ ɔ ma gbo tlukaa. Koo ye aywilɛho;* ko fo ya, nɛ koo wɔle vo nyu hulɔ. 17 Ye aywilɛho kɛ wo o mi, nɛ koo nyɛ ya. Ngɔɔ yi fimi nɔ́ kɛ fĩ o yi nɛ o wo o tokota a. Koo ha o nya nɔ bwɔmi ɔ nɔ, nɛ koo ye abolo nɛ ni kpahi kɛ ma ba ha mo ɔ.”*
18 I kɛ ma a tu munyu mɔtu, nɛ ye yo ɔ gbo gbɔkuɛ. Lɔ ɔ he ɔ, benɛ je na a, i pee kaa bɔ nɛ a fã mi ɔ pɛpɛɛpɛ. 19 Ma bi ɔmɛ bi mi ke: “Anɛ o be wɔ bɔ nɛ nɔ́ nɛ o ngɛ pee nɛ ɔ kɔɔ wa he ha a dee lo?” 20 I ha mɛ heto ke: “Yehowa kɛ mi tu munyu nɛ e de mi ke, 21 ‘Mo de Israel we ɔ ke: “Nɔ́ nɛ Nyɔmtsɛ Matsɛ Yehowa de ji nɛ ɔ nɛ, ‘Ye jami he ɔ nɛ nyɛɛ kɛ fĩaa, nɛ nyɛ bua jɔ he wawɛɛ, nɛ e ngɛ nyɛ tsui nɔ ɔ,* i ma lɛ blemi. Klaate maa gbe nyɛ nitsɛmɛ nyɛ binyumuhi kɛ nyɛ biyihi nɛ nyɛ si mɛ ɔ. 22 Kɛkɛ ɔ, nyɛ maa pee kaa bɔ nɛ i pee ɔ pɛpɛɛpɛ. Nyɛɛ kɛ nɔ́ be nyɛ nya nɔ bwɔmi ɔ nɔ hae, nɛ nyɛ be abolo nɛ ni kpahi kɛ ma ba ha nyɛ ɔ yee. 23 Nyɛ yi fimi nɔ́ ɔ maa hi nyɛ yi, nɛ nyɛ tokota amɛ maa hi nyɛ nane. Nyɛ be aywilɛho yee nɛ nyɛ be ya foe hulɔ. Mohu ɔ, nyɛ maa sa ngɛ nyɛ tɔmi ɔ mi, nɛ nyɛ ma kɛmɛ kɛ wo nyɛ sibi. 24 Ezekiel ba pee kaa okadi ha nyɛ. Bɔ nɛ e pee ɔ, jã pɛpɛɛpɛ nɛ nyɛ hu nyɛ maa pee. Ke e ba mi jã a, nyɛ ma ná le kaa imi ji Nyɔmtsɛ Matsɛ Yehowa a nɛ.’”’”
25 “Nɛ mo nɔmlɔ bi, ma ngɔ a gbogbo nɛ he wa a kɛ je, nɛ ji nɔ́ nɛ ngɛ fɛu nɛ haa mɛ bua jɔmi, nɔ́ nɛ a fiɛ we he, nɛ ngɛ a tsui nɔ ɔ.* Ma ngɔ a binyumu ɔmɛ kɛ a biyi ɔmɛ hu kɛ piɛɛ he. Ligbi nɛ ma pee nɔ́ nɛ ɔ, 26 nɔ ko nɛ e yi ná wami ɔ lɛ ma ba bɔ mo amaniɛ ɔ nɛ. 27 Jamɛ a ligbi ɔ, o ma bli o nya mi nɛ o kɛ nɔ nɛ e yi ná wami ɔ maa tu munyu, nɛ o be o nya mae hu. O maa pee kaa okadi ha mɛ, nɛ a ma ná le kaa imi ji Yehowa.”