La
Kɛ ha la nɔ hyɛlɔ ɔ; ngɛ Yedutun* nya. La nɛ David po.
62 Niinɛ, i* pee dii kɛ ngɛ Mawu mlɛe.
E ngɔ lɛ ye yi wami hemi jeɔ.
2 Niinɛ, lɛ ji ye tɛsa kɛ ye yi wami helɔ, ye wesa he* nɛ ngɛ slɔkee;
I be mimiɛe nɛ́ ma nɔ si kɔkɔɔkɔ.
3 Kɛ yaa si mɛni be nɛ nyɛ ma tua nɔmlɔ nɛ́ nyɛɛ gbe lɛ?
Nyɛ tsuo nyɛ he ngɛ gbeye kaa gbogbo nɛ ngɛ kue, tɛ gbogbo nɛ miɔ nɛ e maa nɔ si.*
4 Ejakaa a soɔ konɛ a tsɛ̃ lɛ kɛ je e blɔ he nɛ nɔ kuɔ ɔ* kɛ ba nɔ si;
A bua jɔ lakpa yemi he.
A kɛ a nya jɔɔ nɔ, se a tsui mi lɛɛ gbiɛmi sɔuu. (Sela)
5 Niinɛ, i peeɔ dii kɛ mlɛɔ Mawu.*
Ejakaa hɛ kɛ nɔ fɔmi nɛ i ngɛ ɔ je e ngɔ.
6 Niinɛ, lɛ ji ye tɛsa kɛ ye yi wami helɔ, ye wesa he nɛ ngɛ slɔkee;
I be mimiɛe kɔkɔɔkɔ.
7 Mawu lɛ ma he ye yi wami nɛ e maa wo ye hɛ mi nyami.
Mawu ji ye tɛsa nɛ he wa, ye wesa he.
8 Ma bi, nyɛɛ ngɔ nyɛ hɛ kɛ fɔ e nɔ be fɛɛ be.
Nyɛɛ ngɔ nyɛ tsui mi sanehi tsuo kɛ pue e hɛ mi.
Mawu ji wa wesa he. (Sela)
9 Nimli a bimɛ ngɛ kaa gugwɔ mi kɔɔhiɔ,
Adesahi a bimɛ ji yaka níhi.
Ke a ngmɛ mɛ ngɛ sɛni nɔ ɔ, gugwɔ mi kɔɔhiɔ po jiɔ pe mɛ.
10 Nyɛ ko ngɔ nyɛ hɛ kɛ fɔ amimi yemi nɔ,
Nɛ nyɛ ko ngɔ nyɛ hɛ kɛ fɔ jumi nɔ kɛ sisi nyɛ he hulɔ.
Ke nyɛ ba ná ní babauu ɔ, nyɛ ko ngɔ nyɛ tsui kɛ fɔ nɔ.
11 Mawu tu munyu, ee, i nu nɔ́ nɛ ɔ si enyɔ:
Lɔ ɔ ji, Mawu nɔ́ ji he wami.
12 Jehanɛ hu ɔ, Oo Yehowa, o nɔ́ ji suɔmi nɛ se pui,
Ejakaa o woɔ nɔ fɛɛ nɔ hiɔ ngɛ e ní peepeehi a nya.