Daniel

10 Ngɛ Persia Matsɛ Sirus nɔ yemi ɔ we jeha nɛ ji etɛne ɔ mi ɔ, a je nina ko kpo kɛ tsɔɔ Daniel nɛ a tsɛɛ lɛ ke Belteshazar a; sɛ gbi ɔ ji anɔkuale, nɛ e kɔɔ ta ngua ko he. E nu sɛ gbi ɔ sisi, nɛ a ha nɛ nɔ́ nɛ e na a mi tɛ ha lɛ saminya.

2 Jamɛ a be ɔ mi ɔ, imi Daniel, i ye aywilɛho otsi etɛ sɔuu. 3 Otsi etɛ ɔ tsuo ɔ, i yi niye ní kpakpa, nɛ i yi muɔ lo, nɛ wai ko hu sɛ ye nya, nɛ i kpa we nu ko hulɔ. 4 Ngɛ kekleekle nyɔhiɔ ɔ we ligbi 24 ɔ nɔ benɛ i daa si ngɛ pa ngua a nɛ ji Tigris* ɔ tue ɔ, 5 i wo ye yi nɔ, nɛ i na nyumu ko nɛ e ha kploba, nɛ Ufaz sika tsu mlɛmi fimi nɔ́ ngɛ e mlɛmi. 6 E nɔmlɔ tso ngɛ kpɛe kaa krisolito tɛ, e hɛ mi ngɛ kpɛe kaa oslabai nɛ gba, e hɛngmɛ ngɛ kaa jatɛ nɛ a su, e kɔnihi kɛ e nanehi ngɛ kaa akɔblee nɛ a sa he, nɛ e gbi ngɛ kaa nimli babauu a gbi. 7 Imi Daniel pɛ lɛ i na nina a; nyumu ɔmɛ nɛ a piɛɛ ye he ɔ lɛɛ a nɛ nina a. Se kɛ̃ ɔ, a ye gbeye wawɛɛ nɛ a tu fo nɛ a ya laa a he.

8 Nɛ e piɛ imi nɔ kake too, nɛ benɛ i na nina nɛ ngɛ nyakpɛ nɛ ɔ, i gbɔjɔ, i pee hoyaa nɛ ye he wami tsuo ta. 9 Kɛkɛ nɛ i nu nɛ e ngɛ munyu tue; se benɛ i nu e gbi ɔ, i nɔ mahe mi vii be mi nɛ ye hɛ mi bu zugba. 10 Se nine ko pɛtɛ ye he, nɛ e mimiɛ mi nɛ i te si nɛ i kplã si ngɛ ye nakutso nya, nɛ i kɛ ye ninehi pi zugba. 11 Kɛkɛ nɛ e de mi ke:

“Oo Daniel, mo nyumu nɛ o he jua wa wawɛɛ,* moo bu munyu nɛ i ma mo demi nɛ ɔ tue saminya. Amlɔ nɛ ɔ, moo te si nɛ o da si ngɛ he nɛ o ngɛ ɔ, ejakaa a tsɔ mi o ngɔ.”

Benɛ e de mi nɔ́ nɛ ɔ, i te si nɛ ye he bɔni domi blibliibli.

12 Kɛkɛ nɛ e de mi ke, “Oo Daniel, koo ye gbeye. Kekleekle ligbi nɛ o ngɔ o tsui kɛ ha nɔ́ sisi numi, nɛ o ba o he si ngɛ o Mawu ɔ hɛ mi ɔ, a nu o sɔlemi ɔ, nɛ lɔ ɔ he je nɛ i ba a nɛ. 13 Se ganɔ ɔ nɛ buɔ Persia nɔ yemi ɔ he ɔ tsi mi blɔ ligbi 21. Se Mikael,* nɛ ji ganɔ nikɔtɔma amɛ a ti nɔ kake ɔ ba ye bua mi; nɛ i hi lejɛ ɔ ngɛ Persia matsɛmɛ ɔmɛ a kasa nya. 14 I ba konɛ ma ba ha nɛ o nu nɔ́ nɛ maa ba o we bi ɔmɛ a nɔ ngɛ nyagbe ligbi ɔmɛ a mi ɔ sisi, ejakaa e ji nina nɛ maa ba mi hwɔɔ se.”

15 Benɛ e de mi munyu nɛ ɔmɛ ɔ, i ma ye yi si nɛ i nyɛ we munyu tumi. 16 Kɛkɛ nɛ nɔ ko nɛ e ngɛ kaa nɔmlɔ ta ye nya he, nɛ i pa ye nya mi nɛ i de nɔ nɛ daa si ngɛ ye hɛ mi ɔ ke: “Ye nyɔmtsɛ, nina a ha nɛ ye he ngɛ doe blibliibli, nɛ i gbɔjɔ. 17 Lɔ ɔ he ɔ, kɛ ye nyɔmtsɛ ɔ sɔmɔlɔ ɔ ma plɛ nɛ e kɛ ye nyɔmtsɛ ɔ maa tu munyu kɛɛ? Ejakaa amlɔ nɛ ɔ, ye he wami ta, nɛ mumi ko mumi ko be ye mi.”

18 Nɔ nɛ ngɛ kaa nɔmlɔ adesa a ta ye he ekohu nɛ e ha nɛ i ná he wami. 19 Kɛkɛ nɛ e de ke: “Oo mo nyumu nɛ o he jua wa wawɛɛ,* koo ye gbeye. Mo he manye. O he nɛ wa, ee, o he nɛ wa.” Benɛ e kɛ mi ngɛ munyu tue ɔ, i ná he wami nɛ i de ke: “Ye nyɔmtsɛ, moo tu munyu, ejakaa o ha nɛ i ná he wami.”

20 Kɛkɛ nɛ e de ke: “Anɛ o le nɔ́ he je nɛ i ba o ngɔ ɔ lo? Amlɔ nɛ ɔ, ma kpale ye se, nɛ i kɛ Persia ganɔ ɔ ma ya hwu. Ke i je ɔ, Hela ganɔ ɔ maa ba. 21 Se ma de mo níhi nɛ a ngma ngɔ fɔ si ngɛ anɔkuale womi ɔ mi ɔ. Nɔ ko be nɛ e ngɛ ye se fĩe ngɛ ní nɛ ɔmɛ a mi, lɛɛ ja Mikael, nɛ ji o ganɔ ɔ pɛ.